މި އަހަރުގެ ފުރަތަމަ ދެ ހަފުތާ ފާއިތުއިރު، ދައުލަތުގެ ބަޖެޓް އޮތީ 463.6 މިލިއަން ރުފިޔާ އަރަނިކޮށް ކަމަށް މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ތަފާސް ހިސާބުތަކުން ދައްކައިފިއެވެ.

ހަފުތާއަކު އެއް ފަހަރު މާލީ ވުޒާރާއިން އާންމުކުރާ ތަފާސް ހިސާބުތަކުން ދައްކާ ގޮތުގައި މި އަހަރުގެ ޖެނުއަރީ އެއްވަނަ ދުވަހުން 16 ވަނަ ދުވަހުގެ ނިޔަލަށް ޖުމްލަ އާމްދަނީގެ ގޮތުގައި 725 މިލިއަން ރުފިޔާ ލިބިފައިވާއިރު، ލޯނާއި އިންޓަރެސްޓަށް ކުރި ހޭދަ ވެސް ހިމަނައިގެން ޖުމްލަ ޚަރަދުކޮށްފައިވަނީ 261.4 މިލިއަން ރުފިޔާ އެވެ. މި މުއްދަތުގައި އެންމެ ބޮޑު ހޭދައެއް ކޮށްފައިވަނީ ލޯނު އަނބުރާ ދެއްކުމަށެވެ. އެއީ 122 މިލިއަން ރުފިޔާ އެވެ. ސޮވެރިން ޑިޕެލޮމަންޓް ފަންޑަށް 17.8 މިލިއަން ރުފިޔާ ޖަމާކޮށްފައިވެއެވެ.

ފުރަތަމަ ދެ ހަފުތާއެއްހާ ދުވަހުގެ ތަފާސް ހިސާބުތަކަށް ބަލާއިރު، ޓެކްސްގެ ގޮތުގައި 544 މިލިއަން ރުފިޔާ އަދި އެނޫން ގޮތްގޮތުން 176 މިލިއަން ފުރިޔާ އާމްދަނީއަށް އިތުރުވެފައިވެއެވެ. އާންމު ޖީއެސްޓީގެ ގޮތުގައި 98 މިލިއަން ރުފިޔާ ލިބިފައިވާއިރު، ޓީޖީއެސްޓީގެ ގޮތުގައި 125 މިލިއަން ރުފިޔާ ލިބިފައިވެއެވެ.

ދައުލަތުން ފުރަތަމަ ދެ ހަފުތާގައި ކުރި ހޭދަ، މިދިޔަ އަހަރުގެ ފުރަތަމަ ދެ ހަފުތާގައި ކުރި ހޭދައަށްވުރެ ވަރަށް ބޮޑުތަން ދަށެވެ. މިދިޔަ އަހަރުގެ ފުރަތަމަ ދެ ހަފުތާގައި 828 މިލިއަން ރުފިޔާ ހޭދަކޮށްފައިވާއިރު، މި އަހަރުގެ ފުރަތަމަ ދެ ހަފުތާގައި ހޭދަކޮށްފައިވަނީ 261.4 މިލިއަން ރުފިޔާއެވެ. ޖުމްލަކޮށް ހުރިހާ ދާއިރާއަކަށް ކުރި ހޭދަ މަދުވެފައިވީ ނަމަވެސް، އާސަންދައަށް ކުރި ހޭދަ 19.7 މިލިއަން ރުފިޔާ އިން 31.3 މިލިއަން ރުފިޔާއަށް އިތުރުވެފައިވެއެވެ.