ރާއްޖޭގެ އެންމެ ބޮޑު އިސްލާމިކް ބޭންކް، ބީއެމްއެލް އިސްލާމިކުން 10 ކަސްޓަމަރަކަށް ހައްޖު ދަތުރުތަކެއް ލިބޭ ޕްރޮމޯޝަނެއް ފަށައިފި އެވެ.

މިއީ ބީއެމްއެލް އިސްލާމިކް އަށް 10 އަހަރު ފުރުން ފާހަގަކުރުމުގެ ގޮތުން ފެށި ޕްރޮމޯޝަނެކެވެ.

ބީއެމްއެލް އިން މިއަދު ނެރުނު ނޫސްބަޔާނެއްގައި ބުނެފައިވަނީ މިއަދުން ފެށިގެން މި އަހަރުގެ ނޮވެމްބަރު 30 ގެ ނިޔަލަށް އެ ޕްރޮމޯޝަން ކުރިއަށްދާނެ ކަށެވެ.

މި ޕްރޮމޯޝަންގައި ބީއެމްއެލް އިސްލާމިކްގެ ޚިދުމަތް މިހާރުވެސް ބޭނުންކުރަމުންދާ ކަސްޓަމަރުންނާއި އަލަށް ޚިދުމަތް ބޭނުންކުރަން ފަށާ ކަސްޓަމަރުންގެ ތެރެއިން ފައިނޭންސިން ފެސިލިޓީއެއް ބޭނުންކުރަމުންދާ ކަސްޓަމަރުންނަށާއި މުސާރަ ޖަމާކުރާ ކަސްޓަމަރުންނަށާއި ޖެނެރަލް އިންވެސްޓްމެންޓް އެކައުންޓް ނުވަތަ އިސްލާމިކް ކްރެޑިޓް ކާޑެއް ބޭނުންކުރަމުންދާ ކޮންމެ ކަސްޓަމަރަކަށް ޕްރޮމޯޝަންގައި ބައިވެރިވެވޭނެ ކަމަށް ބީއެމްއެލް އިން ބުނެފައިވެ އެވެ.

ހައްޖު ދަތުރުތަކުގެ ހުރިހާ ޚަރަދެއް ބީއެމްއެލް އިން ހަމަޖައްސައިދޭނެ ކަމަށް ވެސް ބޭންކުން ބުނެފައިވެ އެވެ.

ކާޑު އަދި ފައިނޭންސިން ޚިދުމަތްތައް ހިމެނޭހެން ހުރިހާ އިސްލާމިކް ބޭންކިން ޚިދުމަތްތައް ފޯރުކޮށްދޭ ބީއެމްއެލް އިސްލާމިކް އަކީ އިސްލާމިކް އޯވާޑްރާފްޓް ފައިނޭންސިން، ކޭޝް ފައިނޭންސިން، ހައިބްރިޑް ހޯމް ފައިނޭންސިން، އިސްލާމިކް ޑެބިޓް ކާޑު ރާއްޖެ އަށް ތަޢާރަފްކުރި ބޭންކެވެ.