ބިޒްނަސް ސެންޓަރ ކޯޕަރޭޝަން (ބީސީސީ) ގެ ފަރާތުން ފަތުރުވެރިކަމުގެ ދާއިރާގައި ހަރަކާތްތެރިވާ ކުދި އަދި މެދު ވިޔަފާރިތަކަށް އަމާޒުކޮށްގެން ބާއްވާ 'ވުނާރި ފޯރަމް' މިއަދު އދ. މަހިބަދޫގައި ބާއްވައިފިއެވެ.

އެއް ދުވަހުގެ މުއްދަތައް ވުނާރި ފޯރަމް ކުރިއަށްގެންދިޔައީ އެރަށުގައި ހުންނަ އދ. އަތޮޅު ތަޢުލީމީ މަރުކަޒުގައެވެ. ބީސީގެ އިތުރުން ފޯރަމްގައި މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓް، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)، މޯލްޑިވްސް އިސްލާމިކް ބޭންކް އަދި ބޭންކް އޮފް މޯލްޑިވްސްގެ އިތުރުން މީރާގެ ފަރާތުން ވަނީ ސެޝަންތައް ކުރިއަށް ގެންދަވާފައެވެ.

ވުނާރި ފޯރަމްގެ މަޤްޞަދަކީ ދެމެހެއްޓެނިވި ވިޔަފާރީގެ އުޞޫލުތައް ކުރިއެރުވުމާއި އދ. އަތޮޅުގެ އިޤްތިޞާދީ ތަރައްޤީ ކުރިއެރުވުން ކަމަށް ބީސީސީން ވިދާޅުވެފައިވެއެވެ.  

ބީސީސީން ވިދާޅުވީ އެ ފޯރަމަކީ، ފަތުރުވެރިކަމުގެ ދާއިރާގައި ހަރަކާތްތެރިވާ އޮޕަރޭޓަރުންނާއި، ފަތުރުވެރިކަމާ ގުޅުންހުރި ވިޔަފާރިތަކަށް ބޭނުންވާ މުހިންމު ހުނަރުތަކާއި، އެ ދާއިރާގެ ވިޔަފާރިއާ ގުޅުންހުރި ޤާނޫނީ މަޢުލޫމާތު، އަދި މާކެޓް ފުޅާކުރުމުގެ ފުރުޞަތުތައް ފޯރުކޮށްދިނުމަށް ކުރިއަށްގެންދެވި ހަރަކާތެއް ކަމަށެވެ.

މި ފޯރަމް ބީސީސީގެ ފަރާތުން ކުރިއަށްގެންދެވީ އަރިއަތޮޅު ދެކުނުބުރީ ކައުންސިލް އިދާރާއާ ގުޅިގެންނެވެ.

މަހިބަދޫގައި ކުރިއަށްގެންދެވި ސެޝަންތަކުގައި، ޤާނޫނީ ގޮތުން ފަރުވާތެރިވެ، ޢަމަލުކުރަންޖެހޭ ކަންކަމާއި، މާލީ ފުރުޞަތުތަކާއި، ވިޔަފާރިވެރިކަމާއި، މާކެޓިންގ އިސްތިރާޖީތަކާއި، ޓެކްސް ދެއްކުމާއި، އަދި ފަތުރުވެރިކަމުގެ ސިނާޢަތުގެ ޓްރެންޑްތަކާ ބެހޭ މުހިންމު މަޢުލޫމާތު ހިމެނޭ ކަމަށް ބީސީސީން މަޢުލޫމާތު ދެއްވާފައިވެއެވެ.