ފަލަސްތީނުގެ ޣައްޒާ އަލުން ބިނާކުރުމުގެ ޕްލޭނެއް އެކުލަވައިލުމާ ގުޅޭގޮތުން، އަރަބި ޤައުމުތަކުގެ ލީޑަރުން އިއްޔެ ސައުދީ އަރަބިއްޔާގައި ބައްދަލުކުރައްވައިފިއެވެ.

ޣައްޒާ އަލުން ބިނާކުރުމުގެ ޕްލޭނެއް އެކުލަވައިލަން އަރަބި ޤައުމުތަކުން އިސްނެގީ، ޣައްޒާ އަމިއްލަކޮށްލައި، އެތަން ތަރައްޤީ ކުރަން، އެތަނުގައި ދިރިއުޅޭ 2.4 މިލިއަނެއްހާ ފަލަސްތީނުގެ ރައްޔިތުން ބާލަން އެމެރިކާ ރައީސް ޑޮނަލްޑް ޓްރަމްޕް ކުއްލި ގޮތަކަށް ހުށަހެޅުއްވުމުންނެވެ.

ޓްރަމްޕްގެ އެ ޕްލޭންގައި ޣައްޒާގެ ރައްޔިތުން އަރަބި ބައެއް ޤައުމުތަކަށް ގެންދިޔުން ހިމެނެއެވެ.

ނަމަވެސް، އަރަބި ޤައުމުތަކުން ވަނީ ޓްރަމްޕްގެ އެ ޕްލޭނަށް ނޫނެކޭ ބުނެފައެވެ. އަދި ޣައްޒާގެ ރައްޔިތުން އަމިއްލަ ވަޒަނުން ބޭރުކުރާ އެއްވެސް ޕްލޭނަކަށް ތާއީދުނުކުރާނެ ކަމަށް ވެސް އެ ޤައުމުތަކުން ވަނީ ބުނެފައެވެ.

ސައުދީގައި އިއްޔެ ބޭއްވި އެ ބައްދަލުވުމަށްފަހު އާންމުކުރި ފޮޓޯގައި، ސައުދީގެ ވަލީއުލް އަހުދު މުޙައްމަދު ބިން ސަލްމާންގެ އަރިހުގައި، މިޞްރު، ބަހްރެއިން، ޖޯޑަން، ކުވެއިތު، ޤަތަރު އަދި ޔޫއޭއީގެ ލީޑަރުން ތިއްބެވިއެވެ.

ސައުދީގެ ދަޢުލަތުގެ މީޑިޔާއިން ބުނީ މި ބައްދަލުވުމުގައި ޣައްޒާ އާއި ފަލަސްތީނުގެ ހައްޤުތަކުގެ އިތުރުން ސަރަޙައްދީ އަދި ބައިނަލްއަޤުވާމީ މަސްރަޙާ ގުޅޭގޮތުން ވެސް ލީޑަރުން މަޝްވަރާކުރެއްވި ކަމަށެވެ.

ނަމަވެސް، މި މަޝްވަރާތަކުގެ ތަފްޞީލެއް ހާމަ ނުކުރާނެކަމަށް ވަނީ ބުނެފައެވެ.