ENGLISH

04 އޭޕްރީލު 2025

Advertisement

ޔޫކްރޭނަށް ނޭޓޯގެ މެމްބަރުކަން ދޭނަމަ، ރައީސްކަމުން އިސްތިޢުފާ ދެއްވަން ޒެލެންސްކީ ތައްޔާރު

24 ފެބްރުއަރީ 2025

|

ހަސަން އާމިރު

ޔުކްރޭނުގެ ރައީސް ޒެލެންސްކީ.

ނޭޓޯގެ އަސްކަރީ އިއްތިހާދުގެ މެމްބަރުކަން ޔޫކްރޭނަށް ދޭނަމަ، އެ ޤައުމުގެ ރައީސްކަމުން އިސްތިޢުފާ ދެއްވަން ވެސް ތައްޔާރަށް ހުންނެވި ކަމަށް ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ވިދާޅުވެއްޖެއެވެ.

މީގެ ތިން އަހަރެއްހާ ދުވަސް ކުރިން ރަޝިޔާއާ ދެކޮޅަށް ހަނގުރާމަ ފެށި ފަހުން، ނޭޓޯގެ މެމްބަރަކަށް ޔޫކްރޭނު ހެދުމަށް ޒެލެންސްކީ ގެންދަވަނީ ހުއްޓުމެއް ނެތި ވަކާލާތު ކުރައްވަމުންނެވެ.

ނަމަވެސް، އެކަމަށް އެންމެ ބޮޑަށް ދެކޮޅު ހަދަމުންދަނީ އެމެރިކާއިންނެވެ.

ޒެލެންސްކީ އަކީ "ޑިކްޓޭޓަރެއް" ނޫނީ ޚުދުމުހުތާރު ވެރިއެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ސިފަކުރައްވާފައިވަނިކޮށް، ޔޫކްރޭނަށް ނޭޓޯގެ މެމްބަރުކަން ދިނުމުގެ ބަދަލަކީ، ރައީސްކަމުން އިސްތިޢުފާ ދެއްވުން ކަމަށްވަނީނަމަ، އެކަން ކުރައްވަން ތައްޔާރަށް ހުންނެވި ކަމަށް ޒެލެންސްކީ ވިދާޅުވިއެވެ.

"ޔޫކްރޭނަށް ސުލްޙަ އާއި ހަމަޖެހުން ގެނައުމަށްޓަކައި، އަޅުގަނޑު މި މަޤާމުން ދުރަށްދާން އެދޭނަމަ، އެކަން ކުރަން މިހުރީ ތައްޔާރަށް،" ޒެލެންސްކީ ނޫސްވެރިންނަށް ވިދާޅުވިއެވެ. "އެއީ ނެޓޯގެ މެމްބަރުކަމުގެ ބަދަލެއްގެ ގޮތުން."

ޔޫކްރޭންއާ ދެކޮޅަށް ކުރަމުންދާ ހަނގުރާމަ ހުއްޓާލައި، ސުލްޙަ ޤާއިމުކުރުމުގެ މަޝްވަރާއަށް ރަޝިޔާގެ ރައީސް ވްލޮޑޮމިޔަރ ޕޫޓިންއާ ސަޢުދީ އަރަބިއްޔާގައި ބައްދަލުކުރައްވަން ހަމަޖެހިފައިވާ ކަމަށް ޓްރަމްޕް ވިދާޅުވި ފަހުން، ޔޫކްރޭނުގެ ހިތްހަމަނުޖެހުމާއި ނުތަނަވަސްކަން ވަނީ ބޮޑުވެފައެވެ.

އެއާ އެކު ދެ ރައީސުންގެ ދެމެދު ބަހުގެ ޙަމަލާތައް ވެސް ބަދަލުކުރުން ވަނީ އިތުރުވެފައެވެ.

ޒެލެންސްކީ ވިދާޅުވި ގޮތުގައި، ޕޫޓިން އާ ޓްރަމްޕް ބައްދަލުކުރެއްވުމުގެ ކުރިން، ޓްރަމްޕް އާ ބައްދަލުކުރައްވަން ބޭނުންފުޅުވެއެވެ.

މި މަސް ނިމުމުގެ ކުރިން، ޕޫޓިންއާ ބައްދަލުކުރައްވާނެ ކަމުގެ އިޝާރާތެއް ވެސް ޓްރަމްޕް ވަނީ ދެއްވައިފައެވެ.

ހަނގުރާމަ ނިންމުމަށްޓަކައި ޒެލެންސްކީ އާ މަޝްވަރާ ކުރަން ރަޝިޔާއިން ދެކޮޅު ހަދަނީ އޭނާގެ ރައީސްކަމުގެ ދައުރު ހަމަވެ، ހައިސިއްޔަތެއް ނެތް ކަމަށް ބުނެއެވެ.

ޕޫޓިން ޤަބޫލުކުރައްވާ ގޮތުގައި، ޔޫކްރޭނުގައި ކުއްލި ޙާލަތު އިޢުލާނުކޮށް، ވެރިކަމުގެ ދައުރު ހަމަވިފަހުން ވެސް ޒެލެންސްކީ ރައީސްކަމުގައި ހުންނެވީ ޤާނޫނާ ޚިލާފަށެވެ.

އެކަމަށް ބާރުދޭ ރާގަކަށް ޓްރަމްޕް ވެސް ވަނީ ވާހަކަ ދައްކަވައިފަ އެވެ.

ޓްރަމްޕް ވިދާޅުވި ގޮތުގައި، އިންތިޚާބެއް ނުބާއްވާ ވަރަށް ގިނަ ދުވަސްވެފައިވާތީ، ޒެލެންސްކީއަށް ޔޫކްރޭނުގެ ރައްޔިތުން ތަމްޞީލުކުރެއްވޭނެ ކަމާމެދު ވެސް ވަނީ ސުވާލު އުފެދިފައެވެ.

މީގެއިތުރުން، ހަނގުރާމަ ފަށަން މެދުވެރިވީ ޒެލެންސްކީގެ ސަބަބުން ކަމަށް ޓްރަމްޕް ވަނީ ނުސީދާކޮށް ވިދާޅުވެފައެވެ.

ކިޔުންތެރިންގެ ހިޔާލު