މީގެ ކުރިން ބަންގްލަދޭޝްގެ ރައްޔިތުންނަށް ރާއްޖެ މަޝްހޫރުވެފައި އޮންނަނީ ވަޒީފާ ލިބުން ފަސޭހަ އަދި ރަނގަޅު އާމްދަނީއެއް ހޯދިދާނެ ޤައުމެއްގެ ގޮތުގައެވެ. ނަތީޖާއެއްގެ ގޮތުން ރާއްޖޭގައި ބަންގަލަދޭޝްގެ މަސައްކަތްތެރީންގެ އަބާދީ އިތުވަމުން އައީ ވަރަށް ހަލުވި މިނުގައެވެ. ނަމަވެސް މިހާރު، ދިވެހި ރާއްޖެ އަކީ ބަންގްލަދޭޝްގެ ޓޫރިސްޓުންގެ މެދުގައި ވެސް މަޤްބޫލު ޤައުމެކެވެ.

ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި ކޮވިޑް-19 ގެ ކުރިން 2019 ވަނަ އަހަރު ބަންގްލަދޭޝްއިން ރާއްޖެއަށް ރިޔާރަތްކޮށްފައިވަނީ 3،918 ފަތުރުވެރިންނެވެ. މިދިޔަ ހަތަރު އަހަރު އެ އަދަދު ބޮޑުތަނުން އިތުރުވެ، މިދިޔަ އަހަރު 33،295 ފަތުރުވެރިން ބަންގްލަދޭޝް އިން ރާއްޖެ އައިސްފައިވެއެވެ. އެއީ 2023 ވަނަ އަހަރު އެ ގައުމުން ޒިޔާރަތްކުރި 28،336 ފަތުރުވެރިންނާ އަޅާބަލާއިރު 17.5 އިންސައްތަ އިތުރު އަދަދެކެވެ.

ރާއްޖޭގެ ތަފާސްހިސާބާ ބެހޭ ޤައުމީ އިދާރާއިން 2022 ވަނަ އަހަރު ކުރިއަށް ގެންދިޔަ ބޯހިމެނުމުން ދައްކާ ގޮތުގައި 2022 ވަނަ އަހަރު ރާއްޖޭގެ މަސައްކަތު އާބާދީ އަކީ 411،219 މީހުންނެވެ. އޭގެ ތެރެއިން 130،088 މީހުންނަކީ ބިދޭސީންނެވެ. 

ރާއްޖޭގައި ވަޒީފާއަދާކުރާ ބިދޭސީ އާބާދީގައި އެންމެ ބޮޑު ހިއްސާއެއް އަދާކުރަނީ ބަންގްލަދޭޝްގެ މަސައްކަތްތެރިންނެވެ. ރަސްމީ އަދި ނުރަސްމީ ހިސާބުތަކުން ދައްކާ ގޮތުގައި ބަންގްލަދޭޝްގެ ލައްކަ އަކަށްވުރެ ގިނަ މީހުން ރާއްޖޭގައި ވަޒީފާ އަދާކުރެއެވެ.

ބަންގާޅު ބަހުންނާއި އިނގިރޭސި ބަހުން ޚަބަރުތައް ގެނެސްދޭ ބަންގްލަދޭޝްގެ "ދި ބިޒްނަސް ސްޓޭންޑާރޑް"ގައި ބުނެފައިވާ ގޮތުގައި ރާއްޖޭގެ 6 ލައްކަ އާބާދީގެ 20 އިންސައްތަ، ބަންގްލަދޭޝްގެ މަސައްކްތަތެރިން ހިއްސާކުރެއެވެ.

ބިޒްނަސް ސްޓޭންޑާރޑްގައި ބުނެފައިވާ ގޮތުގައި ރާއްޖޭގެ ވަޒީފާ އަދާކުރާ ބަންގްލަދޭޝްގެ ރައްޔިތުންގެ ތެރޭގައި ސްޕޮންސަރަށް ފިލައިގެންނާއި ޓޫރިސްޓު ވިސާގައި އެތެރެވެ، ގަވާއިދާ ޚިލާފަށް އުޅޭ މަސައްކަތްތެރިން ގިނައެވެ. އެ ނޫހުގައި ބުނެފައިވާ ގޮތުގައި ރާއްޖޭގެ ކޮންމެ ހިސާބަކުން ވެސް ބަންގްލަދޭޝްގެ މަސައްކަތްތެރިން ފެންނާނެއެވެ.

ބިޒްނަސް ސްޓޭންޑާރޑްގައި ބުނެފައިވާ ގޮތުގައި ކޮންމެތާކުން ރަށު މީހަކާ ބަދަލުވުމަކީ ބަންގްލަދޭޝްގެ ފަތުރުވެރިންނަށް ރާއްޖެ ޚާއްޞަވާ ސަބަބެކެވެ. ކުދި ފިހާރަތަކާއި ވޯޓާ ސްޕޯޓްސްގެ ޚިދުމަތްދޭ ތަންތަނާއި ހޮޓާތަކުން ވެސް ދިމާވަނީ ބަންގްލަދޭޝްގެ މީހުނާ ކަމަށް، އެ ނޫހުގައި ބުނެފައިވެއެވެ.

ބަންގްލަދޭޝްގެ ފަތުރުވެރިންނާ ރާއްޖޭގައި މަގުމަތިން ދިމާވާ މީހުން ކަލޭ ބަންގްލްދޭޝް ހޭ، އަހާ ކަމަށާއި، އަދި ބަންގާޅު ބަހުން ވާހަކަ ދައްކަން ހިނގާށޭ ބުނާ ކަމަށް އެނޫހުގައި ބުނެފައިވެއެވެ.

ބަންގްލަދޭޝް އަކީ މޯލްޑިވިސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރުސީ) އިން ވެސް މިހާރު އިސްކަންދޭ ޓޫރިޒަމް މާކެޓެކެވެ. އިންޑިގޯ އާއި ސްރީލަންކަން އެއާލައިންސް އަދި އެއާ އަރަބިޔާ ފަދަ އެއާލައިންތަކުން މާލެ އާއި ބަންގްލަދޭޝްގެ ވެރިރަށް ޑާކާއާ ދެމެދު ޝެޑިއުލް ދަތުރުތައް ކުރެއެވެ. ކުރިއަށް އޮތްތަނުގައި ބަންގްލަދޭޝްގެ މަސައްކަތްތެރިންނަށްވުރެ ބަންގްލަދޭޝްގެ ފަތުރުވެރިންގެ އަދަދު އިތުރުވުމަކީ ގާތްކަމެކެވެ.