ENGLISH

04 އޭޕްރީލު 2025

Advertisement

ޣައްޒާ އެއްބަސްވުމުގެ ފަސް ވަނަ ބުރުގެ ރަހީނުންނާއި ޤައިދީން މިނިވަން ކުރަން ތައްޔާރުވެއްޖެ

08 ފެބްރުއަރީ 2025

|

ހަސަން އާމިރު

ފަލަސްތީނުގެ ޣައްޒާގައި ހަނގުރާމަ ހުއްޓައިލުމުގެ އެއްބަސްވުމުގެ ފަސް ވަނަ ބުރުގައި ހިމެނޭ ރަހީނުންނާއި ޤައިދީން މިއަދުގެ ވަގުތެއްގައި މިނިވަންކުރަން ތައްޔާރުވެއްޖެއެވެ.

ފަސް ބުރުގައި މިނިވަން ކުރަން ހަމަޖެހިފައިވަނީ، ޙަމާސް ޖަމާޢަތުން ރަހީނުކޮށްފައިވާ އިތުރު ތިން މީހެކެވެ. އޭގެ ބަދަލުގައި އިޒްރޭލުގެ ޖަލުތަކުގައި ތިބި ފަލަސްތީނުގެ 183 ޤައިދީން މިނިވަންކުރާނެއެވެ.

އިޒްރޭލުން ޣައްޒާއަށް ހުއްޓުމެއްނެތި ޙަމަލާތައް ދޭން ފެށިތާ 15 މަސް ދުވަސް ފަހުން، ގިނަ ޤައުމުތަކެއް މެދުވެރިވެގެން، ސުލްޙައިގެ އެއްބަސްވުމެއް އެކުލަވާލައި، ޢަމަލުކުރަން ފަށާފައިވަނީ މިދިޔަ މަހުގެ 19 ވަނަ ދުވަހުއެވެ.

އެ އެއްބަސްވުމުގެ ދަށުން، ހަތަރު ފަހަރެއްގެ މަތިން ޙަމާސްއިން ރަހީނުކޮށްފައިވާ 18 މީހަކާއި، އިޒްރޭލުގެ ޖަލުތަކުން 600 އެއްހާ ފަލަސްތީނުގެ މީހުން ވަނީ މިނިވަންކޮށްފައެވެ.

އެއްބަސްވުމުގެ ފުރަތަމަ ފިޔަވަހީގެ ދަށުން 33 ރަހީނުން މިނިވަންކުރަން ހަމަޖެހިފައިވާއިރު، އިޒްރޭލުގެ ޖަލުތަކުން 1،900 އެއްހާ ފަލަސްތީނުގެ ޤައިދީން މިނިވަންކުރާނެ ކަމަށް މަޢުލޫމާތު ލިބިފައިވެއެވެ.

މި އެއްބަސްވުން ވަނީ ތިން ފިޔަވައްސަކަށް ބަހާލައިފައެވެ.

ރަހީނުންނާއި ޤައިދީން މިނިވަންކުރުމުގެ އިތުރުން، ޣައްޒާގައި މީހުން އެންމެ ގިނައިން ދިރިއުޅޭ ސަރަޙައްދުތަކުން އިޒްރޭލު ސިފައިން ފައިބާނެއެވެ.

މި އެއްބަސްވުމުގެ ދެވަނަ ފިޔަވަހީގެ މަޝްވަރާތައް އަންނަ ހޯމަ ދުވަހު ފެށުމަށް ވަނީ ހަމަޖެހިފައެވެ.

ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.

މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލު ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.

މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.

ކިޔުންތެރިންގެ ހިޔާލު