އިޒްރޭލާއި އެމެރިކާގެ ވަރުގަދަ އިންޒާރުތަކާ ގުޅިގެން، ޙަމާސް ޖަމާޢަތުން ދޫދީ، އިތުރު ތިން ރަހީނަކު މިނިވަންކުރަން ތައްޔާރުވެފައިވާ ކަމަށް ރިޕޯޓުތައް ބުނެފިއެވެ.

އިޒްރޭލުން ޣައްޒާއަށް ހުއްޓުމެއް ނެތި ޙަމަލާތައް ދޭން ފެށިތާ 15 މަސް ދުވަސް ފަހުން، ގިނަ ޤައުމުތަކެއް މެދުވެރިވެގެން، އެކުލަވާލައި، ޢަމަލުކުރަމުންދާ އެއްބަސްވުމާ ޚިލާފަށް އިޒްރޭލުން ޢަމަލުކުރަމުންދާ ކަމަށް ބުނެ، އިތުރު ރަހީނުން މިނިވަންކުރުން ޙަމާސްއިން މަޑުޖައްސައިލުމުގެ ނިންމުން އިޢުލާނުކުރިއެވެ.

އެ އެއްބަސްވުމުގެ ދަށުން، ޙަމާސްއިން ރަހީނުކޮށްފައިވާ 21 މީހަކާއި، އިޒްރޭލުގެ ޖަލުތަކުން 700 އެއްހާ ފަލަސްތީނުގެ މީހުން ވަނީ ފަސް ފަހަރެއްގެ މަތިން މިނިވަންކޮށްފައެވެ.

ހަ ވަނަ ބުރުގެ ރަހީނުންނާއި ޤައިދީން މިނިވަންކުރަން ހަމަޖެހިފައި އޮތީ މާދަމާ އެވެ.

އެއްބަސްވުމާ އެއްގޮތަށް ރަހީނުން މިނިވަންނުކޮށްފިނަމަ، ޣައްޒާއަށްދޭ ޙަމަލާތައް އަލުން ފަށާއި، ޙަމާސް އެކީގައި ނައްތާލެވެންދެން ހަނގުރާމަ ނުހުއްޓާނެކަމުގެ އިންޒާރު އިޒްރޭލާއި އެމެރިކާއިން އިން ވަނީ ދީފައެވެ.

އެ އިންޒާރުތަކަށް ނުގުޑާނެކަމަށް ޙަމާސްއިން ބުނަމުން އައި ނަމަވެސް، އެ ޖަމާޢަތުގެ ތަރުޖަމާނަކު ބުނީ މި އެއްބަސްވުން ކާމިޔާބު ކުރަން ޙަމާސްއިން ބޭނުންވާ ކަމަށެވެ.

އެއާ އެކު، މާދަމާ މިނިވަންކުރާ ތިން ރަހީނުންގެ ނަންތައް ދޭން ޙަމާސްއިން ތައްޔާރުވަމުން އަންނަ ކަމަށް ރިޕޯޓުތައް ބުނެފައިވެއެވެ.