އުތުރު ކޮރެއާއިން ގްލޯބަލް ޕޮޒިޝަނިން ސިސްޓަމް (ޖީޕީއެސް) ޖޭމިން އެޓޭކެއް ދީފައިވާކަމަށް ދެކުނު ކޮރެއާގެ ސިފައިން ބުނެފިއެވެ.

މި އެޓޭކްގެ ސަބަބުން ދެކުނު ކޮރެއާގެ އެތައް އުޅަނދުތަކަކާއި މަދަނީ މަތިންދާބޯޓުތަކަށް އަސަރުކޮށްފައިވާ ކަމަށް ވެސް ބުނެފައިވެއެވެ.

ދެކުނު ކޮރެއާގެ ޖޮއިންޓް ޗީފްސް އޮފް ސްޓާފް (ޖޭސީއެސް) އިން އިއްޔެ ބުނެފައިވަނީ، އުތުރު ކޮރެއާއިން ހާޖޫ އަދި ކެސޮން ސަރަހައްދުތަކުގައި ނޮވެމްބަރު 8 އަދި 9 ވަނަ ދުވަހު ޖީޕީއެސް ޖޭމިން ޕްރޮވޮކޭޝަންތަކެއް ހިންގާފައިވާ ކަމަށެވެ. މީގެ ސަބަބުން ގިނަ އަދަދެއްގެ އުޅަނދާއި މަދަނީ މަތިންދާބޯޓުތަކުގެ ހިންގުމަށް ބުރޫއަރާފައިވާ ކަމަށް ވެސް ބުނެފައިވެއެވެ.

ޖޭސީއެސް އިން އުތުރު ކޮރެއާއަށް ގޮވާލާފައިވަނީ މި ހަރަކާތްތައް ވަގުތުން ހުއްޓާލުމަށެވެ. އަދި މިފަދަ ކަންކަމުގެ ޒިންމާ އުފުލަންޖެހޭނެ ކަމަށް ވެސް އިންޒާރުދީފައިވެއެވެ.

މީގެ ކުރިން މެއި 29 އިން ޖޫން 2 އަށް ހިނގި މިފަދަ ޖޭމިން ހަރަކާތެއްގައި 500 އަށްވުރެ ގިނަ މަތިންދާބޯޓާއި އެތައް އުޅަނދުތަކަކަށް އަސަރުކުރި ކަމަށް ދެކުނު ކޮރެއާގެ ސަރުކާރުން ބުނެފައިވެއެވެ. އޭރު މިކަމާ ގުޅިގެން ދެކުނު ކޮރެއާއިން އދ. ގެ އޭވިއޭޝަން ޖަމްޢިއްޔާ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިސީއޭއޯ) އަށް ޝަކުވާ ހުށަހެޅިއެވެ.

ދެ ކޮރެއާގެ ދެމެދުގައި ފަހަކަށް އައިސް ގުޅުން ގޯސްވަމުން އައިސްފައިވާއިރު، އުތުރު ކޮރެއާއިން މިސައިލް ޓެސްޓުތައް ކުރުމާއި، ދެކުނު ކޮރެއާއަށް ކުނި އެޅުމާއި، އަދި ރަޝިއާގެ ހަނގުރާމައަށް އުތުރު ކޮރެއާގެ ސިފައިން ފޮނުވާފައިވާ ކަމަށް ބެލެވޭ ކަންކަމުގެ ސަބަބުން ދެ ގައުމުގެ ދެމެދުގައި ހަމަނުޖެހުން އިތުރުވެފައިވެއެވެ.