ENGLISH
04 އޭޕްރީލު 2025
ޣައްޒާގެ އެއްބަސްވުމުގެ ދެވަނަ ފިޔަވައްސަށް ދިޔުން ނަތަންޔާހޫ ލަސްކުރާކަމުގެ ތުހުމަތު
21 ފެބްރުއަރީ 2025
|
އެންމެ މަޤްބޫލު
ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމުގެ ދެވަނަ ފިޔަވައްސަށް ދިޔުން، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ، ގަސްތުގައި ލަސްކުރާ ކަމަށް ޙަމާސް ޖަމާޢަތުން ތުހުމަތުކޮށްފިއެވެ.
މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއްނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކަ އެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.
އެ އެއްބަސްވުމުގެ ފުރަތަމަ ފިޔަވަހީގެ ދަށުން، މިހާތަނަށް 19 ރަހީނަކާއި 1،100 ޤައިދީން ވަނީ މިނިވަންކޮށްފައެވެ.
އަދި ޙަމާސްގެ ބެލުމުގެ ދަށުގައި ތިއްބައި އިޒްރޭލުގެ ވައިގެ ޙަމަލާތަކުގައި މަރުވި ރަހީނުންގެ ތެރެއިން، ހަތަރު މީހެއްގެ ހަށިތައް ޙަމާސް އިން އިއްޔެ ވަނީ އިޒްރޭލާ ޙަވާލުކޮށްފައެވެ.
ބާކީތިބި 10 ރަހީނުންގެ ތެރެއިން، ދުނިޔޭގައި މި ވަގުތު ތިބީ ހަ މީހުން ކަމަށް ޙަމާސް އިން ވަނީ ބުނެފައެވެ. ދެވަނަ ފިޔަވަހި ފެށުމާ އެކު، އެ ހަ ރަހީނުންނާއި މަރުވި ހަތަރު ރަހީނުންގެ ހަށިތައް އެއްފަހަރާ އިޒްރޭލްއާ ޙަވާލުކުރަން ޙަމާސްއިން ވަނީ ނިންމައިފައެވެ.
އެއްބަސްވުމުގެ ފުރަތަމަ ފިޔަވަހި އަވަހަށް ނިންމައި ދެވަނަ ފިޔަވައްސަށް ދާން ޙަމާސް އިން ބޭނުންވަނީ، ޣައްޒާއަށް ކޮންމެހެން ބޭނުންޖެހިފައިވާ ބޯހިޔާވަހިކަމާއި އެހެނިހެން އިންސާނީ ވަޞީލަތްތައް ވެއްދުން އަވަސް ކުރުމަށެވެ.
ނަމަވެސް، ޙަމާސްގެ ތަރުޖަމާނު ޢަބްދުލްލަތީފް އަލް ޤަނޫ ބުނީ، ދެވަނަ ފިޔަވަހި ތަންފީޒު ކުރުމުގެ މަޝްވަރާތައް ވެސް ނުފަށައި ދިގުދަންމަނީ، ނަތަންޔާހު އިސްވެ ހުރެގެން ކަމަށެވެ.
"ދެވަނަ ފިޔަވައްސަށް ދިޔުން ނަތަންހާޔޫ ހަމަ ގަސްތުގައި ލަސްކުރަމުން ދަނީ،" އޭނާ ބުންޏެވެ.
އެކަމާ ގުޅިގެން ނޫސްވެރިން ކުރި ސުވާލުތަކަށް ޖަވާބު ދެމުން، އިޒްރޭލުގެ ޚާރިޖީ ވަޒީރު ގިޑިއަން ސާރ ބުނީ ޙަމަލާތައް ދާއހުއްޓައިލުން ދާއިމީކޮށް، އެއްބަސްވުމުގެ ދެވަނަ ފިޔަވައްސަށް ދިޔުމާ ގުޅޭ މަޝްވަރާތައް މި ހަފްތާގެ ތެރޭގައި ފެށޭނެ ކަމަށެވެ.
ތިން ފިޔަވައްސަކަށް ބަހާލާފައިވާ މި އެއްބަސްވުމުގެ ފުރަތަމަ މަރުޙަލާގައި، ޙަމާސްއިން ރަހީނުކޮށްފައިވާ މީހުންނާއި އިޒްރޭލުގެ ޖަލުތަކުގައި ތިބި ފަލަސްތީނުގެ ރައްޔިތުން މިނިވަންކުރުމުގެ އިތުރުން، ޣައްޒާގައި އާންމުން ދިރިއުޅޭ ސަރަޙައްދުތަކުން އިޒްރޭލު ސިފައިން ފޭބުން ހިމެނެއެވެ.
ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.
މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލް ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.
މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.
ޣައްޒާ އަލުން ބިނާ ކުރުމަށް ސަޢުދީ އަރަބިއްޔާ އިސްވެ، މިޞްރާއި، ޖޯޑަން އަދި ޤަތަރުގެ އިސްވެރިންނާ އެކު މިއަދުގެ ވަގުތެއްގައި މަޝްވަރާތައް ފެށުމަށް ވަނީ ހަމަޖެހިފައެވެ.
މީގެއިތުރުން، އަންނަ މާޗް މަހުގެ ހަތަރު ވަނަ ދުވަހު، މިޞްރުން ވަނީ ޣައްޒާ އާ ގުޅޭގޮތުން އަރަބި ލީގުގެ ބައްދަލުވުމެއް ތާވަލުކޮށްފައެވެ.
މި ބައްދަލުވުންތަކުގައި ޣައްޒާއިން ފަލަސްތީނުގެ ރައްޔިތުން ބައިތިއްބައިގެން، އެތަން އަލުން ބިނާކުރުމުގެ މަޝްވަރާތައް ކުރެވޭނެއެވެ.
ޣައްޒާ އަލުން ބިނާކުރަން މަދުވެގެން 53 ބިލިއަން އެމެރިކާ ޑޮލަރު ބޭނުންވާނެ ކަމަށް ވަރލްޑް ބޭންކުން ވަނީ ލަފާކޮށްފައެވެ.