ބައިނަލްއަޤުވާމީ ޕޭމަންޓް ގޭޓްވޭ ނިޒާމުތައް ރާއްޖެ އަށް ތަޢާރަފު ކުރުމަށްޓަކައި ޕޭޕާލް ޕޭ، އެމޭޒަން ޕޭ އަދި ގޫގްލް ޕޭ ގެނައުމަށް މިހާރު ޕްރޮޕޯޒަލް ހުށަހަޅައިފައިވާކަމަށް އިޤްތިޞާދީ ތަރައްޤީ އާއި ވިޔަފާރިއާ ބެހޭ ވުޒާރާގެ ޑެޕިއުޓީ މިނިސްޓަރ ޑރ. އާއިޝަތު ޝަހުދާ ޢަބްދުﷲ މިރޭ ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވާހަކަ ދައްކަވަމުން ޑރ. ޝަހުދާ ވިދާޅުވީ ބައިނަލްއަގުވާމީ ޕޭމަންޓް ގޭޓްވޭތައް ގެނައުމަކީ ރާއްޖޭގެ ފަންނުވެރިންނާއި އަމިއްލަ މަސައްކަތުން އާމްދަނީ ހޯދާ ފަރާތްތަކުން ވަރަށް ބޮޑަށް ބޭނުންވާ ކަމެއް ކަމަށެވެ. އެކަން ހާސިލުކޮށްދިނުމަށް ޓަކައި އެ ޚިދުމަތްދޭ ފަރާތްތަކަށް ޕްރޮޕޯޒަލް ހުށަހަޅައި ވަރަށް ގިނަ މަޝްވަރާތައް ކުރަމުންގެންދަވާކަމަށް ޑރ. ޝަހުދާ ވިދާޅުވިއެވެ.

"ޕޭޕާލްގެ އިތުރުން އެމޭޒަމް ޕޭ އާއި ގޫގްލް ޕޭ ގެނައުމަށްޓަކައި މިހާރު ވަނީ އޮފިޝަލް ޕްރޮޕޯޒަލްތަކެއް ފޮނުވިފައި، އަދި އޭގެ އިތުރުން އެގްޒެކެޓިވް މެނޭޖުމަންޓު ލެވަލްގައި ބައިވަރު މަޝްރާތަކެއް ވެސް މިހާރު ވަނީ ކުރެވިފައި،" އޭނާ ވިދަޅުވިއެވެ.

މީގެ އިތުރުން ޕޭމަންޓްގެ ކަންކަން ހައްލުކުރުމަށްޓަކައި އިތުރު ފުރުޞަތުތައް ހޯދުމަށް ދިސާރާކުރަމުންދާކަމަށް ވެސް ޑރ. ޝަހުދާ ވިދާޅުވިއެވެ.

ޗައިނާގެ މަގުބޫލު މޮބައިލް އެޕް ވެއިޝިން ޕޭ (ވީޗެޓް ޕޭ) މިހާރު ރާއްޖޭގައި ބޭނުންކުރެވޭކަން ވެސް ޑރ. ޝަހުދާ ފާހަގަކުރެއްވިއެވެ. ބޭންކުގެ ޕޮއިންޓް-އޮފް-ސޭލް (ޕީއޯއެސް) ޓާމިނަލް ނެޓްވޯކްގައި ވީޗެޓް ބޭނުންކުރެވޭ ޚިދުމަތް ބޭންކް އޮފް މޯލްޑިވްސް (ބީއެމްއެލް) އިން ތަޢާރަފުކުރީ މިދިޔަ އަހަރުގެ މެއި މަހުއެވެ.

ފަންނުވެރި އިޤްތިޞާދެއް އުފެއްދުމަކީ ރައީސުލްޖުމްހޫރިއްޔާގެ ޑރ. މުޙައްމަދު މުޢިއްޒުގެ މެނިފެސްޓޯގައި ހިމަނުއްވާފައިވާކަމެކެވެ. ފަންނުވެރި އިޤްތިޞާދެއް އުފައްދާއިރު، ފަންނުވެރިންގެ އުފެއްދުންތައް ވިއްކުމަށް އެކިކަހަލަ އިންޓަރނޭޝަނަލް ޕްލެޓްފޯމްތަކުގައި ސެލަރ އެކައުންޓްތައް ކްރިއޭޓްކޮށް، ފުރިހަމަ ޕޭމަންޓް ގޭޓްވޭ ނިޒާމް ގާއިމުކޮށްދެއްވާނެ ކަމަށް ރައީސް ޑރ. މުޢިއްޒު ވިދާޅުވެފައިވެއެވެ.

އިޤްތިޞާދީ ތަރައްޤީ އާއި ވިޔަފާރި އާއި ބެހޭ ވުޒާރާ އާއި ބިޒިނަސް ސެންޓަރ ކޯޕަރޭޝަން (ބީސީސީ) އިން އަންނަނީ ފަންނުވެރި އިޤްތިޞާދެއް ބިނާކުރުމަށްޓަކައި ގިނަ މަސައްކަތްތަކެއް ކުރައްވާ، ގިނަ ފުރުޞަތުތަކެއް ފަހިކޮށްދެއްވަމުންނެވެ.