މޯލްޑިވްސް އިސްލާމިކް ބެންކް (އެމްއައިބީ) އަށް މިދިޔަ އަހަރު ފައިދާގެ ގޮތުގައި 282 މިލިއަން ރުފިޔާ ލިބިފައިވާ ކަމަށް އެ ކުންފުނީގެ ވަގުތީ ހިސާބުތަކުން ދައްކައިފިއެވެ.

އެމްއައިބީން ވިދާޅުވި ގޮތުގައި މިދިޔަ އަހަރުގެ ނޮވެމްބަރު މަހު އެ ބެންކުގެ އެސެޓް ވެލިއު 10 ބިލިއަން ރުފިޔާ ހުރަސް ކުރިއިރު، މިދިޔަ އަހަރު ނިމުނީ 11.4 ބިލިއަން ރުފިޔާގެ އެސެޓް ވެލިއުއަކާ އެކުގައެވެ.

އެމްއައިބީގެ މިދިޔަ އަހަރުގެ އެންމެ ފަހު ކްއާޓާގެ ރިޕޯޓުގައި ބުނެފައިވާ ގޮތުގައި ރައްޔިތުންގެ އިތުބާރާއި ބެންކިން ޚިދުމަތްތަކަށް އެ ބެންކުން ގެނެސްދީފައިވާ ލުއި ފަސޭހަތަކާ އެކު، 2024 ވަނަ އަހަރަކީ އެމްއައިބީއަށް ވަރަށް ކާމިޔާބު އަހަރެކެވެ. 

އެމްއައިބީއަކީ ރާއްޖޭގައި ބެންކަށް ނުގޮސް ވަގުތުން އެކައުންޓު ހުޅުވުމުގެ ހިދުމަތް ދޭ ހަމަ އެކަނި ބެންކެވެ. އެ ބެންކުގެ އަމިއްލަ އެކައުންޓުގެ އިތުރުން ވިޔަފާރިތަކަށް ކުންފުނި އެކައުންޓު ވެސް ބެންކަށް ނުގޮސް ހުޅުވެ އެވެ.

އެމްއައިބީން މިދިޔަ ކުއާޓަރުގައި އެކަނި ވެސް ބައިނަލްއަގުވާމީ ދެ އެވޯޑެއް ލިބިފައިވެ އެވެ. އެ ކުރިއެރުންތަކާ އެކު ބެންކުން މި އަހަރު ވެސް ގިނަ ކަންތައްތަކެއް ކުރަން ރާވާފައިވާ ކަމަށް އެމްއައިބީން ވިދާޅުވެއެވެ.