މިދިޔަ ހަފްތާގައި 35.5 މިލިއަން ރުފިޔާ މަސްވެރިންނަށް މިފްކޯ އިން ދޫކޮށްފިއެވެ. 

ސަރުކާރުގެ މަސްކުންފުނީގެ ތަފާސް ހިސާބުތަކުން ދައްކާ ގޮތުގައި 35.5 މިލިއަން ރުފިޔާ ދޫކޮށްފައި ވަނީ 452 ދޯންޏަކުން ކިރުވި މަހަށެވެ.

މިއީ އޭގެ ކުރީ ހަފްތާގައި މަސްވެރިންނަށް ދޫކޮށްފައިވާ ފައިސާގެ އަދަދާ އަޅާ ބަލާއިރު 110 އިންސައްތަ އިތުރު އަދަދެކެވެ.

މިދިޔަ ޖަނަވަރީ މަހުގެ ފަހު ހަފްތާގައި 309 މަސް ދޯންޏަކަށް 16.9 މިލިޔަން ރުފިޔާ ދޫކޮށްފައިވާ ކަމަށް މިފްކޯގެ ހިސާބުތަކުން ދައްކައެވެ. އެހެންކަމުން ނިމުނު ހަފްތާގައި މިފްކޯއަށް މަސް ކިރުވާފައިވާ މަސް ދޯނިތަކުގެ އަދަދު ވަނީ 46 އިންސައްތަ އިތުރުވެފައެވެ.

އަދި މި އަހަރުގެ ޖަނަވަރީ މަހު މަސްވެރިން ކިރުވާފައިވާ މަހަށް މިފްކޯއިން ވަނީ 117 މިލިޔަން ރުފިޔާ ދޫކޮށްފައެވެ. މިއީ މިދިޔަ ޑިސެމްބަރު މަހާ އަޅާބަލާއިރު 122 އިންސައްތައިގެ އިތުރުވުމެކެވެ. ޑިސެމްބަރު މަހު މިފްކޯއިން މަސްވެރިންނަށް ދޫކޮށްފައިވަނީ 52 މިލިޔަން ރުފިޔާއެވެ.

މިދިޔަ ބުރާސްފަތި ދުވަހަކީ ފަހުގެ ތާރީޚެއްގައި މިފްކޯ އިން މަސްވެރިންނަށް އެންމެ ގިނަ އަދަދަކަށް ފައިސާ ދޫކުރި ދުވަހެވެ. އެ ދުވަހު މިފްކޯއިން ވަނީ މަސްވެރިންނަށް 6.5 މިލިޔަން ރުފިޔާ ދޫކޮށްފައެވެ.

މިފްކޯއިން އަންނަނީ، މަސްވެރިން ކިރުވާ މަހަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، 48 ގަޑިއިރުގެ ތެރޭގައި ފައިސާ ދޫކުރަމުންނެވެ. މި ވަޢުދު ތަންފީޒުކުރަން ފަށާފައިވަނީ ފާއިތުވި މަސްވެރިންގެ ދުވަހުން ފެށިގެންނެވެ. މި އާ އުސޫލާ ގުޅިގެން މަސްވެރިކަމަށް ނުކުންނަ ދޯނިފަހަރުގެ އަދަދު އިތުރުވަމުން އަންނަ ކަމަށް މިފްކޯއިން ހާމަކުރެއެވެ.

މީގެ އިތުރުން، މަސްވެރިންނަށް ޤަވާއިދުން ފައިސާ ދޭން ފެށުމުން، ދޯނިފަހަރުން ފޭބި ޒުވާނުން ދޯނިތަކަށް އަނބުރާ އަންނަން ފަށާފައިވާ ކަމަށް ވެސް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވަނީ ވިދާޅުވެފައެވެ.

މަސްވެރި ސިނާޢަތަށް މިދިޔަ 40 އަހަރު ނުގެނެވިވާ ތަރައްޤީ މި ސަރުކާރުން ގެންނަކަން ފާހަގަކުރައްވާ ވަޒީރު ވިދާޅުވީ މިދާއިރާގައި ހުރި މައްސަލަތަކަށް ސަރުކާރުގެ ފުރަތަމަ ތިން އަހަރުގެ ތެރޭގައި ހައްލު ލިބިގެންދާނެ ކަމަށެވެ.

ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެން ދިވެހިރާއްޖޭގެ މަސްވެރިކަމުގެ ސިނާޢަތް ތަރައްޤީކޮށް ކުރިއެރުވުމަށްޓަކައި، ވަނީ މިފްކޯއަށް ގިނަ ބަދަލުތަކެއް ގެންނަވާފައެވެ.