ENGLISH

04 އޭޕްރީލު 2025

Advertisement

އެމެރިކާގެ އެހީ ނުލިބި ރަޝިޔާ އާ ދެކޮޅަށް ޔޫކްރޭނަށް ހިފަހައްޓައެއް ނުލެވޭނެ: ޒެލެންސްކީ

15 ފެބްރުއަރީ 2025

|

ހަސަން އާމިރު

އެމެރިކާގެ އަސްކަރީ އެހީ ނުލިބޭނަމަ، ޔޫކްރޭނުގެ ބިންތައް ރަޝިޔާ އަތް ދަށަށް ދިޔުން ހުއްޓުވާފައިވާ ބާއްވަން ޔޫކްރޭނަށް ވަރަށް ދަތިވާނެ ކަމަށް، ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ވިދާޅުވެއްޖެއެވެ.

"ވަރަށް އުނދަގޫ ޙާލަތެއްގައި ވެސް ކޮންމެވެސް ފުރުޞަތެއް އޮންނާނެ. އެކަމަކު އޮންނާނީ ވަރަށް ހަނި ފުރުޞަތެއް. އެމެރިކާގެ ތާއީދާއި އެހީ ނުލިބޭނަމަ، ޔޫކްރޭނު ސަލާމަތް ކުރުމުގެ އޮންނާނީ ވަރަށް ހަނި ފުރުޞަތެއް،" އެންބީސީ ނޫހަށް ދެއްވި އިންޓަވިއުއެއްގައި ޒެލެންސްކީ ވިދާޅުވިއެވެ.

ޒެލެންސްކީ މި އިންޓަވިއު ދެއްވާފައިވަނީ، އެމެރިކާގެ ނައިބު ރައީސް ޖޭޑީ ވާންސް އާ ޖަރުމަނުގައި ބައްދަލުވުމުގެ ކުރިންނެވެ.

ޔޫކްރޭންއާ ދެކޮޅަށް ކުރަމުންދާ ހަނގުރާމަ ހުއްޓާލައި، ސުލްޙަ ޤާއިމުކުރުމުގެ މަޝްވަރާއަށް ރަޝިޔާގެ ރައީސް ވްލޮޑޮމިޔަރ ޕޫޓިންއާ ސައުދީ އަރަބިއްޔާގައި ބައްދަލުކުރައްވަން ހަމަޖެހިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ފަހުން، ޔޫކްރޭނުގެ ހިތްހަމަނުޖެހުމާއި ނުތަނަވަސްކަން ވަނީ ބޮޑުވެފައެވެ.

ޔޫކްރޭނުން މައިގަނޑު ކަންބޮޑުވުމަކީ، ޔޫކްރޭނުގެ ބައިވެރިވުމެއް އަދި ބަހެއް ނެތި، މި ހަނގުރާމަ ނިންމުމުގެ އެއްބަސްވުމެއް އެމެރިކާ އާއި ރަޝިޔާ އިން އެކުލަވާލައިފާނެތީއެވެ.

ވާންސް އާ އެކު ބޭއްވި ބައްދަލުވުމުގައި ޒެލެންސްކީ ބާރުއަޅުއްވާފައިވަނީ، ހަނގުރާމަ ނިމުމަކަށް ގެންނަން ޔޫކްރޭނުގެ ސަލާމަތީ ކަންކަން ކަށަވަރު ކުރުމުގެ މައްޗަށެވެ.

އެ ބައްދަލުވުމަށްފަހު ޒެލެންސްކީ ވިދާޅުވީ، ސުލްޙަ ޤާއިމުކުރަން ޔޫކްރޭނުން ވެސް ވަރަށް ބޮޑަށް ބޭނުންވާ ކަމަށާއި، ނަމަވެސް ސުލްޙަ ޤާއިމުކޮށްފައި ބޭއްވޭނެ ކަން ކަށަވަރުވާންޖެހޭ ކަމަށެވެ.

ނައިބު ރައީސް ވާންސް ވިދާޅުވީ، ޒެލެންސްކީ އާ އެކު ވަރަށް ހަރުދަނާ މަޝްވަރާތަކެއް ކުރެވުނު ކަމަށެވެ.

ޔޫކްރޭނުގެ ކުރިން ރަޝިޔާ އާ ޓްރަމްޕް މަޝްވަރާކުރެއްވުމުން، ޔޫކްރޭނުގެ ޒެލެންސްކީ ވަނީ ހިތްހަމަނުޖެހުން ފާޅުކުރައްވާފައެވެ.

ޔޫރަޕުގެ އިއްތިހާދުން ވެސް ވަނީ، ސުލްޙައިގެ އެއްވެސް އެއްބަސްވުމެއް އެކުލަވައިލަންޖެހޭނީ ޔޫކްރޭނުގެ ފުރިހަމަ ބައިވެރިވުމާއި ބަހެއް އޮވެގެން ކަމަށް ގޮވާލައިފައެވެ.

ދެވަނަ ދައުރަކަށް އެމެރިކާގެ ރައީސްކަމަށް ވަޑައިގެންނެވި ޓްރަމްޕް ވަނީ ރަޝިޔާ-ޔޫކްރޭނުގެ ހަނގުރާމަ ނިންމުމަކަށް ގެންނަން އަމާޒު ހިއްޕަވައިފައެވެ.

މިގޮތުން، ވެރިކަމަށް ވަޑައިގަންނަވަތާ 24 ގަޑިއިރުގެ ތެރޭގައި އެ ހަނގުރާމަ ނިމުމަކަށް ގެންނަވާނެ ކަމަށް، ރިޔާސީ ކެމްޕޭނުގެ ތެރޭގައި ޓްރަމްޕް ވަނީ ވިދާޅުވެފައެވެ.

ކިޔުންތެރިންގެ ހިޔާލު