ރާއްޖެއިން ބޭރުގެ މަންޒިލްތަކަށް ކުރާ ދަތުރުތައް އިތުރު ކުރުމަށްޓަކައި މޯލްޑިވިއަންއިން އެއާބަސްގެ މަތިންދާބޯޓެއް ހޯދަން އިއުލާންކޮށްފިއެވެ.

މޯލްޑިވިއަން އިން ގެޒެޓުގައި ކޮށްފައިވާ އިއުލާނުގައި ބުނެފައިވަނީ، ހޯދަން ބޭނުންވަނީ އެއާބަސް އޭ330-200 މަރުކާގެ އެއް މަތިންދާބޯޓު ކަމަށާއި، މަތިންދާބޯޓު ކުއްޔަށް ނަގާނީ ފަސް އަހަރުގެ މުއްދަތަކަށް ކަމަށެވެ.

ބިޑު ހުށަހެޅުމުގެ ސުންގަޑިއަކީ މާރިޗު މަހުގެ 7 ވަނަ ދުވަހު އެވެ. ބިޑްތަކުގެ އިވެލުއޭޝަން ފުރިހަމަކުރުމަށްފަހު ބިޑް ކާމިޔާބުކުރާ ފަރާތް ކަނޑައެޅުމަށް ނިންމާފައިވަނީ މާރިޗު މަހުގެ 25 ވަނަ ދުވަހުއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް މިއަހަރުގެ ޖަނަވަރީ މަހުގެ ހަ ވަނަ ދުވަހު ވެލާނާ އިންޓަނޭޝަނަލް އެއާޕޯޓަށް ޖެއްސީ ދިވެހި ޕައިލެޓުންނާއެކުއެވެ. އެ ބޯޓު އަންނަނީ ޗައިނާގެ ބެއިޖިންގ އާއި ޝެންހާއީ އަދި ޗެންގްޑޫއަށް ދަތުރުތައް ކުރަމުންނެވެ.

ޖަނަވަރީ މަހު އިތުރުކުރި ބޯޓާއެކު ގައުމީ އެއާލައިން މޯލްޑިވިއަން ފްލީޓުގައި 24 ބޯޓު އެބައޮތެވެ. އޭގެތެރެއިން އެއާބަސް އޭ330 ގެ އިތުރުން މި ވަގުތު ރާއްޖޭން ބޭރަށް ދަތުރުކުރަނީ އެއާބަސް އޭ320 މަރުކާގެ ބޯޓެވެ.

މި އަހަރުގެ ރިޔާސީ ބަޔާން އިއްވެވި ރައްޔިތުންގެ މަޖިލީހުގެ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ޗައިނާގެ އިތުރު ސިޓީތަކަށާއި އެހެނިހެން ސަރަޙައްދުތަކަށް ޤައުމީ އެއަރލައިންގެ އިންޓަރނޭޝަނަލް އޮޕަރޭޝަން ފުޅާ ކުރުމަށް މަސައްކަތްތަކެއް ކުރަމުންދާ ކަމަށެވެ. އަދި، އިތުރު ވައިޑްބޮޑީ އެއަރކްރާފްޓެއް މިއަހަރުގެ އޮކްޓޫބަރު މަހު ރާއްޖެ ގެނައުމަށް ހަމަޖެހިފައިވާކަމަށާއި، އޭގެ ސަބަބުން ޔޫރަޕްގެ ބައެއް މަންޒިލްތަކަށް ވެސް ޤައުމީ އެއަރލައިންގައި ސީދާ ރާއްޖޭއިން އުދުހެން ފަށާނެކަމަށް ރަޢީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވެއެވެ.