ENGLISH
06 އޭޕްރީލު 2025
ފަތުރުވެރިކަން ޕްރޮމޯޓްކުރަން ރަޝިއާގައި 'ގްލޯބަލް ރޯޑްޝޯ ސީރީޒް" ފަށައިފި
04 ފެބްރުއަރީ 2025
|
ރަޝިއާގައި މިހާރު ކުރިއަށްދާ ވިޒިޓް މޯލްޑިވްސް ވީކް ގްލޯބަލް ރޯޑްޝޯ ސީރީޒްގެ ތެރެއިން
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެޕްޕީއާރުސީ) އިން މިއަހަރު ބާއްވާ "ވިޒިޓް މޯލްޑިވްސް ވީކް" ގްލޯބަލް ރޯޑްޝޯ ސީރީޒްގެ ފުރަތަމަ ޝޯތައް ރަޝިއާގައި އިއްޔެ ފަށައިފިއެވެ.
ރަޝިއާގައި ކުރިއަށްދާ ގްލޯބަލް ރޯޑްޝޯގައި ރާއްޖޭގެ ފަތުރުވެރިކަމުގެ ސިނާޢަތުގައި ހިމެނޭ 21 ކުންފުންޏެއްގެ 21 މަމްދޫބުން ބައިވެރިވަޑައިގަންނަވައެވެ.
ހަފްތާއެއްގެ މުއްދަތައް ކުރިއަށްގެންދާ ވިޒިޓް މޯލްޑިވްސް ޝޯގައި ރަޝިއާގެ ތިން ސިޓީއެއްގައި ރާއްޖޭގެ ފަތުރުވެރިކަން އިޝްތިހާރުކޮށް، ހުށަހެޅުންތައް ދައްކާލާނެއެވެ.
ރަޝިއާގައި ބާއްވާ ރޯޑްޝޯއަކީ މިއަހަރަށް ބަހާލައިގެން އެމްއެމްޕީއާރުސީއިން ދުނިޔޭގެ ބޮޑެތި އަދި ކުރިއަރަމުން އަންނަ ފަތުރުވެރިކަމުގެ މާކެޓްތަކުގައި ބާއްވާ ފުރަތަމަ ޝޯއެވެ. ރާއްޖޭން ރަޝިއާގައި މިއަހަރު ބާއްވާ ފަތުރުވެރިކަމުގެ ފުރަތަމަ ހަރަކާތުގެ ތެރެއިން، ފުރަތަމަ ރޯޑްޝޯ ބޭއްވީ މިމަހުގެ ތިންވަނަ ދުވަހު ސެއިންޓް ޕީޓާސްބާގްގައެވެ. ފެބްރުވަރީ ފަސްވަނަ ދުވަހު މޮސްކޯގައި ހަރަކާތް ބާއްވާއިރު ރޯޑްޝޯގެ ފަހު ހަރަކާތް މިމަހުގެ ހަތްވަނަ ދުވަހު އޮންނާނީ ޓިއުމިންގައެވެ.
ފަތުރުވެރިކަން ޕްރޮމޯޓްކުރުމަށް ރަޝިއާގައި ހަފްތާއެއްގެ މުއްދަތަކަށް ކުރިއަށްދާ ރޯޑްޝޯގެ ތެރެއިން
އެމްއެމްޕީއާރުސީއިން ވިދާޅުވިގޮތުގައި، މި ހަރަކާތުގެ މަޤްޞަދަކީ ރާއްޖޭގެ ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކާއެކު ޕާޓްނާޝިޕްތައް އުފައްދައި، ގުޅުންތައް ބަދަހިކޮށް، ހަރުދަނާކޮށް ރާއްޖޭގެ އެންމެ ފަހުގެ ޑެސްޓިނޭޝަން މަޢުލޫމާތު ފޯރުކޮށްދިނުމަށް ޕްލެޓްފޯމެއް ފަހިކޮށްދިނުމެވެ.
ރަޝިއާގައި ބާއްވާ ރޯޑްޝޯގައި ރާއްޖެއަކީ އެންމެ މަޤްބޫލު ޓްރެވަލް ޑެސްޓިނޭޝަންގެ ގޮތުގައި އިޝްތިހާރުކުރުމަށް ގިނަ ހަރަކާތްތަކެއް ކުރިއަށްގެންދާނެއެވެ. އޭގެތެރޭގައި ރަޝިއާގެ މާކެޓަށް އަމާޒުކޮށްގެން ވެބިނާ ސީރީޒްއަކާއި، ޓުއާ އޮޕަރޭޓަރުންނާއި އެއާލައިންތަކާއެކު ކެމްޕޭންތައް ބޭއްވުމާއި، ޕަބްލިކް ރިލޭޝަންސް ހަރަކާތްތަކުގެ އިތުރުން މީޑިއާއަށް އަހުލުވެރިކުރުވުމުގެ ދަތުރުތައް އަދި ޑެސްޓިނޭޝަން މެނޭޖްމަންޓް ކުންފުނިތަކާއެކު ކެމްޕޭންތައް ހިންގުން ހިމެނެއެވެ.
ރަޝިއާގައި ގްލޯބަލް ރޯޑްޝޯ ކުރިއަށްދާއިރު އެޤައުމަކީ ރާއްޖޭއަށް މިވަގުތު ދެވަނައަށް އެންމެ ގިނަ ފަތުރުވެރިން ޒިޔާރަތްކުރާ ޤައުމެވެ. މިދިޔަ ޖަނަވަރީ މަހު ރަޝިއާއިން ވަނީ 20،902 ފަތުރުވެރިން ރާއްޖެ ޒިޔާރަތްކޮށްފައެވެ.
ޖަނަވަރީ މަހު ނިއުޔޯކް ސިޓީގައި ބޭއްވި ޓްރެވަލް އެންޑް އެޑްވެންޗާ ޝޯގެ ތެރެއިން. ފަތުރުވެރިކަން ޕްރޮމޯޓް ކުރުމަށް ގިނަ ހަރަކާތްތަކެއް އަންނަނީ ހިންގަމުން.
ރާއްޖޭގެ ފަތުރުވެރިކަން ޕްރޮމޯޓްކުރުމަށް ހިންގާ ހަރަކާތްތަކުގެ ތެރެއިން، މިދިޔަ ޖަނަވަރީ މަހުގެ 25 އަދި 26 ވަނަ ދުވަހު އެމްއެމްޕީއާރުސީއިން ވަނީ ދިވެހިރާއްޖޭގެ ދާއިމީ މިޝަންއާއި ގުޅިގެން ޓްރެވަލް އެންޑް އެޑްވެންޗާ ޝޯއެއް އެމެރިކާގެ ނިއުޔޯކުގައި ކުރިއަށް ގެންގޮސްފައެވެ.
ނިއުޔޯކުގައި ކުރިއަށްގެންދިޔަ އެޑްވެންޗާ ޝޯގައި ރާއްޖޭގެ ދެ ރިސޯޓު ކަމަށްވާ ސެންޓާރާ ގްރޭންޑް އައިލެންޑް ރިޒޯޓް އަދި ޑައިމަންޑްސް ތުނޑުފުށި ބީޗް އެންޑް ވޯޓާ ވިލާސް ވަނީ ބައިވެރިވެފައެވެ.
އެމްއެމްޕީއާރުސީއިން ވިދާޅުވީ، ނިއުޔޯކުގައި ގެންދިޔަ އެޑްވެންޗާ ޝޯގައި އެމެރިކާގެ މާކެޓަށް ޚާއްޞަކޮށްގެން "ޑިސްކަވަރ މޯލްޑިވްސް" ގެ ނަމުގައި ވެބިނާ ސީރީޒްއެއް ބޭއްވެވިކަމަށެވެ. އަދި، އެހެން ޤައުމުތަކުގައިވެސް ރާއްޖެ އިޝްތިހާރުކުރުމަށް ކުރިއަށްގެންދާ މައިގަނޑު ހަރަކާތްތައް ނިއުޔޯކްގައި އޮތް ޓްރެވަލް އެންޑް އެޑްވެންޗާ ޝޯގައި ވަނީ ކުރިއަށްގެންގޮސްފައެވެ.
އުތުރު އެމެރިކާގައި ރާއްޖޭގެ ފަތުރުވެރިކަން ކުރިއަރަމުން އަންނައިރު، މިދިޔަ އަހަރު އެމެރިކާއިން 62،000 އަށް ވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވެއެވެ.