ސޫރިޔާގެ ކުރީގެ ރައީސް ބައްޝާރް އަލް އަސަދުގެ ދިގު ވެރިކަން ނިމުމަކަށް އައުމާ ގުޅިގެން، ސޫރިޔާ އަލުން އާރާސްތުކުރަން އެހީވުމަށްޓަކައި، އެ ޤައުމާ ދެކޮޅަށް ޔޫރަޕިއަން ޔޫނިއަން (އީޔޫ) އިން އަޅާފައިވާ ދަތިކުރުމުގެ ބައެއް ފިޔަވަޅުތައް އެ އިއްތިހާދުން ވަގުތީ ގޮތުން އުވާލައިފިއެވެ.

އަސަދުގެ ވެރިކަމުގައި އީޔޫން ސޫރިޔާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ތެރެއިން ވަގުތީ ގޮތުން އުވާލާފައިވަނީ ބޭންކިން، ހަކަތަ އަދި ދަތުރުފަތުރުގެ ދާއިރާއަށް އަޅާފައިވާ ފިޔަވަޅުތަކެވެ.

ސޫރިޔާގައި މި ވަގުތު ވެރިކަން ކުރަމުން ދަނީ ހަނގުރާމަވެރި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސް) އިން ޤާއިމު ކޮށްފައިވާ ވަގުތީ ސަރުކާރަކުންނެވެ. އެޗްޓީއެސްއިން އެ ޤައުމުގެ ކުރީގެ ރައީސް ބައްޝާރް އަލް-އަސަދުގެ ވެރިކަމަށް ނިމުމެއް ގެނެސްފައި ވަނީ މިދިޔަ ޑިސެމްބަރު މަހުގެ 8 ވަނަ ދުވަހުއެވެ.

އެޗްޓީއެސްގެ ސަރުކާރުން ދަނީ ސޫރިޔާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައި، ސޫރިޔާ އަލުން ބިނާކުރުމުގެ ފުރުޞަތު ދިނުމަށް ދުނިޔެއަށް ގޮވާލަމުންނެވެ.

ނަމަވެސް، ބައިނަލްއަޤުވާމީ މުޖުތަމަޢުގެ އިތުރުން ސޫރިޔާގެ ރައްޔިތުންނަށް އެޗްޓީއެސްގެ ސަރުކާރުން ވެފައިވާ ވަޢުދުތައް ފުއްދަން ފެށުމުގެ ކުރިން، އެ ފިޔަވަޅުތައް އުވައިލަން ހުޅަނގުގެ ގިނަ ޤައުމުތަކުން މިހާތަނަށް އޮތީ ފަހަތު ފަޔަށް ބުރަވެފައެވެ.

ނަމަވެސް، އީޔޫގެ މެމްބަރު ޤައުމުތަކުގެ ޚާރިޖީ ވަޒީރުންގެ ބައްދަލުވުމެއްގައި ވަނީ ސޫރިޔާ އާ ދެކޮޅަށް އަޅާފައިވާ ބައެއް ފިޔަވަޅުތައް އުވައިލަން ނިންމައިފައެވެ. ޙާއްސަކޮށް ބޭންކިން މުޢާމަލާތްތައް ހުއްޓުވާފައި އޮތް އޮތުމަށް ލުއި ދިނުމުން، ދުނިޔޭގެ މައި ބޭންކުތައް މެދުވެރިކޮށް ފައިސާ ހޯދުމުގެ މަގު ސޫރިޔާއަށް މިހާރު ވަނީ ފަހިވެފައެވެ.

މި ފިޔަވަޅުތައް އުވާލާފައިވަނީ ވަގުތީ ގޮތުން ކަމަށާއި، އެޗްޓީއެސްގެ ސަރުކާރުން ވަޢުދާ ޚިލާފަށް ޢަމަލުކުރާނަމަ، އެ ފިޔަވަޅުތައް އަލުން އިޔާދަކުރާނެކަމުގެ އިންޒާރު އީޔޫން ވަނީ ދީފައެވެ.