"ދަ ޓްރެވެލް ގާއިޒް" އިން ރަށު ފަތުރުވެރިކަން ކުރިއެރުވުމަށާއި ރަށް ރަށުގެ ސަޤާފަތް ކުރިއެރުވުމަށްޓަކައި އިންތިޒާމުކޮށްގެން ބޭއްވި " ރަށު އެކްސްޕޯ" ކާމިޔާބު ކަމާއެކު ނިންމާލައިފިއެވެ.

މިއީ ރާއްޖޭގެ ޑޮމެސްޓިކް ފަތުރުވެރިކަމަށް ޚާއްސަކޮށްގެން ބޭއްވި މިފަދަ ފުރަތަމަ އެކްސްޕޯއެވެ. މި  އެކްސްޕޯއަށް ވަނީ އާންމުންގެ ބޮޑު ތަރުޙީބެއް ލިބިފައެވެ.

"ދަ ޓްރެވެލް ގާއިޒް" ގެ މެނޭޖިން ޑިރެކްޓަރ މީޑިއާތަކަށް މައުލޫމާތު ދެއްވަމުން ވިދާޅުވީ ރަށްރަށުގެ ކައުންސިލްތަކުން މި އެކްސްޕޯއަށް ވަރަށް ބޮޑަށް ޝައުގުވެރިކަން ފާޅުކޮށްފައިވާތީ އަންނަ އަހަރުގެ އެކްސްޕޯ މިއަށް ވުރެ ފުރިހަމައަށް ތައްޔާރުވުމުގެ މަސައްކަތް ކުރާ ކަމަށެވެ.

މި އެކްސްޕޯގައި ޖުމްލަ 9 އަތޮޅަކުން 14 ރަށެއް ތަމްސީލުކޮށްފައިވެއެވެ. އަދި ގިނަ ކުންފުނިތަކުންވެސް މި އެކްސްޕޯގައި ބައިވެރިވެފައިވެއެވެ. އަދި ރަށު ކައުންސިލްތަކާއި ގެސްޓްހައުސްތަކާއި ރިސޯޓުތަކާއި ކުދި އަދި މެދު ފަންތީގެ ވިޔަފާރިތަކުގެ 50 އަށްވުރެ ގިނަ ސްޓޯލް ވަނީ ބެހެއްޓިފައިވެއެވެ. މި އެކްސްޕޯގައި ބައިވެރިވި ރަށްރަށުންވަނީ އެ ރަށްރަށުގެ ރީތި ސަޤާފަތް ދައްކާލާފައެވެ.

ތިން ދުވަހުގެ މުއްދަތަށް ކުރިއަށް ގެންދިޔަ " ރަށު އެކްސްޕޯ" ބާއްވާފައިވަނީ  ހުޅުމާލެ ސެންޓްރަލް ޕާކުގައެވެ