ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމުގެ ދަށުން، ޙަމާސް ޖަމާޢަތުން ރަހީނުންކޮށްފައި ތިބި އިތުރު މީހުންނާއި އިޒްރޭލުގެ ޖަލުތަކުގައި ބަންދުކޮށްފައިތިބި އެތައް ސަތޭކަ ޤައިދީން މިނިވަންކޮށްފިއެވެ.

އެ އެއްބަސްވުމުގެ ދަށުން، ޙަމާސްއިން ރަހީނުކޮށްފައިވާ 21 މީހަކާއި، އިޒްރޭލުގެ ޖަލުތަކުން 700 އެއްހާ ފަލަސްތީނުގެ މީހުން ވަނީ ފަސް ފަހަރެއްގެ މަތިން މިނިވަންކޮށްފައެވެ.

އެއްބަސްވުމުގެ ހަވަނަ ބުރުގައި ރޭގެ ވަގުތެއްގައި، ތިން ރަހީނުންނާއި 369 ޤައިދީން ވަނީ މިނިވަންކޮށްފައެވެ.

ޙަމާސްއިން މިނިވަން ކުރި މީހުންގެ ތެރޭގައި އިޒްރޭލާއި އެމެރިކާއަށް ނިޞްބަތްތާ މީހަކާއި އިޒްރޭލާއި ރަޝިޔާއަށް ނިސްބަތްވާ މީހަކާއި އިޒްރޭލާއި އާޖެންޓީނާއަށް ނިސްބަތްވާ މީހެއް ހިމެނެއެވެ.

އިޒްރޭލުން މިނިވަންކުރި ޤައިދީންގެ ތެރެއިން، ހަތަރު މީހެއްގެ ހާލު ދެރަކަމުން ހޮސްޕިޓަލުގައި ދަނީ ފަރުވާދެމުންނެވެ.

ހަ ވަނަ ބުރުގެ ރަހީނުންނާއި ޤައިދީން އިއްޔެ ބަދަލުކޮށްފައިވަނީ، އިތުރު ރަހީނުން މިނިވަންނުކުރާނެ ކަމަށް ޙަމާސްއިން ބުނެ، އެއްބަސްވުން ރޫޅިދާނެކަމުގެ ބިރު ހީވެފައިވަނިކޮށެވެ.

ޙަމާސްއިން އިތުރު ރަހީނުން މިނިވަންކުރަން ދެކޮޅު ހެދީ، އިޒްރޭލުން އެއްބަސްވުމާ ޚިލާފަށް ޢަމަލުކުރަމުންދާ ކަމަށް ބުނެއެވެ.

ނަމަވެސް، ހަނގުރާމަ އަލުން ފަށާނެކަމުގެ އިންޒާރު، އިޒްރޭލާއި އެމެރިކާ އިން ދީފައިވަނިކޮށް، ޙަމާސް އިން ވަނީ އެ ނިންމުން ބަދަލުކޮށްފައެވެ.

ރަހީނުން ބަދަލު ކުރުމަށް ފަހު ނެރުނު ބަޔާނެއްގައި ޙަމާސްއިން ބުނީ، ހަވަނަ ބުރަކަށް ރަހީނުން މިނިވަން ކުރުމުން ދޭހަކޮށްދެނީ މިކަމުގައި އޮތް ހަމައެކަނި މަގަކީ މަޝްވަރާކޮށް އެއްބަސްވުމާ އެއްގޮތަށް ޢަމަލު ކުރުން ކަމަށެވެ.