ENGLISH
04 އޭޕްރީލު 2025
މަޝްވަރާގައި ބައިވެރިނުކޮށްގެން ޝަކުވާ ކުރާތީ، ޓްރަމްޕްގެ ފާޑުވިދާޅުވުން ޒެލެންސްކީއަށް
19 ފެބްރުއަރީ 2025
|
އެންމެ މަޤްބޫލު
ޔޫކްރޭނާއި ރަޝިޔާއާ ދެމެދު ހަނގުރާމަ ފެށުނީ، ޔޫކްރޭނުގެ ރައީސް ވޮލޮޑިމިޔަރ ޒެލެންސްކީގެ ސަބަބުން ކަމަށް ނުސީދާކޮށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް، ޒެލެންސްކީއަށް ވަރަށް ބޮޑަށް ފާޑުވިދާޅުވެއްޖެއެވެ.
ޔޫކްރޭންއާ ދެކޮޅަށް ކުރަމުންދާ ހަނގުރާމަ ހުއްޓާލައި، ސުލްޙަ ޤާއިމުކުރުމުގެ މަޝްވަރާއަށް ރަޝިޔާގެ ރައީސް ވްލޮޑޮމިޔަރ ޕޫޓިންއާ ސަޢުދީ އަރަބިއްޔާގައި ބައްދަލުކުރައްވަން ހަމަޖެހިފައިވާ ކަމަށް ޓްރަމްޕް ވިދާޅުވި ފަހުން، ޔޫކްރޭނުގެ ހިތްހަމަނުޖެހުމާއި ނުތަނަވަސްކަން ވަނީ ބޮޑުވެފައެވެ.
އަދި އެމެރިކާ އާއި ރަޝިޔާގެ ޚާރިޖީ އިސް ބޭފުޅުން ސަޢުދީ އަރަބިއްޔާގައި އިއްޔެ ފެށި މަޝްވަރާތަކުގައި ޔޫކްރޭނު ބައިވެރިނުކުރުމުގެ ޝަކުވާ ޒެލެންސްކީ ވަނީ ކުރައްވައިފައެވެ.
"އަޅުގަނޑަށް މިއަދު އަޑުއިވިއްޖެ މަޝްވަރާތަކުގައި ބައިވެރިނުކުރިކަމުގެ ޝަކުވާ. މިކަމެއް ހިނގާތާ ތިން އަހަރުވީ. މިކަން [ހަނގުރާމަ] ފުރަތަމަ ކަމަކަށް ފަށައިގެން ވެސް ނުވާނެ. ޑީލެއް ހެދުމުގެ ފުރުޞަތުގެ ވެސް ބޭނުން ނުކުރި،" ރަޝިޔާ ކޮޅަށް ބުރަވެ، ޒެލެންސްކީއަށް ފާޑުވިދާޅުވަމުން ޓްރަމްޕް ވިދާޅުވިއެވެ.
އަދި މި މަސް ނިމުމުގެ ކުރިން، ޕޫޓިންއާ ބައްދަލުކުރައްވާނެ ކަމުގެ އިޝާރާތެއް ވެސް ޓްރަމްޕް ވަނީ ދެއްވައިފައެވެ.
ހަނގުރާމަ ނިންމުމަށްޓަކައި ޒެލެންސްކީ އާ މަޝްވަރާ ކުރަން ރަޝިޔާއިން ދެކޮޅު ހަދަނީ އޭނާގެ ރައީސްކަމުގެ ދައުރު ހަމަވެ، ހައިސިއްޔަތެއް ނެތް ކަމަށް ބުނެއެވެ.
ޕޫޓިން ޤަބޫލުކުރައްވާ ގޮތުގައި، ޔޫކްރޭނުގައި ކުއްލި ޙާލަތު އިޢުލާނުކޮށް، ވެރިކަމުގެ ދައުރު ހަމަވިފަހުން ވެސް ޒެލެންސްކީ ރައީސްކަމުގައި ހުންނެވީ ޤާނޫނާ ޚިލާފަށެވެ.
އެކަމަށް ބާރުދޭ ރާގަކަށް ޓްރަމްޕް ވެސް ވަނީ ވާހަކަ ދައްކަވައިފަ އެވެ.
ޓްރަމްޕް ވިދާޅުވި ގޮތުގައި، އިންތިޚާބެއް ނުބާއްވާ ވަރަށް ގިނަ ދުވަސްވެފައިވާތީ، ޒެލެންސްކީއަށް ޔޫކްރޭނުގެ ރައްޔިތުން ތަމްޞީލުކުރެއްވޭނެ ކަމާމެދު ވެސް ވަނީ ސުވާލު އުފެދިފައެވެ.
"މިއީ ރަޝިޔާއިން ބުނާ ވާހަކައެއް ނޫން. މިއީ އަޅުގަނޑާއި އެހެން ޤައުމުތަކުން ވެސް ބުނާ ވާހަކައެއް،" ޓްރަމްޕް ވިދާޅުވިއެވެ.
ޔޫކްރޭނުގެ ބައިވެރިވުމެއް ނެތި، ހަނގުރާމަ ނިންމުމަށް އެމެރިކާއިން ކުއްލި ގޮތަކަށް ރަޝިޔާއާ މަޝްވަރާކުރަން ނިންމުމުގެ ކަންބޮޑުވުން ވިލާތުގެ އިއްތިހާދުން ވެސް ވަނީ ފާޅުކޮށްފައެވެ.
ނަމަވެސް، ޓްރަމްޕް ވިދާޅުވީ، ރަޝިޔާ އާ އެކު ކުރެވޭ މަޝްވަރާތަކުގައި، ހަނގުރާމަ ނިމުމަކަށް ގެނައުމުގެ އުއްމީދު ބޮޑު ކަމަށެވެ.
ދެވަނަ ދައުރަކަށް އެމެރިކާގެ ރައީސްކަމަށް ވަޑައިގެންނެވި ޓްރަމްޕް ވަނީ ރަޝިޔާ-ޔޫކްރޭނުގެ ހަނގުރާމަ ނިމުމަކަށް ގެންނަން އަމާޒު ހިއްޕަވައިފައެވެ.
މިގޮތުން، ވެރިކަމަށް ވަޑައިގަންނަވަތާ 24 ގަޑިއިރުގެ ތެރޭގައި އެ ހަނގުރާމަ ނިމުމަކަށް ގެންނަވާނެ ކަމަށް، ރިޔާސީ ކެމްޕޭނުގެ ތެރޭގައި ޓްރަމްޕް ވަނީ ވިދާޅުވެފައެވެ.