ވުޒާރާގެ ބައެއް މަސައްކަތްތަކަށް ގެންނެވި ބަދަލާއެކު މުވައްޒަފުން ބަލަންޖެހޭ ކޭސްތަކުގެ ޢަދަދު މަދުވެއްޖެ ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ވަޒީރު ޑރ. އައިޝަތު ޝިހާމް ވިދާޅުވެއްޖެއެވެ.

އެ ވުޒާރާގެ މަސައްކަތްތަކުގެ އަދާހަމަ މަޢުލޫމާތު ހިއްސާކުރެއްވުމަށް އިއްޔެ ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ ޢާއިލީ ނަޒަރަކުން ބަލައިގެން މަސައްކަތް ކުރަން ފެށުމުގެ ނަތީޖާއެއްގެ ގޮތުން މިހާރު ސޯޝަލް ވޯކާސް ބަލަންޖެހޭ ކޭސްތައް 200 އިން 60 ކޭސްއާ ހަމައަށް ގޮސްފަވާކަމަށެވެ. އަދި އުއްމީދަކީ ކުރިޔަށް އޮތް ތަނުގަ އެ ޢަދަދު 30 ކޭހަށް ދަށްކުރުން ކަމަށް ވެސް މިނިސްޓަރ ވިދާޅުވިއެވެ.

ހަމައެއާއެކު ކުޑަކުދިން ބައިތިއްބާ ވަކި މަރުކަޒުތަކާ، ދެ ޖިންސުގެ ކުދިން ބައިތިއްބާ ވަކި މަރުކަޒުތަކާ، އެތަންތަނުގައި މަސައްކަތްކުރާ މީހުންނަށް ޤަވާއިދުން އެކަށީގެންވާ ތަމްރީނުތައް ދެވެމުންދާކަމަށް ވަޒީރު ވިދާޅުވިއެވެ.

އެކުދިންގެ ތެރެއިން ސުކޫލު ނިމޭ ކުދިންނަށް ބޭނުންވާ ތަމްރީނުތައް ދީ ވަޒީފާގެ މާހައުލާ ގުޅުވުމުގެ މަސައްކަތް ކުރެވެމުންދާކަން ވަޒީރު ފާހަގަކުރެއްވިއެވެ. އަދި މިކަން ކުރުމުގައި އެކުދިން ޝައުގުވެރިވާ ދާއިރާއަކުން ތަމްރީނުކުރުމަށް ފުރުޞަތު ފަހިކޮށްދެއްވަމުންދާ ކަމަށް ވެސް އެކަމަނާ ވިދާޅުވިއެވެ.