މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މެނޭޖިން ޑިރެކްޓަރުގެ މަގާމަށް، ކުރިން ފުލުހުންގެ ޑެޕިޔުޓީ ކޮމިޝަނާކަމާއި އައިޖީއެމްއެޗްގެ ޑެޕިއުޓީ ސީއީއޯކަން ކުރެއްވި ހ. ހަބަރުގެ، މުޙައްމަދު ރިޝްވާން މިއަދު އައްޔަނުކުރައްވައިފި އެވެ.

ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޑް (ޕީސީބީ) އިން ވިދާޅުވީ ރިޝްވާން އައްޔަނުކުރީ އެމްޕީއެލްގެ އެމްޑީކަމުގެ އިތުރުން ބޯޑު ޑިރެކްޓަރު ކަމުގެ މަގާމަށެވެ.

އައިޖީއެމްއެޗްގެ ޑެޕިއުޓީ ސީއީއޯއަކަށް ރިޝްވާން ހުންނެވީ ކުރީގެ ރައީސް އަބްދުﷲ ޔާމީންގެ ވެރިކަމުގައެވެ. އޭގެ ކުރިން އޭނާ ހުންނެވީ ފުލުހުންގެ ޑެޕިއުޓީ ކޮމިޝަނަރަކަށެވެ. އެ މަގާމުން އޭނާ އިސްތިއުފާ ދެއްވީ ޖުލައި، 2011 ގަ އެވެ. މިދިޔަ ދުވަސްތަކުގައި ރިޝްވާން އުޅުއްވީ އަމިއްލަ ވިޔަފާރީގެ ތެރޭގަ އެވެ.

ވިޔަފާރި ބަނދަރު ހިންގާ ކުންފުނީގެ މެނޭޖިން ޑިރެކްޓަރުގެ މަގާމު ހުސްވީ، އެ ޒިންމާތައް އަދާކުރައްވަމުން ގެންދެވި މުހައްމަދު ވަޖީހު އިބްރާހިމް މިދިޔަ އާދިއްތަ ދުވަހުގެ ރޭ މަގާމުން ވަކިކުރުމުންނެވެ.