ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމާ އިޒްރޭލުން ޚިލާފުވެ، ޙަމާސް ޖަމާޢަތުން އިއްޔެ މިނިވަންކުރި އަސީރުންގެ ބަދަލުގައި، އިޒްރޭލުގެ ޖަލުތަކުގައި ތިބި ފަލަސްތީނުގެ ޤައިދީން މިނިވަންކުރަން ޔަހޫދީ ދައުލަތް ދެކޮޅު ހަދައިފިއެވެ.

ޙަމާސް އާއި އިޒްރޭލާ ދެމެދު ޢަމަލު ކުރަމުންދާ އެއްބަސްވުމާ އެއްގޮތަށް އިއްޔެ ވަނީ ހަ އަސީރުން މިނިވަންކޮށްފައެވެ. އެއީ، އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނެފައިވާ ދިރިތިބި އަސީރުންގެ ތެރެއިން އެންމެ ފަހު ގުރޫޕެވެ.

އޭގެ ބަދަލުގައި އިޒްރޭލުގެ ޖަލުތަކުން 620 ޤައިދީން މިނިވަންކުރަން އޮތީ އެއްބަސްވެފައެވެ. ނަމަވެސް، އަސީރުން އިޒްރޭލާ ޙަވާލުކުރިފަހުން، ޤައިދީން މިނިވަންކުރުން ފަސްކޮށްފައިވާ ކަމަށް އިޒްރޭލުން ބުންޏެވެ.

އެކަމުގެ ބަހަނާއަކީ އަސީރުން މިނިވަންކުރަން ޙަމާސްއިން ބާއްވަމުންދާ ރަސްމިއްޔާތުތަކެވެ. އަދި އެކަން ހުއްޓައިލަން އެއްބަސްވުމުގެ ކުރިން ޤައިދީން މިނިވަންކުރުން ފަސްކޮށްފައިވާ ކަމަށް އިޒްރޭލުން ބުންޏެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކަ އެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެ އެއްބަސްވުމުގެ ފުރަތަމަ ފިޔަވަހީގެ ދަށުން، މިހާތަނަށް 25 ރަހީނަކާއި 1،100 ޤައިދީން ވަނީ މިނިވަންކޮށްފައެވެ.

އެ ޖަމާޢަތުގެ ބެލުމުގެ ދަށުގައި އަދިވެސް އިތުރު 63 އަސީރުން ތިބި ކަމަށް ބެލެވޭއިރު، އޭގެ ތެރެއިން ގިނަ އަދަދެއްގެ ބަޔަކު ޔަހޫދީންގެ ޢުދުވާނީ ޙަމަލާތަކުގައި މަރުވެފައިވާ ކަމުގައި ޙަމާސް އިން ވަނީ ބުނެފައެވެ.