މޯލްޑިވްސް ސްޓޮކް އެކްސްޗޭންޖް ( އެމްއެސްއީ ) އިން ލިސްޓުކޮށްފައިވާ ސެކިއުރިޓީ ޓްރޭޑް ކުރުމަށް އޮންލައިން އޮޓަމޭޓަޑް ޓްރޭޑިން ނިޒާމެއް ލޯންޗު ކޮށްފިއެވެ.

މުޅިން އަލަށް ދިވެހިރާއްޖޭގައި ތައާރަފްކުރި އޮޓަމޭޓަޑް ޓްރޭޑިން ސިސްޓަމް ލޯންޗު ކުރީ އެމްއެސްއީގެ 17 ވަނަ އަހަރީ ދުވަހާ ދިމާކޮށެވެ.

ސްޓޮކް އެކްސްޗޭންޖަށް ލައިވްކޮށް އިންވެސްޓަރުންގެ އޯޑަރުތައް ފޮނުވުމަށް އެމްއެސްއީ އިން ލޯންޗުކޮށްފައިވާ އޮޓޮމޭޓަޑް ޓްރޭޑިން ނިޒާމުގެ ތެރޭގައި، ސެކިއުރިޓީޒް މާކެޓުގައި ރަޖިސްޓަރީކޮށްގެން ބްރޯކަރުންގެ ޚިދުމަތްދެމުން ގެންދާ ކުންފުނިތަކަށް ވަނީ މަގުފަހިކޮށްދީފައެވެ. އަދި އޯޑަރުތައް މާކެޓުގައި ޓްރޭޑިން ބޯޑަށް ވަގުތުން ފޮނުވުމަށާއި، އޮޓޮމޭޓަޑް ޓްރޭޑިން ނިޒާމުގެ ތެރެއިން މެޗްކުރުމަށް ޒަމާނީ ޓެކްނޮލޮޖީގެ ޒަރީއާއިން މަގުފަހިކޮށްދިނުމުގެ ގޮތުން، "އޯޑާ މެނޭޖްމަންޓް ސިސްޓަމް (އޯއެމްއެސް)"ގެ ނަމުގައި ބްރޯކާ ބެކް އޮފީސް ވެބް އެޕްލިކޭޝަނެއް ވަނީ ހިމަނައިފަ އެވެ.

އޭގެ އިތުރުން މޯލްޑިވްސް ސެކިއުރިޓީޒް ޑިޕޮސިޓަރީ ކުންފުނި (އެމްއެސްޑީ) އިން އެ ކުންފުނީގެ ޚިދުމަތްތައް އެކައުންޓު ހޯލްޑަރުންނަށް ފަސޭހަކަމާ އެކު ފޯރުކޮށްދިނުމަށް ގާއިމްކޮށްފައިވާ infinity.mv ވެބްސައިޓްގައި "ޓްރޭޑް ކަނެކްޓް" ގެ ނަމުގައި އާ ފީޗާއެއް ވަނީ ތައާރަފުކޮށްފަ އެވެ. އެ ފީޗާއިން އިންފިނިޓީ އެކައުންޓު ހޯލްޑަރުންނަށް ފަސޭހަކަމާ އެކު ބްރޯކަރެއް ޚިޔާރުކޮށްގެން އޮންލައިންކޮށް ޓްރޭޑް ކުރެވޭނެ އެވެ.

އެމްއެސްއީއިން ވިދާޅުވާ ގޮތުގައި އެމްއެސްއީގެ ޓްރޭޑިން އިންފްރާސްޓްރަކްޗާ ޒަމާނީ ފެންވަރަށް ތަރައްގީ ކުރުމުގެ މަސައްކަތުގެ ތެރެއިން، މިއަދު ލޯންޗުކުރި އޮޓޮމޭޓަޑް ޓްރޭޑިން ސިސްޓަމްގެ ސަބަބުން، އިންވެސްޓަރުންނަށް ފަސޭހަކަމާއެކު ރާއްޖޭގެ ސެކިއުރިޓީޒްގެ ބާޒާރުގައި ޓްރޭޑުކުރުމުގެ ފުރުސަތު ފަހިވެގެންދާނެއެވެ.

މި ނިޒާމު ތަރަޢާރަފް ކުރުމުގެ ކުރިން ޕަބްލިކް ކުންފުނިތަކުގެ ހިއްސާ ގަނެވިއްކަމުން އައީ އީމެއިލް މެދުވެރިކޮށްގެންނާއި ގުޅައިގެންނެވެ. ނަމަވެސް މިނިޒާމު ތައާރަފް ވެގެންދިޔުމާއެކު ހިއްސާ ގަނެވިއްކުމަށް ވަރަށް ބޮޑު ލުޔެއް ލިބިގެން ދާނެއެވެ.