އިޓާލިއަން ލީގުގައި އިއްޔެ ކުޅުނު މެޗުގައި ކޯމޯ އަތުން 2-1 އިން ބަލިވެ، ނަޕޯލީ އަށް ލީގު ރޭހުގައި މައްސަލަތައް ކުރިމަތިވެއްޖެއެވެ.

މި ނަތީޖާއާއެކު، ލީގުގެ އެއްވަނައިގައި އަދިވެސް އުޅެނީ އިންޓަރ މިލާނެވެ. އިންޓަރ އަށް 26 މެޗުން ލިބިފައިވަނީ 57 ޕޮއިންޓެވެ. އެއް ޕޮއިންޓް ފަހަތުން ދެވަނައިގައި ނަޕޯލީ އޮތްއިރު، ތިންވަނައިގައި އޮތް އެޓަލާންޓާ އަށް ލިބިފައިވަނީ 54 ޕޮއިންޓެވެ. ޔުވެންޓަސް އޮތީ 49 ޕޮއިންޓާއެކު ހަތަރު ވަނައިގައެވެ.

ކޯމޯގެ ދަނޑުގައި ކުޅުނު މެޗުގައި އެ ޓީމުން ޖެހި ދެ ލަނޑުގެ ތެރެއިން އެއް ގޯލަކީ ނަޕޯލީގެ އާމިރު ރަހްމާނީ އަތުން ބައިކޮޅަށް ވަތް ލަނޑެކެވެ. އެ ޓީމުގެ އަނެއް ލަނޑު ޖަހައިދިނީ އަސާނޭ ޑިއާއޯ އެވެ.

ނަޕޯލީގެ ހަމައެކަނި ލަނޑުޖެހީ ޖިއަކޮމޯ ރަސްޕަޑޯރީ އެވެ.

މި މެޗުން ހޯދި މޮޅާއެކު ކޯމޯ ވަނީ 13 ވަނަ އަށް ކުރިއަށް ޖެހިލައިފައެވެ. އެ ޓީމަށް ލިބިފައިވަނީ 28 ޕޮއިންޓެވެ.

މި މުބާރާތުގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ރަށުން ބޭރުގައި ކަލިއާރީ އަތުން 1-0 އިން ޔުވެންޓަސް ވަނީ މޮޅުވެފައެވެ. އެމްޕޯލީގެ ދަނޑުގައި އެ ޓީމު އަތުން އެޓަލާންޓާ މޮޅުވީ 5-0 އިންނެވެ.