އިނގިރޭސި ޕްރިމިއަރ ލީގުގައި ރޭ ކުޅުނު މެޗުތަކުން ޗެލްސީ އާއި އާސެނަލް ބަލިވިއިރު، މެންޗެސްޓަރ ޔުނައިޓެޑް ކުޅުނު މެޗު އެއްވަރުވެއްޖެއެވެ.

އެސްޓަން ވިލާގެ ދަނޑުގައި ޗެލްސީ ބަލިވީ 2-1 އިންނެވެ. އާސެނަލްގެ ދަނޑުގައި ވެސްޓް ހޭމް ޔުނައިޓެޑް އަތުން އެ ޓީމު 1-0 އިން ބަލިވިއިރު، އެވަޓަންގެ ދަނޑުގައި 2-2 އިން ޔުނައިޓެޑް ވަނީ އެއްވަރުވެފައެވެ.

މި ނަތީޖާއާއެކު، ތާވަލްގެ ކުރީގައި އުޅޭ ލިވަޕޫލާ ދެމެދު އޮތް ފަރަގު ކުޑަކުރަން އާސެނަލަށް ލިބުނު ފުރުޞަތު ވަނީ ގެއްލިފައެވެ. އެއްވަނައިގައި ލިވަޕޫލް އޮތީ 26 މެޗުން 61 ޕޮއިންޓް ހޯދައިގެންނެވެ. އާސެނަލް ދެވަނައިގައި އޮތީ 53 ޕޮއިންޓާއެކު އެވެ. ތިންވަނައިގައި ނޮޓިންގހަމް ފޮރެސްޓް އޮތީ 47 ޕޮއިންޓް ހަމަކޮށްގެންނެވެ.

ވިލާ ޕާކުގައި ކުޅުނު މެޗުގެ ފުރަތަމަ ހާފުގެ ކުރީކޮޅު ލީޑު ނެގީ ޗެލްސީންނެވެ. އެ ޓީމަށް މި ލަނޑު ޖަހައިދިނީ އެންޒޯ ފެނާންޑޭޒް އެވެ. މި ގޯލާއެކު އެ ޓީމު ފުރަތަމަ ހާފު ނިންމާލީ 1-0 އިން ކުރީގައި އޮވެގެންނެވެ. 

ދެވަނަ ހާފުގެ ކުރީކޮޅު، ވިލާ އަށް އެއްވަރުކޮށްދިނީ މާކޯ އަސެންސިއޯ އެވެ. އަދި އޭގެފަހުން، މެޗު ނިމެން މިނެޓަކަށްވެފައިވަނިކޮށް، ވިލާ މޮޅުވި ލަނޑު ޖެހީ ވެސް އަސެންސިއޯ އެވެ. މި ދެ ލަނޑު ޖެހުމަށް އެހީތެރިވެދިނީ ވެސް މާކަސް ރަޝްފޯޑެވެ.

މި މެޗުން ބަލިވި ޗެލްސީ އޮތީ ހަވަނައިގައެވެ. އެ ޓީމަށް ލިބިފައިވަނީ 43 ޕޮއިންޓެވެ. ވިލާ ވަނީ އެއް މެޗު އިތުރަށް ކުޅެގެން 42 ޕޮއިންޓް ހަމަކޮށް، ހަތްވަނަ އަށް ކުރިއަށް ޖެހިލައިފައެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު، ފުރަތަމަ ހާފު ނިމެންދަނިކޮށް ވެސްޓް ހޭމަށް ކާމިޔާބުކޮށްދިނީ ޖަރޮޑް ބޮވެން އެވެ. އޭގެފަހުން، މެޗުގެ 73 ވަނަ މިނެޓުގައި މައިލްސް ލުވިސް-ސްކެލީ އަށް ސީދާ ރަތް ކާޑު ދެއްކުމުން އާސެނަލް ބާކީބައި ފުރިހަމަކުރީ އެއް ކުޅުންތެރިއަކު މަދުކޮށެވެ.

މުބާރާތުގައި އިއްޔެ ކުޅުނު އަނެއް މެޗުގައި އެވަޓަންގެ ބެޓޯ އާއި އަބްދުލާޔޭ ޑުކޫރޭ ވައްދާލި ލަނޑުތަކުން ލީޑު ނަގާފައިވަނިކޮށް، ފަހު ހާފުގެ 8 މިނެޓުގެ ތެރޭގައި ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އާއި މެނުއަލް އުގާޓޭ ޖެހި ގޯލުން ވަނީ އެއްވަރުކޮށްފައެވެ.