އިޒްރޭލުން އިސްތިޢުމާރު ކޮށްފައިވާ ހުޅަނގު އައްސޭރީގައި އިޒްރޭލު ސިފައިންގެ ޢުދުވާނުތައް ވަރުގަދަކުރަން ޔަހޫދީންގެ ލީޑަރު ބެންޖަމިން ނަތަންޔާހޫ އަންގައިފިއެވެ.

އެ ސަރަޙައްދުގައި ތިބި އިޒްރޭލު ސިފައިންނާ ބައްދަލުކުރަން ނަތަންޔާހޫ ދިޔައީ، އިޒްރޭލުގައި ބަސްތަކެއްގައި ބޮން ގޮއްވައިގެން ދިން ޙަމަލާތަކަށްފަހުއެވެ.

ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމަށް މިދިޔަ މަހުގެ 19 ގައި ޢަމަލުކުރަން ފެށުމާއެކު، އިޒްރޭލު ސިފައިން ހުޅަނގު އައްސޭރިއަށް ދޭ ޙަމަލާތައް ވަނީ ވަރުގަދަކޮށްފައެވެ.

އެ އޮޕަރޭޝަން ފެށި ފަހުން، މިހާތަނަށް ފަލަސްތީނުގެ 51 މީހުން މަރުވެފައިވާ ކަމަށް އދ.އިން ވަނީ ބުނެފައެވެ. އޭގެތެރޭގައި ހަތް ކުޑަކުދިން ވެސް ހިމެނެއެވެ.

އިޒްރޭލުގެ އަނިޔާވެރިކަން ހުޅަނގު އައްސޭރިއަށް ވެސް ފުޅާކޮށްފައިވަނީ، ޙަމާސް ޖަމާޢަތުގެ ހަނގުރާމަވެރިން ނައްތައިލުމުގެ ނަމުގައެވެ.

ޙަމާސް އާއި އިޒްރޭލާ ދެމެދު 2023 ގެ އޮކްޓޯބަރުގައި ހަނގުރާމަ ފެށުނު ފަހުން، ޣައްޒާގެ އިތުރުން ހުޅަނގު އައްސޭރީގައި ވެސް ޔަހޫދީ ސިފައިންގެ އަނިޔާވެރިކަން ވަނީ އިތުރުވެފައެވެ.