ޖަރުމަނުގެ އާންމު އިންތިޚާބު، އެ ޤައުމުގެ އިދިކޮޅު ކޮންޒަރވެޓިވް ޕާޓީން ބޮޑު އަޣުލަބިއްޔަތުން ކާމިޔާބުކޮށްފިއެވެ.

އެއާ އެކު، ޖަރުމަނުގެ ޗާންސެލަރުގެ މަޤާމަށް ދެން ވަޑައިގަންނަވާނީ، އެ ޕާޓީގެ ލީޑަރު ފްރީޑްރިކް މަރޓްޒްއެވެ.

މަރޓްޒް، 69 އަށް ކުރިމަތިވެވަޑައިގަންނަވާނީ، އިންތިޚާބުުގައި ބައިވެރިވި އެހެން ޕާޓީތަކާ ގުޅިގެން ވެރިކަން ކުރާ އިއްތިޙާދެއް އެކުލަވައިލުމުގެ އުނދަގޫ މަސައްކަތެވެ.

އިންތިޚާބުގައި ދެވަނައަށް އެންމެ ބޮޑު ކާމިޔާބީއެއް ހޯދާފައި ވަނީ ކަނާތު ފިޔައިގެ ހަރުކަށި ސިޔާސަތުތަކަށް ތާއީދުކުރާ އިދިކޮޅު ޕާޓީ އޮލްޓަރނެޓިވް ފޯރ ޖަރމަނީ (އޭއެފްޑީ) އެވެ. ނަމަވެސް، އިއްތިޙާދުގައި ބައިވެރިވުމުގެ ފުރުޞަތު އެ ޕާޓީއަށް ނުދޭނެ ކަމުގައި މަރޓްޒް ވަނީ ވިދާޅުވެފައެވެ.

އިންތިޚާބުގެ ނަތީޖާއަށް ބަލައި އިރު، މެޔަޓްޒްގެ ސީޑީޔޫއާއި ކްރިސްޓިޔަން ސޯޝަލް ޔޫނިއަން (ސީއެސްޔޫ) އިއްތިޙާދުން ވަނީ 28.5 އިންސައްތަ ވޯޓު ކާމިޔާބު ކޮށްފައެވެ. އިދިކޮޅު އޭއެފްޑީއަށް ތާއީދުކޮށްފައި ވަނީ އިންތިޚާބުގައި ވޯޓުލާފައިވާ މީހުންގެ ތެރެއިން 20.5 އިންސައްތަ މީހުންނެވެ. ނަމަވެސް މިއީ، އޭއެފްޑީން ހޯދާފައިވާ ބޮޑު ކާމިޔާބީއެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ދެކެއެވެ.

މިހާރުގެ ޗާންސެލަރު އޯލާފް ޝޯލްޓްޒްގެ ސޯޝަލް ޑިމޮކްރެޓްސް (އެސްޕީޑީ) އަށް ލިބިފައި ވަނީ 16.5 އިންސައްތަ ވޯޓެވެ.

އިންތިޚާބު ކާމިޔާބުކުރެއްވުމާ އެކު، އެމެރިކާއިން ގެންގުޅޭ ހަރުކަށި ސިޔާސަތުތަކުން މުޅި ދުނިޔެ ހަމަނުޖެހުމަކަށް ވައްޓާލާފައިވާ ކަމަށް ވިދާޅުވެ، މުޅި ޔޫރަޕު އެކަތިގަނޑަކަށް ހެއްދެވުމަށް މަރޓްޒް ވަނީ އަމާޒު ހިއްޕަވައިފައެވެ.

"އަޅުގަނޑުމެން [ޔޫރަޕަށް] ދުނިޔެ މަޑެއް ނުކުރާނެ،" މަރޓްޒް ވިދާޅުވިއެވެ.