މިހާރު ކުރިއަށްދާ އެސޯސިއޭޝަން ކެރަމް ޗެމްޕިއަންޝިޕްގެ 15 އަހަރުން ދަށާއި، 19 އަހަރުން ދަށުގެ އަންހެން އަދި ފިރިހެން ކުދިންގެ ބައިގެ އިތުރުން ސީނިއާ އަންހެން އަދި ފިރިހެން ޑަބަލްސް އިވެންޓްގެ ޗެމްޕިއަނުން ކަށަވަރުވެއްޖެއެވެ.

ހުޅުމާލޭގައި ހުންނަ ކެރަމް އެރީނާގައި ކުރިއަށްދިޔަ ޖޫނިއާ ބައިގެ އަންހެން ސިންގަލްސް ޗެމްޕިއަންކަން ޒިއުނާ ބިންތި ނަޝީދު ހޯދީ ފައިނަލުގައި 24-08 އިން އައިޝަތު އަލީޝާ ނާފިއު ބަލިކޮށްގެންނެވެ.

ޖޫނިއާ ބައިގެ ފިރިހެން ސިންގަލްސް ފައިނަލުގައި އަހުމަދު ޝަމާލް ސައުދުﷲ ވަނީ 20-14 އިން އަޒްލާން އައުޒަލް ބަލިކޮށްފައެވެ.

މުބާރާތުގެ 19 އަހަރުން ދަށުގެ ބައިގެ އަންހެން ސިންގަލްސް ޗެމްޕިއަންކަން ހޯދީ އައިޝަތު އަލީޝާ ނާފިއު އެވެ. އަލީޝާ ވަނީ ފައިނަލުގައި 2-1 ސެޓުން ޒިއުނާ ބަލިކޮށްފައެވެ.

މި އުމުރުފުރާގެ ފިރިހެން ސިންގަލްސް ޗެމްޕިއަންކަން އަހުމަދު މައިޝާން ހޯދީ ފައިނަލުގައި ސީދާ ދެ ސެޓުން މީކާއިލް ބިން މަދަދުﷲ ބަލިކޮށްފައެވެ.

މި ފަހަރުގެ މުބާރާތުގެ ސީނިއާ އަންހެން ޑަބަލްސް ޗެމްޕިއަނުންނަކީ އައިމިނަތު ވިދާދް އާއި އާމިނަތު ސިޔާމާގެ ޕެއާ އެވެ. ވިދާދް އާއި ސިޔާމާގެ ޕެއާ ވަނީ ސީދާ ދެ ސެޓުން އާމިނަތު ވިޝާމާ އާއި އާމިނަތު ޖުނާނާގެ ޕެއާ ބަލިކޮށްފައެވެ.

ފިރިހެން ޑަބަލްސް ޗެމްޕިއަންކަން އިސްމާއިލް އަޒްމީން އާއި ހުސައިން ފާރިހްގެ ޕެއާ ހޯދީ ސީދާ ދެ ސެޓުން މުޙައްމަދު މުންތަސިރު އާއި އަހުމަދު މުޝްރިފްގެ ޕެއާ ބަލިކޮށްގެންނެވެ.

މި މުބާރާތުގައި މިރޭ ކުޅުމަށް ހަމަޖެހިފައިވަނީ އޯޕަން ސިންގަލްސް ފައިނަލުގެ އިތުރުން ސީނިއާ ފިރިހެން ސިންގަލްސް މެޗުތަކެވެ.