ރަސްމީ ދުވަސްތަކުގެ އިތުރުން މާދަމާއިން ފެށިގެން ކޮންމެ ހޮނިހިރު ދުވަހު ވެސް ޕާސްޕޯޓު ދޫކުރުމުގެ ޚިދުމަތް ދިނުމަށް އިމިގްރޭޝަނުން ނިންމަވައިފިއެވެ.

އިމިގްރޭޝަނުން ނޫސްތަކަށް ފޮނުއްވި މެސެޖެއްގައި ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝައްމާން ވަހީދު ވިދާޅުވީ، މާދަމާ އިން ފެށިގެން މި ނިންމުމަށް އަމަލުކުރަން ފައްޓަވާނެ ކަމަށެވެ. މިގޮތަށް ހަމަޖެއްސެވީ ރައީސް ޑރ. މުޙައްމަދު މުޢިއްޒުގެ އިރުޝާދާ އެއްގޮތަށް ޕާސްޕޯޓު ހެދުމާއި ދޫކުރުމުގެ ޚިދުމަތްދޭ ވަގުތު އިތުރުކޮށް، ރައްޔިތުންނާ ގާތުން އަވަސް އަދި ލުއިފަސޭހަ ޚިދުމަތެއް ފޯރުކޮށްދިނުމަށް ކަމަށް ޝައްމާން ވިދާޅުވި އެވެ.

މެޑިކަލް އެމާޖެންސީގައި ރާއްޖެއިން ބޭރަށް ދާ ފަރާތްތަކަށް ޕާސްޕޯޓު ދޫކުރުމުގެ ޚިދުމަތް މިހާރު ވެސް 24 ގަޑިއިރު ފޯރުކޮށްދެއެވެ. 

ހޮނިހިރު ދުވަހު ޕާސްޕޯޓު ދޫކުރުމުގެ ޚިދުމަތް ދޭނީ މާލޭގައި ހުންނަ އިމިގްރޭޝަންގެ އޮފީހާއި ހުޅުމާލެ ދެ ފިޔަވަހީގައި ހުންނަ އެ ޚިދުމަތުގެ ދެ އޮފީހުންނެވެ. ހޮނިހިރު ދުވަސްތަކުގައި ޕާސްޕޯޓު ދޫކުރުމަށް ނަމްބަރު ދޫކުރާނީ ހެދުނު 9:00 އިން މެންދުރު 12:00 އާ އަށެވެ.