ENGLISH

04 އޭޕްރީލު 2025

Advertisement

ޗައިނާ ފަތުރުވެރިންގެ ޢަދަދު ބައިލައްކައިން މައްޗަށް، ޖުމްލަ ފަތުރުވެރިންގެ ޢަދަދު ތިން ލައްކައާ ގާތަށް

13 ފެބްރުއަރީ 2025

|

ޝިފްޒާން އަޙްމަދު

ވެލާނާ އިންޓަނޭޝަނަލް އެއާޕޯޓުގައި ފަތުރުވެރިންތަކެއް، ފޮޓޯ: ގޫގްލް

މި އަހަރުގެ ޖަނަވަރީ އެއްވަނަ ދުވަހުން ފެށިގެން ފެބްރުއަރީ މަހުގެ 11 ވަނަ ދުވަހާ ހަމައަށް ރާއްޖެއަށް އައި ޗައިނާ ފަތުރުވެރިންގެ ޢަދަދު ބައިލައްކައަށްވުރެ މައްޗަށް އަރައި، ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ ޢަދަދު ތިން ލައްކައާ ކައިރިއަށް އިތުރުވެފައިވާކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. 

ޓޫރިޒަމް މިނިސްޓްރީން ޢާންމުކޮށްފައިވާ ތަފާސްހިސާބުތަކަށް ބަލާއިރު ރާއްޖެއަށް މިހާރު އެންމެ ގިނަ ޓޫރިސްޓުން އެ ޤައުމަކުން އަންނަ ޗައިނާއިން، އެ މުއްދަތުގައި ރާއްޖެއަށް 50،330 ފަތުރުވެރިން އައިސްފައިވެއެވެ. އެއީ ފާއިތުވި އަހަރު ރާއްޖެއަށް އެ ޤައުމުން ޒިޔާރަތްކުރި 35،654 ފަތުުރުވެރިންނަށްވުރެ 41 އިންސައްތަ އިތުރު ޢަދަދެކެވެ.

ޗައިނާގެ އިތުރަށް ރަޝިޔާއިން އެ މުއްދަތުގައި އައި ފަތުރުވެރިންގެ ޢަދަދުވެސް ފާއިތުވި އަހަރާ އަޅާބަލާއިރު 10.8 އިންސައްތަ އިތުރުވެފައިވާކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. 

މިނިސްޓްރީން ޢާންމުކޮށްފައިވާ ތަފާސްހިސާބތަކަށް ބަލާއިރު 11 ފެބްރުއަރީއާ ހަމައަށް މި އަހަރު ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު 295،762 އަށް އަރައެވެ. އެއީ ފާއިތުވި އަހަރުގެ އެ މުހުލަތުގައި ރާއްޖެއަށް ޒިޔާރަތްކުރި 231،526 ފަތުރުވެރިންނާ އަޅާބަލާއިރު 9.7 އިންސައްތަ އިތުރު ޢަދަދެކެވެ. 

އޭގެ އިތުރަށް މި އަހަރުގެ އެ މުއްދަތުގައި އެވެރެޖުކޮށް ދުވާލަކު 7،214 ފަތުރުވެރިން ރާއްޖެއަށް އައިސްފައިވާއިރު، އެއީ ނިމުނު އަހަރުގެ އެ މުއްދަތުގައި އެވެރެޖުކޮށް ދުވާލަކު އައި ފަތުރުވެރިންނަށްވުރެ 9.8 އިންސައްތަ އިތުރު ޢަދަދެކެވެ. 

މި އަހަރު ރާއްޖެއަށް އައި 295،762 ފަތުރުވެރިންގެ ތެރެއިން 205،172 މީހުން ނުވަތަ ޖުމްލަ ފަތުރުވެރިންގެ 69.4 އިންސައްތަ މީހުން ދިޔައީ ރިސޯޓުތަކަށެވެ. އަދި ފަތުރުވެރިންގެ 25.6 އިންސައްތަ މީހުން ނުވަތަ 75،706 ފަތުރުވެރިން އައިސްފައިވަނީ ގެސްޓުހައުސްތަކަށެވެ. 

މި މުއްދަތުގައި 172 ރިސޯޓެއްގެ 42،454 އެނދާއި، 15 ހޮޓަލެއްގެ 2،032 އެނދާއި، 793 ގެސްޓުހައުސްއެއްގެ 13،381 އެނދާއި، 154 ސަފާރީ އުޅަނދެއްގެ 3،128 އެނދާއެކު ޖުމްލަ 60،995 އެނދު އޮޕަރޭޝަނުގައި ހުރިކަމަށް ތަފާސްހިސާބުތަކުން ދައްކައެވެ. 

ފާއިތުވި އަހަރު ދެ މިލިއަން ފަތުރުވެރިން ރާއްޖެއަށް ޒިޔާރަތްކުރިއިރު މި އަހަރަށް ސަރުކާރުން ކަނޑައަޅުއްވާފައިވާ އަމާޒަކީ 2.3 މިލިއަން ޓޫރިސްޓުން ރާއްޖެއަށް ގެންނެވުމެވެ. އެކަމަށްޓަކައި ރާއްޖެ އިޝްތިހާރުކުރުމަށް ޚާއްޞަ މަސައްކަތްތަކެއް މި އަހަރު ތެރޭގައި ކުރެއްވުމަށް ޓޫރިޒަމް މިނިސްޓްރީއާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޮމްޕެނީން ވަނީ ނިންމަވާފައެވެ. 

ޚާއްޞަ ގޮތެއްގައި މި އަހަރުގެ ޓޫރިޒަމް ދަށް ދުވަސްވަރު ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު އިތުރުކުރުމަށް ޚާއްޞަ ޙަރަކާތްތަކެއް ހިންގަވާނެ ކަމުގައި އެމްއެމްޕީއާރުސީން މީގެ ކުރިން ވިދާޅުވެފައިވެއެވެ. 

ކިޔުންތެރިންގެ ހިޔާލު