ސަޢުދީ ރިޔާލު ރަމުޒުކޮަށްދޭ ޚާއްސަ ނިޝާނެއް ބޭނުން ކުރުމުގެ ހުއްދަ އެ ޤައުމުގެ ރަސްގެފާނު ޚާދިމުލް ޙަރަމައިން އަލް މަލިކު ސަލްމާން ބިން ޢަބްދުލްއަޒީޒް އާލް ސުޢޫދު ދެއްވައިފިއެވެ.

ޑޮލަރާއި އެ ނޫން ވެސް ފައިސާތަކުގައި ވެސް ފައިސާގެ ނަމުގެ ބަދަލުގައި ބޭނުން ކުރަނީ ޚާއްސަ ނިޝާނެކެވެ.

ސައުދީގެ ނޫސްތަކުން ބުނީ ރިޔާލު ރަމުޒުކޮަށްދޭ ޚާއްސަ ނިޝާނެއް ބޭނުން ކުރުމުގެ ހުއްދަ އެ ޤައުމުގެ ރަސްގެފާނު ދެއްވާފައިވާ ކަމަށެވެ.

މިކަމުގެ ބޭނުމަކީ ރިޔާލުގެ ނުފޫޒު ވަރުގަދަ ކުރުމެވެ. 

ޢަރަބި ޚައްތުން ފަރުމާކޮށްފައިވާ މި ރަމުޒަކީ ސައުދީ އިޤްތިޞާދީ ގޮތުން ބާރުގަދަ ޤައުމަކަށް ހެއްދެވުމަށް މިހާރު ކުރަމުން އަންނަ މަސައްކަތްތަކަށް އިތުރުވި ބޮޅެކެވެ.

ސައުދީ އަރަބިއްޔާ މުޅި ދުނިޔެއަށް ހުޅުވާލާ، ވިޔަފާރީގެ މައި ހަބަކަށް ހެދުމަށް “ވިޝަން 2030” ނަމުގައި ޚާއްސަ މަސައްކަތްތަކެއް ވަނީ ފައްޓަވާފައެވެ. 

އެ މަސައްކަތުގެ ދަށުން ޓޫރިޒަމްގެ އެންމެ އަގުބޮޑު މަންޒިލަށް ސަޢުދީ ހެއްދެވުމާއި ތަފާތު އެކި ވިޔަފާރިތަކަށް ޚާއްސަ ޤައުމަކަށް ބަދަލު ކުރެއްވުމުގެ މަސައްކަތް ވަނީ ފެށިފަ އެވެ.

ސަޢުދީން ގެންދަނީ އެ ޤައުމު އިޝްތިހާރު ކުރުމަށް ވެސް ގިނަ މަސައްކަތްތަކެއް ކުރަމުންނެވެ. އެއީ ފަހި ފުރުސަތުތައް ހުރި ޤައުމެއްކަން އަންގައި ދިނުމަށެވެ.

މީގެ ނުވަ އަހަރު ފަހުން 2034 ވަނަ އަހަރު ވޯލްޑްކަޕް ވެސް އޮންނާނީ ސައުދީ ޢަރަބިއްޔާގަ އެވެ.