މޯލްޑިވްސް ޕޫލް ބިލިއާޑް އެސޯސިއޭޝަން (އެމްބީޕީއޭ) އިން ބޭއްވި 12 ވަނަ އިންޓަރ އޮފީސް ބިލިއާޑް މުބާރާތުގެ ޓީމު އިވެންޓްގެ އަންހެން ޑިވިޝަނުގެ ޗެމްޕިއަންކަން ބީއެމްއެލް އަދި ފިރިހެން ޑިވިޝަނުގެ ޗެމްޕިއަންކަން ސްޓެލްކޯ  ހޯދައިފިއެވެ.

މުބާރާތުގެ ޓީމު އިވެންޓް ބައިގެ އަންހެން ޑިވިޝަނުގެ ޗެމްޕިއަންކަން ބީއެމްއެލް އިން ހޯދީ ފައިނަލުގައި އެސްޓީއޯ ބަލިކޮށްގެންނެވެ. ބީއެމްއެލް އިން މެޗު ކާމިޔާބުކުރީ 2-1 ގޭމުންނެވެ.

ފިރިހެން ޑިވިޝަނުގެ ޓީމު އިވެންޓް ފައިނަލުގައި ސްޓެލްކޯ އިން އެމްއައިބީގެ މައްޗަށް ކުރިހޯދީ ވެސް 2-1 ގޭމުންނެވެ.

މި މުބާރާތުގައި ރޭ ކުޅުނު ޓީމު އިވެންޓްގެ ފައިނަލް މެޗުތަކަށް ފަހު، ވަނަތަކަށް ހޮވުނު ފަރާތްތަކަށް ޓްރޮފީ އާއި ސެޓްފިކެޓް ހަވާލުކޮށްދެއްވީ، ޝަރަފުވެރި މެހެމާން، ކުޅިވަރާއި ހަށިހެޔޮކަމާބެހޭ ވަޒީރު، އަބްދުﷲ ރާފިޢު އެވެ.

މި ފަހަރުގެ އިންޓަރ އޮފީސް ބިލިއާޑް މުބާރާތުގެ އަންހެން ސިންގަލްސް ޗެމްޕިއަންކަން ރައީސް އޮފީހުގެ ފަގީހާ އިބްރާހިމް ހޯދިއިރު، ފިރިހެން ސިންގަލްސް ޗެމްޕިއަންކަން ހޯދީ އެމްޕީއެލްގެ ހަސަން ޝާޒް މުޙައްމަދު އެވެ. ދެވަނަ ޑިވިޝަނުގެ ޗެމްޕިއަންކަން ހޯދީ އެމްއެންޑީއެފްގެ ހުސެއިން ސާޖިދުﷲ އެވެ.