ކަލިނަރީ ދާއިރާއަށް ޚާއްސަކޮށްގެން ބާއްވާ ފުޑް އެންޑް ބެވަރޭޖު (އެފްއެންބީ) ޝޯ ގެ 8 ވަނަ އެޑިޝަން މިއަދު ހުޅުމާލޭ ސެންޓްރަލް ޕާކުގައި ފަށައިފިއެވެ.

ހައިރައިޒް އިން އިންތިޒާމުކުރާ މި ފެއާ މިއަދު ހަވީރުން ފެށިގެން އާދީއްތަ ދުވަހުގެ ރޭގެ ނިޔަލަށް ކުރިއަށްދާނެއެވެ. ގިނަ ހަރަކާތްތަކަކާއެކު ކުރިއަށްގެންދާ މި ފެއާ ހުޅުވިފައިފައި ހުންނާނީ ހަވީރު 4:00 އިން 6:00 އަށް އަދި ރޭގަނޑު 8:00 އިން 11:00 އަށެވެ. 

ކުރީ އަހަރުތަކެކޭ އެއްފަދައިިން މި އަހަރު ވެސް އެފްއެންބީ ޝޯގައި އެފްއެންބީ ދާއިރާގައި ހަރަކާތްތެރިވާ ވަރަށް ގިނަ ފަރާތްތަކާއި ކާބޯތަކެތި އިމްޕޯޓު ކުރާ ވިޔަފާރިތަކާއި ހޯލްސޭލަރުންނާއި ކާބޯތަކެތި އުފައްދާ ވިޔަފާރިތަކާއި ކަލިނަރީ ދާއިރާގެ ފަންނީ މީހުން ބައިވެރިވެއެވެ.

ހައިރައިޒް އިން ބުނީ މި އިވެންޓު ވެގެން ދާނީ އެއްތަނަކުން އެންމެ ގިނަ ބާވަތުގެ ކެއިން ބުއިމުގެ ބާވަތްތަކުގެ އަޖުމަ ބަލާލަން ލިބޭ ފުރުސަތަށް ކަމަށެވެ. މި ފެއާގައި މުނިފޫހި ފިލުވުމުގެ އިވެންޓްތަކާއި ކަލިނަރީ އެފްއެންބީ ދާއިރާއިން މުބާރާތްތަކާއި ޕެނަލް ޑިސްކަޝަންތައް ވެސް ކުރިއަށްގެންދާނެެވެ. އަދި މި އަހަރުގެ އިވެންޓުގައި ވެސް ވިޔަފާރިތަކަށް ފަހި ފުރުސަތުތަކެއް ހުންނާނެ ކަމަށް ބުންޏެވެ.