ENGLISH

04 އޭޕްރީލު 2025

Advertisement

ފަތުރުވެރިން އަންނަ މިންވަރު 11.7 އިންސައްތަ މަަތިވެ، 180،000 އާ ގާތަށް

28 ޖެނުއަރީ 2025

|

ޝިފްޒާން އަޙްމަދު

ރާއްޖެއަށް މި އަހަރުގެ މިހާތަނަށް އައި ފަތުރުވެރިންގެ ޢަދަދު ފާއިތުވި އަހަރާ އަޅާބަލާއިރު 11.7 އިންސައްތަ އިތުރުވެ، 180،000 އާ ގާތްކޮށްފައިވާކަން ޓޫރިޒަމް މިނިސްޓްރީން ޢާންމުކޮށްފައިވާ ތަފާސްހިސާބުތަކުން ދައްކައިފިއެވެ. 

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު އިއްޔެގެ ނިޔަލަށް ރާއްޖެއަށް އައިސްފައިވަނީ 178،151 ފަތުރުވެރިންނެެވެ. އެއިން 123،531 ފަތުރުވެރިން ނުވަތަ 69.3 އިންސައްތަ ޓޫރިސްޓުން އައިސްފައިވަނީ ރިސޯޓުތަކަށެވެ. 

ރާއްޖޭގެ ގެސްޓުހައުސްތަކަށް މި މުއްދަތުގައި އައިސްފައިވަނީ 45،821 ފަތުރުވެރިންނެވެ. އަދި ސަފާރީ އުޅަނދުތަކަށް 4،354 ފަތުރުވެރިން އައިސްފައިވާއިރު، ހޮޓާތަކަށް 4،380 ފަތުރުވެރިން އަދި އެހެނިހެން އެސްޓަބްލިޝްމެންޓުތަކަށް 65 ފަތުރުވެރިން އައިސްފައިވެއެވެ. 

މި މުއްދަތުގައި ރާއްޖެއަށް އެންމެ ގިނައިން ފަތުރުވެރިން އައީ ޗައިނާއިންނެވެ. ނިމުނު އަހަރުވެސް ރާއްޖެއަށް އެއް ޤައުމަކުން އެންމެ ގިނަ ފަތުރުވެރިން ޒިޔާރަތްކުރި ޗައިނާއިން އިއްޔެގެ ނިޔަލަށް 25،106 ފަތުރުވެރިން އައިސްފައިވާއިރު، އެއީ ރާއްޖެއަށް މި މުއްދަތުގައި ޒިޔާރަތްކުރި ފަތުރުވެރިންގެ 14.1 އިންސައްތައެވެ. ދެވަނައަށް އެންމެ ގިނައިން ފަތުރުވެރިން އައީ ރަޝިޔާއިންނެވެ. އެ ޤައުމުން 19،367 ފަތުރުވެރިން ރާއްޖެއަށް ޒިޔާރަތްކުރިކަން ތަފާސްހިސާބުތަކުން ދައްކައެވެ. 

ޓޫރިޒަމް މިނިސްޓްރީގެ ހިސާބުތަކަށް ބަލާއިރު ޖަނަވަރީ އެއްވަނަަ ދުވަހުން ފެށިގެން އިއްޔެ (27 ޖަނަވަރީ)ގެ ނިޔަލަށް އެވެރެޖުކޮށް ކޮންމެ ދުވަހަކު 6،852 ޓޫރިސްޓުން ރާއްޖެއަށް ޒިޔާރަތްކުރިއެވެ. މި ރޭޓަށް ބަލާއިރު މި މަހުގެ ނިޔަލަށް ރާއްޖެއަށް އަންނަ ފަތުރުވެރިންގެ އަދަދު 200،000 އަށްވުރެ މަތިވާނެ ކަމުގައި ބެލެވެއެވެ. މިދިޔަ އަހަރު ޖަނަވަރީ މަހުގެ ނިޔަލަށް ރާއްޖެއަށް އައިސްފައިވަނީ 192،385 ފަތުރުވެރިންނެވެ. 

މި މަހުގެ މިހާތަނަށް އެންމެ ގިނައިން އެއް ދުވަހެއްގައި ރާއްޖެއަށް ޓޫރިސްޓުން ޒިޔާރަތްކުރި ދުވަހަކީ ޖަނަވަަރީ 25 ވަނަ ދުވަހެވެ. އެ ދުވަހު 9،199 ފަތުރުވެރިން ރާއްޖެއަށް އައިސްފައިވާކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކަައެވެ. 

ކިޔުންތެރިންގެ ހިޔާލު