ޑޮލަރު މާރުކުރުމުގެ ޚިދުމަތް ފަސޭހައިން ލިބޭނެ ގޮތަށް މޯލްޑިވްސް އިސްލާމިކް ބޭންކް (އެމްއައިބީ)ގެ އިންޓަރނެޓް ބޭންކިންގ ނިޒާމު އަދާހަމަކޮށްފިއެވެ.

މިއަދާހަމައަކީ ސަރުކާރުގެ ފޮރެކްސް އެކްޓުގެ ދަށަށް ވަންނަ ވިޔަފާރިތަކަށް ޚާއްޞަކުރެވިގެން ގެނެވުނު އަދާހަމައެއް ނަމަވެސް މިއީ ވިޔަފާރިތަކާއި އަމިއްލަ ފަރުދުންނަށް ވެސް ޑޮލަރު ލިބުމަށް ވެގެންދާނެ ފަސޭހައެއް ކަމަށް އެމްއަބީން ބުނެއެވެ. މި ޚިދުމަތް ހޯދޭނީ ފައިސާނެޓް މެދުވެރިކޮށް ކަމަށާއި ޚިދުމަތުގެ ރައްކާތެރިކަން ކަށަވަރު ކުރުމަށްޓަކައި "ޓޫ ފެކްޓަރ އޮތެންޓިކޭޝަން" ބޭނުންވާނެކަމަށް ބެންކުން މައުލޫމާތުދެއެވެ.

އޮންލައިންކޮށް ޑޮލަރު މާރުކުރުމަށް ޕޯޓަލްއަށް ލޮގިންވުމަށްފަހު މައުލޫމާތުތައް ފުރިހަމަކޮށްލައިގެން މުޢާމަލާތް ފުރިހަމަކޮށްލެވޭނެއެވެ. 

ޑޮލަރު މާރުކުރުމުގެ އިތުރަށް ބަލްކުކޮށް ލާރި ޓްރާސްފަރ ކުރެވޭނެ ނިޒާމެއްވެސް ފައިސާނެޓުން ވަނީ ތަޢާރަފުކޮށްފައެވެ. މި ޚިދުމަތް މެދުވެރިކޮށް މުވައްޒަފުންގެ މުސާރަ ކޯޑުތަކަށް ދުވަހުގެ ކޮންމެ ވަގުތެއްގައި ވެސް މުސާރަ ޖަމާކުރެވޭނެ ކަމަށާއި މިކަމުގެ ސަބަބުން ބޭންކަށް މުސާރަ ލިސްޓުތައް ފޮނުވުން ނިމުމަކަށް ގެނެވޭނެ ކަމަށްވެސް ބޭންކުން ބުނެއެވެ.