ENGLISH
04 އޭޕްރީލު 2025
އީޔޫން ޤަބޫލުކުރާ ފެންވަރަށް މަތިންދާބޯޓު މަރާމާތުކުރުމުގެ ސެޓްފިކޭޝަން ޤައުމީ އެއާލއިނަށް
13 ފެބްރުއަރީ 2025
|
ޤައުމީ އެއާލައިނުން ގެނައި ފުރަތަމަ ވައިޑްބޮޑީ މަތިންދާބޯޓު، ފޮޓޯ: ރައީސް އޮފީސް
އެންމެ މަޤްބޫލު
ޤައުމީ އެއާލައިން މޯލްޑިވިއަންއަށް ޔޫރަޕިއަން ޔޫނިއަނުން ޤަބޫލުކުރާ ފެންވަރަށް މަތިންދާބޯޓު ބަލަހައްޓައި މަރާމާތުކޮށް އޯވާހޯލްކުރެވޭކަމުގެ ސަޓިފިކޭޝަން ލިބިއްޖެއެވެ.
މިއަދު ޤައުމީ އެއާލައިނުން ވިދާޅުވެފައިވަނީ ޔޫރަޕިއަން އޭވިއޭޝަން ސޭފްޓީ އެޖެންސީ (އީއޭއެސްއޭ)އިން ދޭ ޕާޓް 145 އެޕްރޫވަލް ސެޓްފިކެޓު އެ ކުންފުންޏަަށް ލިބިފައިވާ ކަމަށެވެ. އަދި މިއީ އެ ކުންފުނީގެ މަތިންދާބޯޓުތައް ބެލެހެއްޓުމުގެ ޤާބިލުކަން ކުރިއެރުވުމުގައި ކަނޑައްތުކުރެވުނު މުހިއްމު މަގުފާހަގައެއްކަމަށްވެސް އެ ކުންފުނިން ވިދާޅުވިއެވެ.
މިއީ މިހާތަނަށް އެއާލައިނުން ހޯދި 12 ވަނަ ޕާޓް 145 އެޕްރޫވަލް ސެޓްފިކޭޝަންކަމަށާއި، އެ ސެޓްފިކޭޝަންތަކުގެ ތެރޭގައި ދިވެހިރާއްޖޭގެ ސިވިލް އޭވިއޭޝަން އޮތޯރިޓީން ނަގާފައިވާ ސެޓްފިކޭޝަނާއި ބޭރުގެ 11 ވައިގެ އުދުހުންތަކާ ބެހޭ އިދާރާއަކުން ދޫކޮށްފައިވާ ސެޓްފިކޭޝަން ހިމެނޭކަމަށް ޤަައުމީ އެއާލައިނުން ވިދާޅުވިއެވެ.
މި ސެޓްފިކޭޝަނާއެކު ޔޫރަޕުގައި ރަޖިސްޓްރީކޮށްފައިވާ މަތިންދާބޯޓުތައް މަރާމާތުކޮށް ބެލެހެއްޓުމުގެ ހުއްދަ ޤައުމީ އެއާލައިނަށް ލިބޭނެއެވެ. އެ ކުންފުނިން ބުނީ އެކަމުގެ ސަބަބުން ކުންފުނީގެ ޚިދުމަތްތައް ވަރަށް ބޮޑަށް ފުޅާކުރެވިގެންދާނެ ކަމަށެވެ.
މިހާރުވެސް ވެލާނާ އިންޓަނޭޝަނަލް އެއާޕޯޓަށް ދަތުރުކުރާ ގިނަ ބައިނަލްއަޤުވާމީ އެއާލައިންތަކަކަށް މެއިންޓެނެންސް ޚިދުމަތް އެ ކުންފުނިން ފޯރުކޮށްދެމުންދާކަން ފާހަގަކުރައްވައި މޯލްޑިވިއަނުން ވިދާޅުވީ މި ސެޓްފިކޭޝަނާއެކު ބައިނަލްއަޤުވާމީ އިތުރު އެއާލައިންތަކަށް ޚިދުމަތް ފޯރުކޮށްދޭން ފެށޭނެ ކަމަށެވެ.
އެ ކުންފުނީގެ ޑިރެކްޓާ އޮފް އިންޖިނިއަރިން އޮޕަރޭޝަންސް މުޙައްމަދު ޙަސަން ވިދާޅުވި ގޮތުގައި މި ކާމިޔާބުން ދައްކައިދެނީ ބައިނަލްއަޤުވާމީ މިންގަނޑުތަކާ އެއްހަމައަށް މަސައްކަތްކޮށް، މެއިންޓެނެންސް ޚިދުމަތް ފޯރުކޮށްދިނުމުގެ ޤާބިލުކަން ޤައުމީ އެއާލައިނުގައި ހުރިކަން ކަމަށެވެ. އަދި އެކަމުގެ ސަބަބުން އެއާކްރާފްޓު މެއިންޓެނެންސް އިންޖިނިއަރުންނާއި މެކޭނިކުންނާއި ވައިގެ އުދުހުންތަކުގެ އިތުރު ފަންނުވެރިންނަށް ވަޒީފާގެ ފުރުޞަތުތައް ފަހިވާނެކަމަށްވެސް އޭނާ ވިދާޅުވިއެވެ.
މިހާރު ޤައުމީ އެއާލައިން ހިންގާ އައިލެންޑް އޭވިއޭޝަނުން ބައިނަލްއަޤުވާމީ 30 އެއާލައިނަކަށް މެއިންޓެނެންސް ޚިދުމަތް ފޯރުކޮށްދެއެވެ. ޔޫރަޕުގެ މި ސެޓްފިކޭޝަނާއެކު ޤައުމީ އެއާލައިނަކީ މަތިންދާބޯޓު މެއިންޓެއިންކުރުމުގެ ޞިނާޢަތުގައި މުހިއްމު ހިއްސާދާރަކަށްވާނެކަމަށް އެ ކުންފުނިން ވިދާޅުވެއެވެ.
ޤައުމީ އެއާލައިނުގެ މިކާމިޔާބަށް މަރުޙަބާ ވިދާޅުވެ އެކްސްގައި ކުރެއްވި ޕޯސްޓެއްގައި ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުޙައްމަދު އަމީނު ވިދާޅުވީ ވައިގެ އުދުހުންތަކުގެ ދާއިރާގެ މެއިންޓެނެންސްގައި މިއީ ރާއްޖެއަށް ޙާޞިލުކުރެވުނު މުހިއްމު ކާމިޔާބެއް ކަމަށެވެ.
އިތުރަށް އަމީނު ވިދާޅުވީ ޤައުމީ އެއާލައިން އިޞްލާޙުކުރައްވައި ޒަމާނާ ފައިހަމަކުރާ އެއާލައިނަކަށް ހެއްދެވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފައްޓަވާފައިވާ މަސައްކަތްޕުޅުގެ ތެރެއިން ޙާޞިލުވި މިކާމިޔާބަކީ ރާއްޖޭގެ ވައިގެ އުދުހުމުގެ ޞިނާޢަތް އިތުރަށް ވަރުގަދަކޮށްދޭނެ ކާމިޔާބެއް ކަމަށެވެ. އަދި މިކާމިޔާބު ޙާޞިލުވުމުގައި ރައީސްގެ ލީޑާޝިޕުގެ ދައުރު ފާހަގަކުރައްވައި އެމަނިކުފާނަށް މިނިސްޓަރު ޝުކުރު އަދާކުރެއްވިއެވެ.
ޤައުމީ އެއާލައިނަށް މިސެޓްފިކޭޝަން ލިބުނުއިރު އެ އެއާލައިނުގެ އުދުހުންތައް އިތުރުކޮށް، ބައިނަލްއަޤުވާމީ ދަތުރުފަތުރުގައި އެ ކުންފުނީގެ ހިއްސާ ފުޅާކުރުމަށް ވައިޑްބޮޑީ އެއާކްރާފްޓުތައް ގެނައުމުގެ މަސައްކަތް މިހާރު ފައްޓަވާފައިވެއެވެ. އެގޮތުން ފުރަތަމަ ގެނައި ވައިޑްބޮޑީ މަތިންދާބޯޓު އަންނަނީ ޗައިނާގެ ތިން ސިޓީއަކަށް ދަތުރުކުރަމުންނެވެ.
އަންނަ އޮކްޓޯބަރު މަހުގައި އިތުރު ވައިޑް ބޮޑީ މަތިންދާބޯޓެއް ގެންނަވައި އިތުރު މަންޒިލުތަކަށް ޤައުމީ އެއާލައިނުގެ ބައިނަލްއަޤުވާމީ ދަތުރުތައް ފަށަންވަނީ ނިންމަވާފައެވެ.