ގެދޮރުގަތުމާއި ގެދޮރު ޢިމާރާތްކުރުމަށް ދޫކުރާ ފައިސާ އަށް ބީއެމްއެލް އިން ހެޔޮ ބަދަލުތަކެއް ގެނެސްފިއެވެ. 

ބީއެމްއެލް އިން މިއަދު ބޭއްވި ނޫސްވެރިންގެ ބައްދަލުވުމުގައި ދެެއްވި ޕްރެސެންޓޭޝަނެއްގައި ވަނީ ކަސްޓަމަރުންނަށް ދޫކުރާ ފައިސާގެ ޢަދަދު އިތުރުކުރުމާއި، މަޝްރޫޢުތައް ހިންގުމަށް އެކަށީގެންވާ ފައިސާ ލިބޭނެ ފުރުސަތު ތަނަވަސްކުރާނެ ކަމަށް ވިދާޅުވެފައިވެއެވެ. ސަރަހައްދީ ތަރައްޤީއަށް އިސްކަންދިނުމާއި ކުޑަ ރޭޓުތަކުގައި އިތުރު ފައިނޭންސިންގ ހޯދުމުގެ ފުރުސަތު ހޯދައިދޭނެ ކަމަށް ވެސް ބީއެމްއެލް އިސްލާމިކް އިން ވިދާޅުވެފައިވެއެވެ.

ބީއެމްއެލް އިސްލާމިކް އިން ވިދާޅުވީ މި ބަދަލުތަކާއެކު ގިނަ ފަރާތްތަކަށް ލޯނު ހަމަޖެހިގެންދާނެ ކަމަށެވެ. އަދި މި ބަދަލާއެކު ބައެއް ޕްރޮޑަކްޓްތަކުގެ މުއްދަތު އިތުރުކުރުމުގެ ސަބަބުން މަހެއްގެ މައްޗަށް ދައްކަންޖެހޭ އަދަދު ކުޑަވެގެންދާނެ އެވެ. އަދި އިޤްތިސާދީ ދުވެލި ހަލުވިވެ، ކޮންސްޓްރަކްޝަން ފަދަ ދާއިރާތަކަށް ވެސް އެކަމުގެ މަންފާކުރާނެ ކަމަށް ބޭންކް ފާހަގަކުރެއްވިއެވެ. 

ހޯމް ޕަރޗޭސް ފައިނޭންސިންގް ( ގެދޮރު ގަތުމަށް)

· ބިން، ގަރާޖް އަދި ޕާކިން ސްޕޭސް ގަނެވޭނެ ގޮތް ހަމަޖެއްސުން

· ތިން މިލިއަން ރުފިޔާއާ ހަމަޔަށް އަގުހުރި ޕްރޮޖެކްޓްތަކަށް އަމިއްލައަށް ކުރަންޖެހޭ ޚަރަދު %10 އަށް ދަށްކުރުން

ހޯމް ކޮންސްޓްރަކްޝަން ފައިނޭންސިންގ ( ގެދޮރު މަރާމާތްކުރުން)

·  ފައިނޭންސް އަނބުރާ ދެއްކުމުގެ މުއްދަތު 15 އަހަރުން 20 އަހަރަށް އިތުރުކުރުން

·  ފައިނޭންސް ނެގޭ އެންމެ މަތީ އަދަދު 15 މިލިއަން ރުފިޔާއިން 45 މިލިއަން ރުފިޔާއަށް އިތުރުކުރުން

·  މަޝްރޫޢުން ލިބޭ އާމްދަނީ މިހާރު ބަލައިގަތުން

ހޯމް ބިލްޑް ފައިނޭންސިންގް ( ގެދޮރު އިމާރާތްކުރުމާއި މަރާމާތުކުރުމަށް)

·  ފައިނޭންސް ނެގޭ އެންމެ މަތީ އަދަދު 2 މިލިއަން ރުފިޔާއަށް އިތުރުކުރުން

·  އަލަށް ފައިނޭންސް ނަގާ ފަރާތްތަކަށްވެސް މި ފައިނޭންސަށް އެދި ހުށަހެޅޭ ގޮތް ހަމަޖެއްސުން.

·  ގިނަ ކަސްޓަމަރުންނަށް ފުރުސަތު ދިނުމަށް ފައިނޭންސަށް ޝަރުތު ހަމަވާ އާމްދަނީގެ އަދަދު ދަށްކުރުން

ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ މުހައްމަދު ޝަރީފް ވިދާޅުވީ، ރާއްޖޭގައި ދޫކުރާ އެންމެ ކުޑަ ރޭޓުގައި ހޯމް ފައިނޭންސިންގް ދޫކުރަނީ ބޭންކް އޮފް މޯލްޑިވްސްއިން ކަމަށެވެ. އަދި މިއަދު ގެނެވުނު ބަދަލާއެކު ރާއްޖޭގެ އެކި ކަންކޮޅުތަކުގައި ދިރިއުޅެމުންދާ އާންމު ފަރުދުންނާއި އާއިލާތަކުގެ ތެރެއިން މިހާރަށް ވުރެ ގިނަ އަދަދެއްގެ ބަޔަކަށް ގެދޮވެރިންނަށް ވުމަށް ބޭނުންވާ ފައިނޭންސިންގ ހޯދުމަށް މަގުފަހިވެގެންދާނެކަމަށް ވެސް އޭނާ ވިދާޅުވިއެވެ.