ރާއްޖޭގެ ރިސޯޓްތަކުން ހިންގާ ދެމެހެއްޓެނިވި ތަރައްޤީ އާއި ތިމާވެއްޓާ ގުޅުންހުރި މަޝްރޫޢުތަކަށް ބޭނުންވާ މާލީ އެހީތެރިކަން ފޯރުކޮށްދިނުމުގެ ގޮތުން ބޭންކް އޮފް މޯލްޑިވްސް އިން "ގްރީން ރިސޯޓް ފައިނޭންސިންގ" މިއަދު ތަޢާރަފްކޮށްފިއެވެ. 

ބީއެމްއެލްއިން ގްރީން ރިސޯޓް ފައިނޭންސިންގ ތަޢާރަފްކުރީ މޯލްޑިވްސް އެސޯސިއޭޝަން އޮފް ޓޫރިޒަމް (މަޓީ) ގެ އަހަރީ އާއްމު ބައްދަލުވުމުގައެވެ. ޚިދުމަތް ތަޢާރަފްކޮށްދެއްވީ، ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް އަދި ކްރައުން އެންޑް ޗަމްޕާ ރިސޯޓްސްގެ ޗެއާމަން ޙުސައިން ޢަފީފް އެވެ.  

މާލީ އެހީތެރިކަން ފޯރުކޮށްދޭ ފައިނޭންސިންގެ ދަށުން 50 މިލިއަން ރުފިޔާއާ ހަމައަށް އޯވަރޑްރާފްޓް ފެސިލިޓީ 6.5 އިންސައްތަ އިންޓަރެސްޓް ރޭޓުގައި ލިބޭނެއެވެ. އަދި، ކާޑު މެޝިނުން ރިސޯޓަށް ލިބޭ ފައިސާއިން ފައިނޭންސް އަނބުރާ ދެއްކުމުގައި ފަސޭހަ ގޮތްތަކެއް ވަނީ ހަމަޖައްސައިފައެވެ. 

ގްރީން ރިސޯޓް ފައިނޭންސިންގ ފެސިލިޓީގެ ދަށުން ރިސޯޓުތަކަށް، މާލީ އެހީ ދޫކުރާނީ ގޮނޑުދޮށް ޙިމާޔަތްކުރުމާއި އެނަރޖީ އެފިޝެންޓް އިކުއިޕްމަންޓް ހޯދުމުގެ އިތުރުން ރީފޮރެސްޓްރޭޝަން އަދި ކުނި މެނޭޖްކުރުން ފަދަ ދެމެހެއްޓެނިވި މަޝްރޫޢުތައް ހިންގުމަށް ކަމަށް ބީއެމްއެލް އިން ވިދާޅުވެފައިވެއެވެ. 

ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ، ރާއްޖޭގެ އެންމެ ބޮޑު އަދި އެންމެ ކުރިއަރާފައިވާ ބޭންކުގެ ޙައިސިއްޔަތުން، ފަތުރުވެރިކަމުގެ ދާއިރާއަށް ބޭނުންވާފަދަ ބޭންކިންގ ޚިދުމަތްތަކާއި، ފައިސާ ބަލައިގަތުމުގެ އެންމެ ޒަމާނީ ޙައްލުތައް ހޯދައިދިނުމަށް ބީއެމްއެލް އަބަދުވެސް ތައްޔާރަށް އޮންނާނެ ކަމަށެވެ.

ފައިނޭންސިންގ ފެސިލިޓީ ފަރުމާކޮށްފައި ވަނީ ރިސޯޓުތަކަށް ބޭނުންވާ ދެމެހެއްޓެނިވި ޙައްލުތަކެއް ޤާއިމުކުރުމާއެކު، ހިންގުމުގެ ޚަރަދުތައް ފަސޭހައިން މެނޭޖްކުރެވޭނެ ގޮތަށް ކަމަށް މުޙައްމަދު ޝަރީފް ވިދާޅުވިއެވެ. 

ބީއެމްއެލް އިން ވިދާޅުވީ ގްރީން ރިސޯޓް ފައިނޭންސިންއާ ގުޅޭ މަޢުލޫމާތު، ބޭންކުގެ ކޯޕަރޭޓް ކަސްޓަމަރުންނަށް ޚާއްޞަކޮށްފައިވާ ރިލޭޝަންޝިޕް މެނޭޖަރުންނާ ގުޅުއްވައިގެން ލިބޭނެ ކަމަށެވެ.