ސަރުކާރުން މިހާރު އަމާޒު ހިފާފައިވަނީ އިޤުތިޞާދީ ގޮތުން ލީޕަކަށް ނުވަތަ ޖަމްޕަކަށް ކަމުގައި ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ. 

ޒަމީރު މިފަދައިން ވިދާޅުވީ ބުރާސްފަތި ދުވަހު ރައްޔިތުންގެ މަޖިލީހުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނާ ގުޅިގެން ރޭ އިސްލާމިކް ޔުނިވަސިޓީ އޮފް މޯލްޑިވްސްގައި ބޭއްވި ފޯރަމުގައި ވާހަކަދައްކަވަމުންނެވެ. 

ޒަމީރު ވިދާޅުވެފައިވަނީ ރައީސް އިއްވެވި ރިޔާސީ ބަޔާނަކީ މިހާތަނަށް ރައީސަކު އިއްވެވި އެންމެ ތަފުސީލު ރިޔާސީ ބަޔާން ކަމަށެވެ. އަދި އެ ރިޔާސީ ބަޔާނުގައި ރައްޔިތުންނަށް ޙާޞިލުކޮށްދެއްވުމަށް ރައީސް ގަސްތުކުރައްވާ ކަންކަމުގެ ތަފުޞީލުތައް ވަރަށް ފުރިހަމަކޮށް ދިގުކޮށް ހިމަނުއްވާފައިވާކަމަށް ޒަމީރު ވިދާޅުވިއެވެ. 

ޒަމީރު ފާހަގަކުރެއްވި ގޮތުގައި ރައީސުލްޖުމްހޫރިއްޔާ ޑރ. މުޢިއްޒު ވެރިކަމާ ޙަވާލުވެވަޑައިގަތުމާ ވަރަށް ކައިރިވެފައިވަނިކޮށް އައިއެމްއެފް ފަދަ މާލީ އިދާރާތަކުން ނެރުނު ރިޕޯޓުތަކުގައި ބޮޑެތި މައްސަލަތައް ފާހަގަކޮށް، އެކަންކަމުން ދައުލަތުގެ މާލިއްޔަތަށް އައި ލޮޅުމުން އަރައިގަތުމަށް އަހަރެއްހައި ދުވަސް ހޭދަވެގެންގޮސްފައިވާ ކަމަށެވެ. 

"އައިއެމްއެފްއިން މިސާލަކަށް ވެރިކަން ބަދަލުވުމާ ވަރަށް ކައިރިވެފައި ހުއްޓައި ރިޕޯޓުތައް ނެރުނީ. ނެރުނުއިރުގައި އޭގައި ހުރި މައްސަލަތަކާ ހެދި އައި ޝޮކް، އެއާ ހެދި އަޅުގަނޑުމެންނަށް އެއް އަހަރު ގެއްލިގެންދިޔައީ އެކަންކަމުން ސަލާމަތްވާން،" ޒަމީރު ވިދާޅުވިއެވެ. 

ޒަމީރު އިތުރަށް ވިދާޅުވީ ރައީސް އިއްވެވި ރިޔާސީ ބަޔާނުން އެމަނިކުފާނު މިހާރު ރާއްވަވާފައިވަނީ "ލީޕެއް" ނުވަތަ "ޖަމްޕެއް"ގެ ގޮތުގައި ކަންކަން ކުރިއަށްގެންދެވުމަށްކަން ސާފުކޮށް އެނގިގެން ގޮސްފައިވާ ކަމަށެވެ. އަދި ރައީސް ރާއްޖެ ތެރެއަށް ކުރައްވާ ދަތުރުފުޅުތަކުގައިވެސް އެކަންކަން ފާހަގަކުރައްވަމުންދާކަން ޒަމީރު ފާހަގަކުރެއްވިއެވެ. 

އިތުރަށް ޒަމީރު ވިދާޅުވީ ރިޔާސީ ބަޔާނުގައި ރައީސް ވިދާޅުވެދެއްވާފައިވަނީ ފާއިތުވި އަހަރުތަކުގައި ރާއްޖޭގެ މާލިއްޔަތަށް ދީފައިވާ ގެއްލުންތަކުން އަރައިގަނެ ދެމެހެެއްޓެނެވި ތަރައްޤީ ހާސިލުކުރުމަށް އެމަނިކުފާނު ގެންގުޅުއްވާ ޕްލޭނާއި، ރައްޔިތުންނަށްޓަކައި އެ ރައްޔިތުން ބޭނުންވާ ކަންކަން ހާސިލުކުރުމަށް ކުރެވޭނެ މަސައްކަތްތައް ކަމަށެވެ.