ކޮންމެ ރަށެއްގެ ނިސްބަތަށް ބަލައިގެން އެ ރަށަކަށް ބޭނުންވާ ސިއްހީ ހިދުމަތްތައް ގާއިމުކޮށްދެއްވާނެ ކަމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ، ހއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅުގެ މުރައިދޫއަށް ވަޑައިގެން ދެއްކެވި ވާހަކަފުޅުގަ އެވެ. 

ރައީސް ވިދާޅުވީ  ރާއްޖޭގެ ރަށްރަށުގައި ސިއްހީ ޚިދުމަތްތައް ޤާއިމުކުރުމުގައި އެ  ރަށެއްގެ އާބާދީއާއި، އިޤުތިޞާދީ މަސައްކަތްތަކަށް ބައްލަވާނެ ކަމަށެވެ. އެގޮތުން ކޮންމެ ރަށެއްގެ ނިސްބަތަށް ބަލައިގެން، ލެބޯޓްރީއާއި އިންސާނީ ވަސީލަތްތައް އެ ރަށެއްގެ ސިއްހީ މަރުކަޒަކަށް ހަމަޖައްސައިދެއްވާނެ ކަމަށް އެމަނިކުފާނު ވިދާޅުވި އެވެ.

 ކޮންމެ ރަށެއްގެ ނިސްބަތަށް ބަލައިގެން އެ ރަށަށް ބޭނުންވާ ސިއްހީ ހިދުމަތްތައް ގާއިމުކުރައްވަން ނިންމެވީ، ރައީސް ވިދާޅުވި ގޮތުގައި، އެމަނިކުފާނު ގެންގުޅުއްވާ ހަމަހަމަކަމުގެ ސިޔާސަތުގެ ދަށުންނެވެ. އެމަނިކުފާނު ގަބޫލުކުރައްވާ ގޮތުގައި އެއީ އެކަން އޮންނަން ޖެހޭ ގޮތް ވެސްމެއެވެ.

ކޮންމެ ރަށެއްގައި ރަނގަޅު ފެންވަރެއްގެ ސިއްހީ ހިދުމަތްތައް ގާއިމުކުރުމުގެ އިތުރުން ކުރިއަށް އޮތް ދެ އަހަރުގެ ތެރޭގައި ރަށްރަށުގެ ތައުލީމީ ވަސީލަތްތައް ފުރިހަމަކުރުމަށްޓަކައި ޕްލޭނެއް އެކުލަވާލައްވަމުން ގެންދަވާ ކަމަށް ވެސް ރައީސް ވިދާޅުވި އެވެ. ރައީސް ވިދާޅުވި ގޮތުގައި އެމަނިކުފާނުގެ އަމާޒަކީ ރަށްރަށަށް ބޭނުންވާ ކަންކަން ބެއްލެވުމަށްފަހު، ވަކި ތަރުތީބެއް ކަނޑައަޅުއްވައިގެން އެ މަސައްކަތް ކުރެއްވުމެވެ. އަދި އެ މަސައްކަތް ވެސް ވަރަށް އަވަހަށް ނިމިގެންދާނެ ކަން ރައީސްގެ ވާހަކަފުޅުގައި ފާހަގަކުރެއްވި އެވެ.

ރައީސް މިއަދު މުރައިދޫއަށް ކުރެއްވި ޒިޔާރަތުގެ ތެރެއިން އެ ރަށުގެ ކައުންސިލުގެ އައު ޢިމާރާތުގެ ބިންގާ އަޅުއްވާފައިވެއެވެ. އަދި ހުރިހާ ރަށަކަށް ފުލުހުންގެ ޚިދުމަތް ފުޅާކުރެއްވުމަށް ސަރުކާރުން ކުރައްވަމުންދާ މަސައްކަތްޕުޅުގެ ތެރެއިން އެ ރަށުގައި ޕޮލިސް ސްޓޭޝަންގެ ބިންގާވެސް މިއަދު އަޅުއްވާފައިވެއެވެ.  

ތިލަދުންމަތީ އުތުރުބުރީ ރަށްތަކަށް ރައީސް ކުރައްވާ ތިން ދުވަހުގެ ރަސްމީ ދަތުރުފުޅުގައި އެމަނިކުފާނުގެ އެންމެ ފުރަތަމަ މަންޒިލަކީ އެ އަތޮޅުގެ މުރައިދޫ އެވެ. އެ ރަށަށް ވަޑައިގެން ރަށު ރައްޔިތުންނާއ ބައްދަލުކުރެއްވުމުގެ ކުރިން ރައީސް ވަނީ އެ ރަށުގެ ކައުންސިލުގެ އައު ޢިމާރާތާއި އެ ރަށުގެ ޕޮލިސް ސްޓޭޝަނުގެ ޢިމާރާތުގެ ބިންގާ އެޅުމުގެ ރަސްމިއްޔާތުގައި ބައިވެރިވެވަޑައިގެންފަ އެވެ.