އެންބީއޭގައި މިއަދު ކުޅުނު މެޗުގައި ލޮސް އެންޖެލިސް ލޭކާސް އަތުން 123-100 ޕޮއިންޓްގެ ތަފާތަކުން ޑެންވާ ނަގެޓްސް ބަލިވެއްޖެއެވެ.

މިއީ ލީގުގައި އެންމެ ފަހުން ކުޅުނު ދިހަ މެޗުގެ ތެރެއިން ނަގެޓްސް ބަލިވި ފުރަތަމަ ފަހަރެވެ. އަނެއްކޮޅުން، މިއީ ޑެންވާގައި ނަގެޓްސް އަތުން އެންމެ ފަހުން ކުޅުނު 14 މެޗުގެ ތެރެއިން ލޭކާސް މޮޅުވި ފުރަތަމަ ފަހަރު ވެސް މެއެވެ.

ޑެންވާގައި ހުންނަ ބޯލް އެރީނާގައި ކުޅުނު މި މެޗުގެ ތިންވަނަ ކުއާޓާރ ފިޔަވައި އެހެން ހުރިހާ ކުއާޓާއެއްގައި ކުރިހޯދީ ލޭކާސް އިންނެވެ. އެ ޓީމުން މެޗުގެ ފުރަތަމަ ކުއާޓާގައި 38-31 އިން ކުރިހޯދިއިރު، ދެންޖެހިގެން އައި ކުއާޓާ ނިންމާލީ 25-23 އިން ކުރީގައި އޮވެގެންނެވެ.

މެޗުގެ ތިންވަނަ ކުއާޓާގައި ދެ ޓީމު 33-33 އިން އެއްވަރުވިއިރު، ލޭކާސް އިން ވަނީ ފަހު ކުއާޓާގައި 27-13 އިން ކުރިހޯދައި، މެޗުން ވެސް 23 ޕޮއިންޓްގެ ފަރަގަކާ އެކު މޮޅުވެފައެވެ.

މި މެޗުން ލޭކާސް މޮޅުކޮށްދިނުމުގައި އިސްދައުރެއް އަދާކުރީ ޑަލާސް މޭވްރިކްސް އިން އެ ޓީމަށް ބަދަލުވި ލޫކާ ޑޮންޗިޗް އެވެ. ލޫކާ ވަނީ 32 ޕޮއިންޓާއެކު، 10 ރީބައުންޑްނަގައި، ޑަބަލް-ޑަބަލްއެއް ފުރިހަމަކޮށްފައެވެ. ދެން އެންމެ ރަނގަޅަށް ކުޅުނު ލެބްރޮން ޖޭމްސް ވަނީ 25 ޕޮއިންޓް އެއްކޮށްފައެވެ.

ނަގެޓްސް އަށް އެންމެ ގިނަ ޕޮއިންޓް އެއްކޮށްދިނި އާރޮން ގޯޑަން އެވެ. ގޯޑަން ވަނީ 24 ޕޮއިންޓް އެއްކޮށްފައެވެ. އެ ޓީމުގެ ނިކޮލާ ޔޮކިޗް ވަނީ 12 ޕޮއިންޓާއެކު، 10 އެސިސްޓް ހަދައި، 13 ރީބައުންޑް ނަގައި، ޓްރިޕަލް-ޑަބަލްއެއް ފުރިހަމަކޮށްފައެވެ.

މި މުބާރާތުގައި މިއަދު ކުޅުނު އެހެން މެޗުތަކުގެ ނަތީޖާއަށް ބަލާއިރު، ފީނިކްސް ސަންސް ވަނީ 121-117 އިން ޝިކާގޯ ބުލްސް ބަލިކޮށްފައެވެ. ޔޫޓާ ޖޭޒް އަތުން 124-115 އިން ހިއުސްޓަން ރޮކެޓްސް ބަލިވިއިރު، ފިލަޑެލްފިއާ ސެވަންޓީސިކްސަރސް އަތުން ބްރޫކްލިން ނެޓްސް މޮޅުވީ 105-103 އިންނެވެ.