ރަޝިޔާއާ ދެކޮޅަށް ކުރަމުންދާ ހަނގުރާމައިގައި އެމެރިކާއިން ފޯރުކޮށްދީފައިވާ އަސްކަރީ އެހީގެ އަގު އަދާކުރަން، ޔޫކްރޭނުގެ އަގުބޮޑު މައުދަނުތައް ދިނުމުގެ އެއްބަސްވުމަކަށް އެމެރިކާއިން ޔޫކްރޭނަށް ކުރަމުންދާ ޕްރެޝަރު އިތުރަށް ވަރުގަދަކޮށްފިއެވެ.

ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ އަކީ "ޑިކްޓޭޓަރެއް"ގެ ގޮތުގައި ސިފަކުރައްވައި، އެމެރިކާގެ ރައީސް ޑޮނަލްޑް ޓްރަމްޕް ފާޑުވިދާޅުވުން ހަރުކަށި ކޮށްފައިވަނީ އެ އެއްބަސްވުމަށް ބާރުއެޅުމަށް ކަމަށް މަސްރަޙް ދިރާސާކުރާ ފަރާތްތަކުން ދަނީ ބުނަމުންނެވެ.

ނަމަވެސް، އެފަދަ އެއްބަސްވުމުގެ ދަށުން ޔޫކްރޭނަށް ސަލާމަތީ ގޮތުން ފޯރުކޮށްދޭނެ ޔަޤީންކަމެއް ސާފުނުވާ ކަމަށް ވިދާޅުވެ، ޒެލެންސްކީ ގެންދަވަނީ މަޝްވަރާ ކުރައްވަން ވެސް ދެކޮޅު ހައްދަވަމުންނެވެ.

"މަޝްވަރާގެ މޭޒަށް އެނބުރި އަންނަން އެބަޖެހޭ،" ޒެލެންސްކީ އަށް ނިސްބަތް ކުރައްވައި، އެމެރިކާގެ ނެޝަނަލް ސެކިޔުރިޓީ އެޑްވައިޒަރު މައިކް ވޯލްޓްޒް އިއްޔެ ނޫސްވެރިންނަށް ވިދާޅުވިއެވެ.

"ރައީސް ޓްރަމްޕް މި ވަގުތު ވަރަށް ހިތްހަމަނުޖެހިވަޑައިގެންފައި ހުންނެވިކަން ސާފުކޮށް އެނގޭ ރައީސް ޒެލެންސްކީއާ މެދު. މަޝްވަރާގެ މޭޒަށް ވަޑައިނުގަތް އަޅުގަނޑުމެން ދީފައި މި އޮތް ފުރުޞަތުގެ ބޭނުން ނުހިއްޕަވާތީ،" ވޯލްޓްޒް ވިދާޅުވިއެވެ.

ވޯލްޓްޒް މިގޮތަށް ވިދާޅުވެފައިވަނީ، ޔޫކްރޭނުގައި މިވަގުތު ހުންނެވި އެމެރިކާއިން އެ ޤައުމަށް ކަނޑައަޅާފައިވާ ޚާއްސަ މަންދޫބު ކީތު ކެލޮގް، ޒެލެންސްކީ އާ އެކު ގުޅިގެން ބާއްވަން ހަމަޖެހިފައި އޮތް ނޫސްވެރިންގެ ބައްދަލުވުން ކެންސަލް ކުރިތާ ކުޑަވަގުތުކޮޅެއްގެ ތެރޭގައެވެ.

ޒެލެންސްކީ އާއި ކެލޮގް މަޝްވަރާ ކުރެއްވުމަށްފަހު، ނޫސްވެރިންނަށް މަޢުލޫމާތު ދޭން ހަމަޖައްސާފައި އޮތް ބައްދަލުވުން ނުބާއްވަން ނިންމީ އެމެރިކާ ސަރުކާރުގެ އެދުމުގެ މަތިން ކަމަށް ޔޫކްރޭނުން ބުންޏެވެ.

އަދި އެ މަޝްވަރާތަކުގެ ނަތީޖާއެއް ދެ ފަރާތުން ވެސް ހާމަކޮށްފައެއް ނުވެއެވެ.

އެ މަޝްވަރާތަކަށްފަހު ޒެލެންސްކީ ވިދާޅުވީ، ޔޫކްރޭނުގެ ސަލާމަތާއި ރައްކާތެރިކަން ކަށަވަރުކުރުމަށް ވަރަށް ތަފްޞީލީ ގޮތެއްގައި ކެލޮގް އާ އެކު މަޝްވަރާ ކުރެއްވި ކަމަށެވެ.

"ދާއިމީ ގޮތެއްގައި ސުލްޙަ ޤައިމުކޮށް، ރަޝިޔާ އިން އެނބުރި ހަނގުރާމައަށް ނުދެވޭނެ ގޮތަކަށް މި ކަމަށް ހައްލެއް ހޯދަންޖެހޭ،" ޒެލެންސްކީ ސޯޝަލް މީޑިޔާގައި ކުރެއްވި ޕޯސްޓެއްގައި ވިދާޅުވިއެވެ.

ޔޫކްރޭންއާ ދެކޮޅަށް ކުރަމުންދާ ހަނގުރާމަ ހުއްޓާލައި، ސުލްޙަ ޤާއިމުކުރުމުގެ މަޝްވަރާއަށް ރަޝިޔާގެ ރައީސް ވްލޮޑޮމިޔަރ ޕޫޓިންއާ ސަޢުދީ އަރަބިއްޔާގައި ބައްދަލުކުރައްވަން ހަމަޖެހިފައިވާ ކަމަށް ޓްރަމްޕް ވިދާޅުވި ފަހުން، ޔޫކްރޭނުގެ ހިތްހަމަނުޖެހުމާއި ނުތަނަވަސްކަން ވަނީ ބޮޑުވެފައެވެ.

އަދި އެމެރިކާ އާއި ރަޝިޔާގެ ޚާރިޖީ އިސް ބޭފުޅުން ސަޢުދީ އަރަބިއްޔާގައި މިދިޔަ ބުދަ ދުވަހު ފެށި މަޝްވަރާތަކުގައި ޔޫކްރޭނު ބައިވެރިނުކުރުމުގެ ޝަކުވާ ޒެލެންސްކީ ވަނީ ކުރައްވައިފައެވެ.

އަދި މި މަސް ނިމުމުގެ ކުރިން، ޕޫޓިންއާ ބައްދަލުކުރައްވާނެ ކަމުގެ އިޝާރާތެއް ވެސް ޓްރަމްޕް ވަނީ ދެއްވައިފައެވެ.

ހަނގުރާމަ ނިންމުމަށްޓަކައި ޒެލެންސްކީ އާ މަޝްވަރާ ކުރަން ރަޝިޔާއިން ދެކޮޅު ހަދަނީ އޭނާގެ ރައީސްކަމުގެ ދައުރު ހަމަވެ، ހައިސިއްޔަތެއް ނެތް ކަމަށް ބުނެއެވެ.

ޕޫޓިން ޤަބޫލުކުރައްވާ ގޮތުގައި، ޔޫކްރޭނުގައި ކުއްލި ޙާލަތު އިޢުލާނުކޮށް، ވެރިކަމުގެ ދައުރު ހަމަވިފަހުން ވެސް ޒެލެންސްކީ ރައީސްކަމުގައި ހުންނެވީ ޤާނޫނާ ޚިލާފަށެވެ.

އެކަމަށް ބާރުދޭ ރާގަކަށް ޓްރަމްޕް ވެސް ވަނީ ވާހަކަ ދައްކަވައިފަ އެވެ.

ޓްރަމްޕް ވިދާޅުވި ގޮތުގައި، އިންތިޚާބެއް ނުބާއްވާ ވަރަށް ގިނަ ދުވަސްވެފައިވާތީ، ޒެލެންސްކީއަށް ޔޫކްރޭނުގެ ރައްޔިތުން ތަމްޞީލުކުރެއްވޭނެ ކަމާމެދު ވެސް ވަނީ ސުވާލު އުފެދިފައެވެ.

މީގެއިތުރުން، ހަނގުރާމަ ފަށަން މެދުވެރިވީ ޒެލެންސްކީގެ ސަބަބުން ކަމަށް ޓްރަމްޕް ވަނީ ނުސީދާކޮށް ވިދާޅުވެފައެވެ.