ޕެރޫގެ ޝޮޕިންގ މޯލެއްގެ ތެރޭގައި ހުރި ފުޑް ކޯޓު ސަރަޙައްދުގެ ފުރާޅު ވެއްޓި ހިނގި ހާދިސާގައި މަރުވި މީހުންގެ އަދަދު ހަ އަކަށް އަރައިފިއެވެ.

މި ހާދިސާގައި 78 މީހަކު ޒަޚަމްވެފައިވާއިރު އޭގެ ތެރޭގައި 10 ކުޑަކުދިން ހިމެނޭކަމަށް ފުލުހުން ވަނީ ބުނެފައެވެ.

މި ހާދިސާ ހިނގާފައިވަނީ ޕެރޫގެ އާބާދީ ބޮޑު ޓްރުޖިލޯ ސަރަޙައްދުގައި ހުރި ރިއަލް ޕްލާޒާ ޝޮޕިން މޯލްގައެވެ.

ފުރާޅު ވެއްޓުނު ވަގުތު، ފުޑް ކޯޓުގައި ގިނަ ބަޔަކު ކާންތިބި ކަމަށް ރިޕޯޓުތައް ބުންޏެވެ.

ވެއްޓިފައިވާ ފުރާޅުގެ ބައިތަކުގެ ދަށުން މީހުން ހޯދުމުގެ މަސައްކަތް އަދިވެސް ދަނީ ކުރަމުންނެވެ.

ޕެރޫގެ ޑިފެންސް މިނިސްޓަރު ވޯލްޓަރ އަސްޓުޑިލޯ ވިދާޅުވީ ޒަޚަމްވި މީހުންގެ ތެރެއިން 48 މީހަކަށް ހޮސްޕިޓަލުގައި ފަރުވާދެމުންދާއިރު، އޭގެތެރެއިން ތިން މީހެއްގެ ހާލު ސީރިއަސް ކަމަށެވެ.

އެ ފުޑް ކޯޓުގެ ފުރާޅު ވެއްޓެން މެދުވެރިވި ސަބަބެއް އަދި ސާފެއް ނޫނެވެ.

ނަމަވެސް، އެތަނުގެ ގާތްގަނޑަކަށް 8،600 އަކަފޫޓުގެ ބޮޑު ބައެއް ވެއްޓިފައިވާ ކަމަށް ކަމާގުޅޭ އިދާރާތަކުން ވަނީ ލަފާކޮށްފައެވެ.