ރާއްޖެއަށް އެވެރެޖުކޮށް ކޮންމެ ދުވަހަކު އަންނަ ފަތުރުވެރިންގެ ޢަދަދު 12.1 އިންސައްތައިން އިތުރުވެ، ރާއްޖެއަށް މި އަހަރު ޒިޔާރަތްކުރި ފަތުރުވެރިންގެ ޢަދަދު ނިމުނު އަހަރަށްވުރެ 13.1 އިންސައްތަ އިތުރުވެފައިވާކަން ޓޫރިޒަމް މިނިސްޓްރީގެ ހިސާބުތަކުން ދައްކައިފިއެވެ. 

އެ މިނިސްޓްރީން މިއަދު ނެރުނު ތަފާސްހިސާބުތައް ދައްކާ ގޮތުން ފެބްރުއަރީ މަހުގެ ދެވަނަ ދުވަހުގެ ނިޔަލަށް ރާއްޖެއަށް އައިސްފައިވަނީ 233،457 ފަތުރުވެރިންނެވެ. އެއީ ފާއިތުވި އަހަރުގެ ޖަނަވަރީ އެކަކުން ފެބްރުއަރީ ދެވަނަ ދުވަހުގެ ނިޔަލަށް އައި ފަތުރުވެރިންނަށްވުރެ 13.5 އިންސައްތަ އިތުރު ޢަދަދެކެވެ. 

މި އަހަރުގެ ފުރަތަމަ ދެ ދުވަހު ރާއްޖެއަށް އެވެރެޖުކޮށް 9،000 އަށްވުރެ ގިނަ ފަތުރުވެރިން އައިސްފައިވެއެވެ. އެކެއް ފެބްރުއަރީގައި 9،495 ފަތުރުވެރިން ރާއްޖެއަށް އައިސްފައިވާއިރު، ފެބްރުއަރީ ދެވަނަ ދުވަހު ރާއްޖެއަށް ޒިޔާރަތްކުރީ 9،098 ފަތުރުވެރިންނެވެ. ޖަނަވަރީ އެކަކުން ފެބްރުއަރީ ދެވަނަ ދުވަހުގެ ނިޔަލަށް އެވެރެޖުކޮށް ކޮންމެ ދުވަހަކު 7،074 ފަތުރުވެރިން ރާއްޖެއަށް އައިސްފައިވެއެވެ. 

ފާއިތުވި 2023 ވަނަ އަހަރުގެ ފެބްރުއަރީ މަހުގެ ފުރަތަމަ ތިން ދުވަހު އެވެރެޖުކޮށް ރާއްޖެއަށް އައިސްފައިވަނީ 7،362 ފަތުރުވެރިންނެވެ. އަދި އެ އަހަރުގެ ޖަނަވަރީ އެކަކުން ފެބްރުއަރީ ތިނެއްގެ ނިޔަލަށް އެވެރެޖުކޮށް ދުވާލަކު އައިސްފައިވަނީ 6،308 ފަތުރުވެރިންނެވެ. އެހެންކަމުން އެވެރެޖުކޮށް ދުވާލަކު އައި ފަތުރުވެރިންގެ ޢަދަދު މި އަހަރު 12.1 އިންސައްތަ އިތުރުވެފައިވެއެވެ. 

މި އަހަރުގެ މިހާތަނަށް ރާއްޖެއަށް އައި ފަތުރުވެރިންގެ ތެރެއިން 163،190 ފަތުރުވެރިން ނުވަތަ  70 އިންސައްތަ ފަތުރުވެރިން އައީ ރިސޯޓުތަކަށެވެ. ގެސްޓުހައުސްތަކަށް އައީ 25.2 އިންސައްތަ ފަތުރުވެރިންކަމަށްވާ 58،817 ފަތުރުވެރިންނެވެ. ސަފާރީތަކަށް 5،479 ފަތުރުވެރިން އައިސްފައިވާއިރު ހޮޓާތަކަށް އައީ 5،884 ފަތުރުވެރިންނެވެ. 

މިއަހަރުގެ މިހާތަނަށް ރާއްޖެެއަށް އެންމެ ގިނައިން ފަތުރުވެރިން އައީ ޗައިނާއިންނެވެ. އެ ޤައުމުން 39،887 ފަތުރުވެރިން އައިސްފައިވާއިރު ނިމުނު އަހަރުގެ ފެބްރުއަރީ ތިންވަނަ ދުވަހުގެ ނިޔަލަށް ޗައިނާއިން ރާއްޖެއަށް އައީ 23،972 ފަތުރުވެރިންނެވެ. އެހެންކަމުން ޗައިނާއިން ފަތުރުވެރިން އަންނަ މިންވަރުން އަހަރުން އަހަރަށް 63 އިންސައްތަ އިތުރުވެފައިވެއެވެ. 

ދެވަނައަށް އެންމެ ގިނައިން ފަތުރުވެރިން އައި ރަޝިޔާއިން މި އަހަރު އައި ފަތުރުވެރިންގެ ޢަދަދު ނިމުނު އަހަރު އެ ޤައުމުން އައި ފަތުރުވެރިންނަށްވުރެ 7.3 އިންސައްތަ އިތުރުވެފައިވެއެވެ. ނިމުނު އަހަރުގެ ފެބްރުއަރީ ތިންވަނަ ދުވަހުގެ ނިޔަލަށް 21،898 ރަޝިޔާ ފަތުރުވެރިން ރާއްޖެއަށް ޒިޔާރަތްކުރިއިރު މި އަހަރު އެ ޢަދަދުވަނީ 23،512 އަށް އިތުރުވެފައެވެ. 

މިވަގުތު ރާއްޖޭގެ 171 ރިސޯޓެއްގަައި ޚިދުމަތް ދެމުންދާއިރު އެ ރިސޯޓުތަކުގައި 42،256 އެނދު އެބަހުއްޓެވެ. އަދި 793 ގެސްޓުހައުސްެއެއްގައި 13،381 އެނދު ޚިދުމަތަށް ނެރެފައިވެއެވެ. ޖުމްލަ 1،33 ތަނަކުން ފަތުރުވެރިންނަށް ޚިދުމަތް ދެމުންދާއިރު އެތަންތަނުގައި އެކުޖުމްލަ 60،795 އެނދު އެބަހުރިކަމަށް ހިސާބުތައް ދައްކައެވެ. 

ނިމުނު އަހަރު ތާރީޚުގައިވެސް ފުރަތަމަ ފަހަރަށް ދެ މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މި އަހަރު ސަރުކާރުން ކަނޑައަޅުއްވާފައިވާ އަމާޒަކީ 2.5 މިލިއަން ފަތުރުވެރިން ރާއްޖެއަށް ގެނައުމެވެ. އެކަމަށްޓަކައި ސަރުކާރުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ.