ENGLISH
04 އޭޕްރީލު 2025
ފެބްރުއަރީގެ ފުރަތަމަ ފަހެއް؛ އެވެރެޖުކޮށް ދުވާލަކު ޓޫރިސްޓުން އަންނަ މިންވަރު %11.8 އިތުރުވެއްޖެ
09 ފެބްރުއަރީ 2025
|
ވެލާނާ އިންޓަނޭޝަނަލް އެއާޕޯޓަށް ފަތުރުވެރިންތަކެއް އައިސް ފައިބަނީ
އެންމެ މަޤްބޫލު
ހިނގަމުންދާ ފެބްރުއަރީ މަހުގެ ފުރަތަމަ ފަސް ދުވަހު ރާއްޖެއަށް އެވެރެޖުކޮށް ދުވާލަކު އައި ޓޫރިސްޓުންގެ ޢަދަދު ފާއިތުވި އަހަރުގެ އެ މުއްދަތާ އަޅާބަލާއިރު 11.8 އިންސައްތަ އިތުރުވެއްޖެއެވެ.
ޓޫރިޒަމް މިނިސްޓްރީން ޢާންމުކޮށްފައިވާ ތަފާސްހިސާބުތަކަށް ބަލާއިރު މި އަހަރުގެ ފެެބްރުއަރީ މަހުގެ ފުރަތަމަ ފަސް ދުވަހު 33،681 ފަތުރުވެރިން ރާއްޖެއަށް އައިސްފައިވެއެވެ. 2024 ވަނަ އަހަރުގެ ފެބްރުއަރީ މަހުގެ ފުރަތަމަ ފަސް ދުވަހު ރާއްޖެއަށް ޒިޔާރަތްކުރީ 30،117 ފަތުރުވެރިންނެވެ. އެހެންކަމުން މިއަހަރުގެ ފެބްރުއަރީ މަހުގެ ފުރަތަމަ ފަސް ދުވަހު ރާއްޖެއަށް އައި ފަތުރުވެރިންގެ ޢަދަދު 11.8 އިންސައްތަ އިތުރުވެފައިވެއެވެ.
އެ މުއްދަތުގައި މި އަހަރު އެވެރެޖުކޮށް ދުވާލެއްގެ މައްޗަށް 8،420 ފަތުރުވެރިން އައިސްފައިވާއިރު ފާއިތުވި އަހަރުގެ އެ މުހުލަތުގައި ރާއްޖެއަށް ދުވާލެއްގެ މައްޗަށް އެވެރެޖުކޮށް އައިސްފައިވަނީ 7،529 ފަތުރުވެރިންނެވެ.
މިދިޔަ އަހަރުގެ ޖަނަވަރީ އެއްވަނަ ދުވަހުން ފެބްރުއަރީ ފަސްވަނަ ދުވަހާ ހަމައަށް ރާއްޖެއަށް އައިސްފައިވަނީ 222،502 ފަތުރުވެރިންނެވެ. މިއަހަރުގެ އެ މުއްދަތުގައި ޖުމްލަ 248,545 ފަތުރުވެރިން ރާއްޖެއަށް އައިސްފައިވެއެވެ. އަހަރުން އަހަރަށް ބަލާއިރު މިއަހަރު ރާއްޖެއަށް އައި ފަތުރުވެރިންގެ ޢަދަދު ނިމުނު އަހަރާ އަޅާބަލާއިރު 11.7 އިންސައްތަ އިތުރުވެފައިވެއެވެ.
މި އަހަރުގެ ފެބްރުއަރީ ފަހެއްގެ ނިޔަލަށް ރާއްޖެއަށް އެންމެ ގިނަ ފަތުރުވެރިން އައީ ޗައިނާއިންނެވެ. އެ ޤަައުމުން މި އަހަރު 43،206 ފަތުރުވެރިން ރާއްޖެއަށް އައިސްފައިވާއިރު ނިމުނު އަހަރު ޗައިނާއިން އެ މުއްދަތުގައި ރާއްޖެއަށް އައިސްފައިވަނީ 25،303 ފަތުރުވެރިންނެވެ. އެހެންކަމުން މި އަހަރު ޗައިނާއިން ޒިޔާރަތްކުރި ފަތުރުވެރިންގެ ޢަދަދު 70.7 އިންސައްތަ އިތުރުވެފައިވެއެވެ.
މި އަހަރާއި ފާއިތުވި އަހަރުވެސް ރާއްޖެއަށް އެންމެ ގިނައިން ފަތުރުވެރިން އައި ޤައުމުކަމަށްވާ ރަޝިޔާއިން މި އަހަރު 24،494 ފަތުރުވެރިން ރާއްޖެއަށް ޒިޔާރަތްކުރިއެވެ. އެއީ ފާއިތުވި އަހަރުގެ އެ މުއްދަތުގައި ރާއްޖެއަށް އައި ރަޝިޔާ ފަތުރުވެރިންނަށްވުރެ 8.4 އިންސައްތަ އިތުރު ޢަދަދެކެވެ.
ފެބްރުއަރީ ފަސްވަނަ ދުވަހުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ 69.7 އިންސައްތަ ފަތުރުވެރިން އައީ ރިސޯޓުތަކަށެވެ. އަދި އެ މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 25.4 އިންސައްތަ މީހުން ޗުއްޓީ ހޭދަކުރީ ގެސްޓުހައުސްތަކުގައެވެ.
އެ މުއްދަތުގައި 172 ރިސޯޓުގައި 42،456 އެނދާއި، 793 ގެސްޓުހައުސްގައި 13،381 އެނދާއި، 15 ހޮޓަލެއްގެ 2،032 އެނދާއި، 154 ސަފާރީ އުޅަނދެއްގެ 3،128 އެނދާއެކު ޖުމްލަ 60،995 އެނދު އޮޕަރޭޝަނުގައި ހުއްޓެވެ.
މިދިޔަ އަހަރު ރާއްޖެއަށް އެންމެ ގިނަ ފަތުރުވެރިން އައިސްފައިވާ މަހަކީ ފެބްރުއަރީ މަހެވެ. އެ މަހުގައި ޖުމްލަ 217،392 ފަތުރުވެރިން ރާއްޖެއަށް އައިސްފައިވެއެވެ. މި އަހަރުގެ ފެބްރުއަރީ މަަހުގެ މިހާތަނަށް ފަތުރުވެރިން އައި މިންވަރަށް ބަލާއިރު މި އަހަރުގެ ފެބްރުއަރީ މަހުގައި ރާއްޖެއަށް އަންނަ ފަތުރުވެރިންގެ ޢަދަދު އަންނަ އަހަރަށްވުރެ އިތުރުވާނެ ކަމުގައި ބެލެވެއެވެ.