ރާއްޖޭގެ އެކި ޞަރަޙައްދުތަކަށް ބަހާލައިގެން 10 ލޭންޑްމާކް ފަރުމާ ކުރުމުގެ މުބާރާތް މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން މިއަދު އަލުން ހުޅުވާލައްވައިފިއެވެ.

ރާއްޖެއަށް ޒިޔާރަތްކުރާ ފަތުރުވެރިންނަށް އަމާޒުކޮށް ރާއްޖޭގެ އެކި ޞަރަޙައްދުތަކުގައި ބެހެއްޓުމަށްޓަކައި ތައްޔާރުކުރެވޭ ލޭންޑްމާކް ފަރުމާ ކުރުމުގެ ފުރުޞަތު ފުރަތަމަ ހުޅުވާލެއްވީ މިދިޔަ ނޮވެމްބަރު މަހުއެވެ. އެމްއެމްޕީއާރުސީން ވިދާޅުވި ގޮތުގައި އިތުރު މުއްދަތު ދިނުމާއެކު މި މުބާރާތް އަލުންހުޅުވާލެއްވީ ފަންނާނުންގެ ފަރުމާތައް ކޮންސެޕްޓުއަލައިޒްކޮށް ހުށަހެޅުމަށް އިތުރު ވަގުތު ދިނުމުގެ ގޮތުންނެވެ. އަދި ބައިވެރިންނަށް އިތުރަށް އެހީތެރިވެދިނުމަށްޓަކައި ސުވާލުތަކަށް ޖަވާބުދިނުމުގެ ސެޝަނެއް އަންނަ މަހުގެ 17 ވަނަ ދުވަހު ބާއްވާނެކަމަށް އެމްއެމްޕީއާރުސީން ވިދާޅުވިއެވެ.

މި މުބާރާތުގައި ބައިވެރި ވުމުގެ ފުރުޞަތު 18 އަހަރުން މަތީގެ ކޮންމެ ދިވެހި ރައްޔިތަކަށް ހުޅުވާލާފައިވާއިރު، މި މުބާރާތުން އެންމެ މަތިން ހޮވޭ 10 ފަރުމާއަކަށް 20,000 ރުފިޔާގެ ފައިސާގެ އިނާމަކާއި ސްޕޮންސަރ ކުރާ ފަރާތްތަކުގެ ގިފްޓް ޕެކޭޖެއް ލިބޭނެ ކަމަށް އެމްއެމްޕީއާރުސީން ވިދާޅުވެއެވެ. 

މި މުބާރާތުގެ މައުލޫމާތު ސެޝަނުގައި ބައިވެރިވާން ބޭނުންވާ ފަރާތްތަކުން [email protected] އީމެއިން މެދުވެރިކޮށް ފެބަރުއަރީ 15 ވަނަ ދުވަހުގެ ހަވީރު 6:00 ގެ ކުރިން ރަޖިސްޓްރީވާންޖެހެއެވެ. 

އެމްއެމްޕީއާރުސީން ވިދާޅުވި ގޮތުގައި ލޭންޑްމާކް ފަރުމާތައް ފެބްރުއަރީ 28 ވަނަ ދުވަހުގެ ހަވީރު 6:00 ގެ ކުރިން ހުށަހަޅަންޖެއެވެ. މި މުބާރާތުގެ ޤަވާއިދު ދިވެހި ސަރުކާރުގެ ގެޒެޓުގައި ވަނީ ޝާއިއު ކުރައްވައިފައެވެ.