މީގެ ބައި ގަރުނު ކުރިން މާލެ ކައިރީ ފަޅު ރަށްތަކުގެ ބޭނުން ހިފަމުން ދިޔައީ ވައިނުބައިވެ މޫސުން ގޯސްވުމުން، މަސްވެރިން ބަނޑަހަޖައިގެން ތިބުމަށެވެ. ދުނިޔޭގެ އެކި ކަންކޮޅުތަކަށް "ފީނަން" ދަތުރުކުރި އިޓަލީގެ އެޑްވެންޗަރަރއަކަށް ސިލޯނު ކައިރީ އޮތް ޖަޒީރާ ދިވެހި ރާއްޖެ، ޗާޓަކުން ފެނުން ވެގެން ދިޔައީ، ދިވެހިންގެ ނަސީބަށެވެ. ރާއްޖޭގެ ދޮންވެލި ތުނޑިތަކުގެ ރީތިކަން ދެކިލުމަށް، ރާއްޖެ އަށް އެންމެ ފުރަތަމަ ޓޫރިސްޓު ގްރޫޕެެއް ޒިޔާރަތްކުރީ މީގެ 53 އަަހަރު ކުރި، 1972 ވަނަ އަހަރުގެ ފެބްރުއަރީ މަހުގެ 16 ވަނަ ދުވަހު އެވެ. އިޓަލީގެ ނޫސްވެރިން ހިމެނޭ އެ ގުރޫޕު އެނބުރި ޤައުމަށް ގޮސް "އާ ސުވަރުގެ އެއް ފެނިއްޖެ" ކަމަށް ނޫސްތަކުގައި ޖެހި އެވެ.

މިސްރާއި ސްރީލަންކާ އަދި އެ ނޫން ބައެއް ޤައުމު ތަކުގައި ކިޔަވަން ތިބި ދިވެހި ދަރިވަރުން ރާއްޖެ އަށް ފަތުރުވެރިކަން ތަޢާރަފު ކުރުމުގެ ވިސްނުން 1960 ގެ އަހަރު ތަކުގައި ގެންގުޅުނެވެ. ރާއްޖޭގެ ފަތުރުވެރިކަމުގެ ބާނީ ޖޯޖް ކޯބިން ރާއްޖެ ވަޑައިގަތުމުގެ ކުރިން، ރާއްޖެ އަށް ފަތުރުވެރިން ގެނައުމަށް އެއްވެސް ފަރާތަކުން ޢަމަލީ ގޮތުން މަސައްކަތް ކޮށްފައިވާކަން އެނގޭކަށް ނެތެވެ.

ރާއްޖެއަށް ދަތުރުކުރެވޭނެ ފަސޭހަ ގޮތެއް އޭރު ނެތުމުން، ކޯބިން 1971 ވަނަ އަހަރު ފުރަތަމަ ރާއްޖެ ވަޑައިގަތީ  ލަންކާ އާއި ރާއްޖެއާ ދެމެދު ދަތުރުކުރި "މޯލްޑިވްސް އެކްސްޕްލޯރާ" އާގު ބޯޓުގަ އެވެ. 

މާލެ އާދެވުމުން ރާއްޖޭގެ ރީތިކަން ފެނި ކޯބިން ހައިރާންވެވަަޑައިގަތެވެ. ރާއްޖޭގެ ދޮންވެލި ގޮނޑުދޮށްތަކާއި ހިތްގައިމު މޫދާއި ކަނޑު އަޑީގެ ރީތި ކުލަތަކުގެ އިތުރުން ދިވެހިންގެ ހިތްހެޔޮ ކަމާއެކު، ކޯބިން އަށް ރާއްޖެ ސިފަ ކުރެއްވުނީ "ސުވަރުގެ" އެއްގެ ގޮތުގަ އެވެ. މިހާރު އެމެރިކާގައި ދިރިއުޅުއްވާ ކޯބިން ވިދާޅުވި ގޮތުގައި ފުރަތަމަ ރާއްޖެ ވަޑައިގަތްއިރު، ރާއްޖެ އަކީ ކާއްޓާއި ހިކިމަސް ބޭރުކުރާ މަސްވެރި ޤައުމެކެވެ. 

ފެބްރުއަރީ 16، 1972 ވަނަ ދުވަހު އިޓަލީ ވިލާތުގެ ގްރޫޕެއް ފުރަތަމަ ޓޫރިސްޓުންގެ ގޮތުގައި ކޯބިން ރާއްޖެ ގެންނެވި އެވެ. އެ ގްރޫޕުގައި ގިނައިން ހިމެނުނީ ނޫސްވެެރިންނެވެ. އެ މީހުން ބޭތިއްބީ މާލޭގަ އެވެ. ހ. މާގިރި އާއި ހ. ލަކްސްވުޑް އަދި މ. ކަނީރުވިލާގަ އެވެ. ދުވާލު ވަގުތު ހޭދަކުރަނީ ޑައިވްކުރުމުގަ އެވެ. މަސް މަރާ ބަޑި ހިފައިގެން މަސް މެރުމުގަ އެވެ. ދޮންވެލި ފަސްގަނޑުގައި އޮށޯވެލައިގެންތިބެ ހަށިގަނޑަށް ހޫނުކަން ލިއްބައި ދިނުމާއި، އަވީލެވުމުގައެވެ. ރާއްޖޭގައި އޭރު އެންމެ ރިސޯޓެއް ވެސް ނެތެވެ. 

ކޯބިން ދެއްވި ޚިޔާލުތަކުގެ މައްޗަށް، މާލެ އަތޮޅު ވިހަމަނާފުށީގައި ކުރުނބާ ރިސޯޓު ތަރައްޤީކޮށް ހުޅުވީ 3 އޮކްޓޯބަރު 1972 ގަ އެވެ.  ކޯބިން ގެ 50 ޕަސެންޓް ހިއްސާވާ ގޮތަށް ހެދި ރާއްޖޭގެ ފުރަތަމަ ރިސޯޓުގެ ހިއްސާ ފަހުން އޭނާ ދޫކޮށްލެއްވި އެވެ.

ޤަބޫލު ކުރެވޭ ގޮތުގައި ރާއްޖޭއަށް ފަތުރުވެރިން އަންނަ އަދަދު ގުނަން ފެށީ، އެންމެ ފުރަތަމަ ރާއްޖެ އަށް ޒިޔާރަތްކުރި އިޓަލީގެ ގްރޫޕުން އައި ހިސާބުން ފެށިގެންނެވެ. އަރުސީފުގައި ހުރި ފަތުރުވެެރިކަމުގެ ތަފާސްހިސާބުތަކުން ދައްކާ ގޮތުގައި 1972 ވަނަ އަަހަރު، 1،097 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އެއަހަރު، ރާއްޖޭގައި ހުރީ 280 ޓޫރިސްޓު އެނދެވެ.

ފުރަތަމަ ޒިޔާރަތްކުރި ފަތުރުވެރިޔާ ހިމަނައިގެނެ ބޯ ގުނުމުން، އެއް މިލިއަން ވަނަ ފަތުރުވެރިޔާ ރާއްޖެއަށް ޒިޔާރަތްކުރީ 1989 ވަނަ އަހަރު އެވެ. ދިހަ މިލިއަން ފަތުރުވެރިން ހަމަވީ ފަތުރުވެރިކަން ފެށުނުތާ 39 އަހަރު ފަހުން 2010 ވަނަ އަހަރު އެވެ. އެ އަހަރު ފަތުރުވެރިނަށް ޚިދުމަަތްދޭން ރަޖިސްޓްރީކޮށްފައިވާ 296 ތަނެއްގައި 25،221 ޓޫރިސްޓު އެނދު ހުއްޓެވެ. 

ތަފާސްހިސާބުތަކަށް ދާއިރު، 20 މިލިއަން ވަނަ ފަތުރުވެރިޔާ ރާއްޖެއަށް ޒިޔާރަތްކުރީ 2018 ވަނަ އަހަރެވެ. އެ އަހަރު ފަތުރުވެރިންނަށް ޚިދުމަތްދޭން 831 ތަނެއް ރަޖިސްޓްރީކޮށްފައިވެއެވެ. އެ ތަންތަނުގައި 45،419 ޓޫރިސްޓު އެނދު ހުއްޓެވެ. 

ރާއްޖެއިން ވަނީ ވަރލްޑް ލީޑިން ޑެސްޓިނޭޝަން އެވޯޑް ޖައްސަ ޖައްސައިގެން ފަސް ވަނަ ފަހަރަށް، މިދިޔަ އަހަރު ހާލިސުކޮށްފައެވެ. މި ކާމިޔާބީ ޔަޤީންކޮށްދެނީ، ރާއްޖެއަކީ ދުނިޔޭގެ އެންމެ މަޤްބޫލު ފަތުރުވެރިކަމުގެ މަންޒިލުކަމެެވެ. ކުރިން މަސްވެރި ޖަޒީރާއެއްގެ ގޮތުގައި އޮތް ރާއްޖޭގެ ފަތުރުވެރިކަމުގެ ދާއިރާ އަކީ، މިހާރު މަލްޓި މިލިއަން ޑޮލަރުގެ އިންޑަސްޓްރީ އެކެވެ.  

1972 ވަނަ އަހަރުން ފެށިފެން މިދިޔަ އަހަރުގެ ނިޔަލަށް 29.3 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އެހެންކަމުން މި އަހަރުގެ ތެރޭގައި، ލަފާކުރެވޭ ގޮތުން އެޕްރީލު މަހު، 30 މިލިއަން ވަނަ ފަތުރުވެރިޔާ ރާއްޖެއަށް ޒިޔާރަތްކުރާނެއެވެ.

ފަތުރުވެރިކަމުގެ ބާނީ ކޯބިން ވިދާޅުވީ ރާއްޖޭގެ ފަތުރުވެރިކަމުގެ ކާމިޔާބީގެ ޝުކުރު ހައްޤުވަނީ ފަތުރުވެރިކަމަށް އިންވެސްޓުކުރެއްވި ފަރާތްތަކާއި ޓޫރިޒަމް އިންޑަސްޓްރީއަށް ކަމަށެވެ. ކޯބިން ވިދާޅުވި ގޮތުގައި ރާއްޖޭގެ ފަތުރުވެރިކަމުގެ ކާމިޔާބީގެ ސިއްރަކީ މެހެމާންދާރީ އާއި ދިވެހިންގެ ހިތްހެޔޮކަމެވެ.