ރަމަޟާންމަހާއި ދިމާކޮށް މާލެ ސަރަހައްދުގެ ގޭބިސީތަކުން ކުނިނަގާ ގަޑިތަކަށް ބަދަލުގެންނަން ހަމަޖެހިފައިވާކަމަށް ވެމްކޯއިން ވިދާޅުވެއްޖެއެވެ. 

ދައުލަތުގެ މީޑިއާ، ޕީއެސްއެމް ނިއުސްއަށް މައުލޫމާތުދެއްވަމުން ވެމްކޯގެ މެނޭޖަރ އިބްރާހީމް ޙަނީފް ވިދާޅުވީ މިއަހަރުގެ ރަމަޟާންމަހު މާލޭ ގޭބިސީތަކުން ކުނިނެގުމަށް ހަމަޖެހިފައިވަނީ ރޭގަނޑު 8:30 އިން ދަންވަރު 2:30 އަށެވެ. އަދި ހުޅުމާލޭގައި ކުނިނެގުން ކުރިއަށްދާނީ ރޭގަނޑު 9:00 އިން ދަންވަރު 1:00 އަށެވެ. ވިލިމާލޭގައި ރޭގަނޑު 9:30 އިން ދަންވަރު 1:00 އަށެވެ.

މި ބަދަލަށް އަހުލުވެރިކުރުމަށް، މިމިހުގެ 23 ވަނަ ދުވަހުން ފެށިގެން ކުނިނަގަން ހަމަޖެހިފައިވަނީ މިބަދަލާ އެއްގޮތަށް ކަމަށްވެސް ހަނީފް ވިދާޅުވިއެވެ.

ކުނިނަގަންފަށާ ވަގުތަށްވުރެ ލަހުން ކުނި ނެރޭ ގޭބިސީތަކަށް ޚިދުމަތްދިނުމުގައި ދަތިވާނެތީ، ކުނިނަގާ ވަގުތުގެ ކުރިން ކުނިތައް ނެރުމަށް ހަނީފް އެދިވަޑައިގެންނެވިއެވެ.