މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އަދި މިނިސްޓްރީ އޮފް ޓޫރިޒަމް އެއްކޮށްލެއްވުމަށްފަހު، އެ މިނިސްޓްރީގެ ވަޒީރަކަށް އައްޔަނުކުރެއްވި ތާރިޤު އިބްރާހީމަށް ރައްޔިތުންގެ މަޖިލީހުން މިއަދު ރުހުން ދެއްވައިފި އެވެ.

މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓުގެ މަގާމަށް އައްޔަނުކުރައްވާފައިވާ ތާރިގަށް މަޖިލީހުގެ ރުހުން ހޯއްދެވުމަށް ރައިސުލްޖުމްހޫރިއްޔާ ޑރ. މުހައްމަދު މުޢިއްޒު މަޖިލީހަށް ހުށަހެޅުއްވީ މި މަހުގެ 10 ވަނަ ދުވަހު އެވެ.

އެ މައްސަލަ ދިރާސާކުރެއްވި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ނިންމުމާ އެއްގޮތަށް، މުޅި މަޖިލީހުން ވެސް ނިންމީ ތޯރިގަށް ރުހުންދެއްވުމަށެވެ. އެގޮތަށް ފާސްކުރެއްވީ ވޯޓުގައި ބައިވެރިވެވަޑައިގެންނެވި 69 މެމްބަރުންގެ ވޯޓާ އެކު އެވެ. 

ދެ މިނިސްޓްރީ އެއްކޮށްލުމަށްފަހު، މިނިސްޓަރަކަށް ތާރިޤު އައްޔަނުކުރައްވާފައިވަނީ މި މަހުގެ 2 ވަނަ ދުވަހު އެވެ.